Wacho Weche e Yo Mawinjre Maler

MONDO iwuo gi ji e yo makonyogi, nyaka iwuo e yo maler. Nyalo bedo ni gima idwaro wacho en wach mamit, kata madwarore ahinya, to ng’eny