LONY 29

Chal Mar Dwol

KINDE mang’eny gima mulo chuny ji ahinya ok en gima owachnegi kende, to bende kaka owachnegi wachno. Ka ng’ato wuoyo kodi gi dwol mamit, mamor, manyiso hera, kendo mang’won, donge en adier ni ibiro hero winje moloyo winjo ng’ama wuoyo kodi gi dwol mang’ich ng’ich kata mager?

Bedo gi dwol maber ok en mana ng’eyo kaka dwol tiyo. Bende onyalo luwore gi kit ng’ato. Kaka ng’ato medo timo dongruok e ng’eyo kod tiyo gi adiera mag Muma, lokruok motimo nenore e wuoyone. Kido machalo gi mag Nyasaye kaka hera, mor, kod muolo nenore e dwol mowuoyogo. (Gal. 5:22, 23) Sama ng’ato dewo jomoko gadier, dwonde nyiso mano. Ka ng’ato oloko chunye mobedo gi chuny madwoko erokamano kar bedo gi chuny masiko ywagore, mano nenore kuom weche mowacho koda kit dwol motiyogo. (Yua. 3:39-42; 1 Tim. 1:12; Juda 16) Kata ka ok iwinj dhok moro, kuom winjo dwol ma ng’ato wuoyogo, yot fwenyo ng’at ma jasunga, ma jok piyo, ma neno mana ketho kende, kendo mager, kata fwenyo ng’at mobolore, mahoyore mos, mang’won, kendo ma jahera.

Jomoko nyalo bedo gi dwol marach nikech tuwo noketho fuon magolo dwol kata ne onyuolgi gi songano. Chal ma kamago nyalo bedo marach ahinya maok nyal tiek rieyo chuth e piny masani. Kata kamano, kinde mang’eny, puonjruok tiyo maber gi fuoni mag wuoyo nyalo miyo ng’ato otim dongruok e wuoyo mare.

Mokwongo, ber ng’eyo ni ji nigi kit dwol mopogore opogore. Dwaro mari ok onego obed kopo dwond ng’at machielo. Kar mano, tem bero dwondi e okang’ minyalo kaluwore gi chal mar dwondi. Ang’o manyalo konyi timo mano? Nitie gik moko ariyo madwarore ni itim.

Chik Kaka Igamo Kendo Igolo Muya. Mondo dwondi owuog maber moloyo, dwarore ni igam muya moromo kendo ichik kaka igolo muya. Ka ok itimo kamano, dwondi biro wuok mayom yom kendo ibiro wuoyo e yo machot chot.

Kama obo dhano duong’go ok en pat agoko; agoko nenore maduong’ mana nikech choke manie gok. Kar mano, obo oyarore moloyo e wi ndasi. Ndasi omakore gi ng’ede mapiny, en e kind kor kod ich.

Kigamo muya mipong’o mana kuonde mamalo mag oboyeni, muchi biro rumo mapiyo. Dwondi ok bi bedo motegno kendo ibiro ol piyo. Mondo igam muya e yo maber, dwarore ni ibed kata ichung’ tir kendo ichwal gokeni chien matin. Sama igamo muya kidwaro wuoyo, tem kik iyar mana pat agogi gi malone kende. Mokwongo pong’ piny mar oboyeni. Sama oboyeni opong’ gi yo ka piny, ng’edeni bende biro yarore. E kindeno bende, ndasi biro sudo piny ka odhiro matin iyi koda nyimbich, kendo ibiro winjo ka law medo bet madiny yo ka nungoni. To oboyeni ok ni piny kuno; ng’edeni oumogi. Mondo ing’e kaka mano timore, ket ane lweteni e ng’edeni mapiny. Koro gam muya mang’eny. Kapo ni igamo muya maber, ibiro yudo ni iyi ok donj iye kendo gokeni ok ting’re. Kar mano, ibiro winjo ka ng’edeni sudo malo matin kendo giyarore.

Bang’ mano, chik kaka igolo muya. Kik iketh muya migamono kuom weyo owuog dichiel. Gole mos mos. Kik ijiw dandi kitemo chiko muya mawuok. Mano biro miyo dwondi owuog mochun kata mabith mokalo tong’. Leche manie ich kod manie kind ng’edeni dhiro muya oko, to ndasi chiko kaka muyano wuok piyo kata mos.

Mana kaka jang’wech tiegore ne ng’wech, e kaka jagol-twak bende nyalo tiegore kuom kaka ogamo kendo ogolo muya. Chung’ tir ka ichwalo gokeni chien matin mondo igam muya opong’ piny oboyeni, kae to gol muyano mos mos kikwano nyading’eny kaka nyalore maok igamo muya. Koro tiegri somo gi dwol ka igamo muya e yo ma kamano.

Gony Leche Moridre. Gimachielo ma bende konyo ng’ato bedo gi kit dwol maber en ma—bed mogonyore! Ibiro wuoro ahinya dongruok mibiro timo ka ipuonjori wuoyo kigonyori. Paro kaachiel gi del nyaka bed mogonyore nikech ka chuny ok ogonyore, to leche bende ok gonyre.

Ket chunyi ogonyre kuom bedo gi paro makare kuom jowinjo. Kapo ni magi gin joma iromogo e tiji mar lendo, ng’e ni kata mana kisepuonjori Muma kuom dweche manok, in gi weche mabeyo minyalo nyisogi kuom dwaro mar Jehova. Kendo ilimogi nikech dwarore ni okonygi, bed ni ging’eyo kamano kata ooyo. To komachielo, kapo ni joma iwuoyogo nie Od Romo, ng’eny jowinjo gin oganda Jehova. Gin osiepeni kendo gidwaro ni weche odhini maber. E piny mangima, onge joma bedo gi jowinjo ma gin osiepe kendo ma johera kaka ma wajobedogo.

Ket kinda makende mondo igony leche mag dandi. Ng’e ni leche magolo dwol tetni sama muya kalo kuomgi. Kit dwol lokore sama leche mag dand jiwore kata mbekni, mana kaka bith mar dwol mar gita lokore kombek kata korid wachene. Sama igonyo leche magolo dwol, bith mar dwondi dok piny. Gonyo leche mag dwondi miyo fuondni mag umi siko koyawore kendo mano konyo e bero kit dwondi.

Ket dendi duto obed mogonyore—chongeni, lweteni, gokeni, ng’uti. Mano biro miyo dwondi omor e yo maber. Dwol mor sama del duto bedo kaka gir kowo dwol, to luoro mono dendi timo kamano. Dwol ma en gima wuok e dand ng’ato ok gore mana e bur um kende, to bende ogore e choke mag kor, e choke mag leke, malo mar dhok, koda choke mag i um. Mago duto chiko kaka dwol mor. Kiketo gima pek e bao mamiyo dwond gita mor, mano biro nego dwond gita; baono nyaka bed gi thuolo mar tetni eka omor maber. Mano bende e kaka choke mag dendwa tiyo sama leche otwere kuomgi. Mor mar dwol biro miyo loko dwol koda keto chuny madwarore onyalre. Dwondi biro chopo ne jowinjo mang’eny maok ichuno dwondi obed malo ahinya.

GIK MAMIYO DWOL WUOK

Dwol migolo wuok nikech muya migolo kowuok e oboyeni. Oboyeni tiyo kaka gik makudho muya ka gichoro muya okal e hotogoro kadhi e lokro manie dier dandi. Ei lokro mari koni gi koni, nitie leche ariyo matindo ahinya mobanore ma gin leche magolo dwol. Gin e leche mamiyo dwol wuok. Giyawo kata gidino kama muya kadhoe kendo gigeng’o gik maok dwarre kik donj e obo. Sama ng’ato gamo kata golo muya onge dwol mawuok sama muya kadho e leche magolo dwol. Kata kamano, sama ng’ato dwaro wuoyo, leche mag dand rido leche magolo dwol kendo leche ariyogi tetni sama muya kalo kuomgi kowuok e obo. Mano kelo dwol.

Kaka leche magolo dwol medo ridore, e kaka gimedo tetni mapiyo kendo e kaka bith mar dwol medo dhi malo. To komachielo, kaka lechego medo gonyore e kaka bith mar dwol medo dhi piny. Bang’ wuok e tiend dand, dwolno dhi malo kama dand ogikie. Kae to okadho e dhok kod bur um. Kanyo e kama ilokoe, ijiwoe, kata itegoe kit dwol. Dhok mamalo kaachiel gi lep, leke, pien dhok, koda chok lemb riwore mondo olok dwol mawuok obed weche mawinjore.

Dwond dhano en hono matamre gi nono, kendo onge gima dhano oseloso man gi nyalo mar timo lokruok e okang’ mopogore opogore kaka dwol timo. Dwol nigi nyalo mar nyiso chuny mopogore opogore, onyalo nyiso ng’wono, muolo, koda hera kendo onyalo nyiso gero, kata sin makelo mahundu. Ka ng’ato otiego dwonde maber, onyalo wero kit dwol adek kendo ok obi wer mana mamit kende to kit wuoyone bende biro bedo mamulo chuny.

LOYO PEK MOKO SIE

Dwol mayom yom. Ok en adier ni kinde duto dwol matin en dwol mayom yom. Kapo ni en dwol ma nigi ndhadhu kendo mamit , jomoko nyalo mor winje. To mondo dwol owinjre maber, nyaka ng’ato oti gi dwol moromo.

Mondo imi dwondi obed makowore maber, dwarore ni imi omor maber. Mano dwaro ni ipuonjri keto dendi duto obed mogonyore kaka oler e weche manie lonyni. Timo kinda mondo iket dendi obed mogonyore kaachiel gi tiegruok wer maok iyawo dhogi nyalo konyi. Sama itimo kamano, pien dhogi onego omulre mana matin maok ijiwogi kanyachiel. Sama iwer maok iyawo dhogi, winj tetni matimore e wiyi koda e kori.

Samoro dwol wuok mayom yom kata mochun nikech ng’ato tuwo kata ne ok onindo moromo. Onge kiawa ni ka gik ma kamago onge, dwol biro bedo maber.

Dwol mabith ahinya. Kaka imedo jiwo leche magolo dwol e kaka dwol medo bedo mabith. Ka dwond ng’ato bith, jowinjo ok bed mogonyore. Gonyo leche mag dandi mondo iket leche magolo dwol ogonyre biro dwoko bith mar dwondi piny. Tim kinda ne tiegruok kamano e mbaka mapile. Gamo muya matut bende konyo.

Dwol mawinjore ni wuok gi ka um ng’ato. Gima samoro kelo pekni en nikech um ng’ato odinore, to mano ok ema kel pekno kinde duto. Samoro nikech ng’ato orido leche me dande kod dhoge, ng’atno dino fuondni mag ume mamiyo muya ok kal mayot. Mano miyo omwonyo wach. Mondo kik mano timre, dwarore ni ng’ato ogonyre.

Dwol magwagwa. Dwol ma kamano ok jiw ji mondo ogo mbaka mamor. Onyalo miyo jomoko opar ni ok imor kodgi.

Kinde moko, gima duong’ madwarore en ni ng’ato omed timo lokruok e kite. (Kol. 3:8, 12) Ka ng’ato osetimo mano, tiyo gi puonj kuom kaka dwol tiyo nyalo konyo. Ket dandi koda chok lembi obed mogonyore. Mano biro miyo dwondi obed mamoro ji kendo biro miyo owuog maber nikech ok ichun weche gie tie lekeni.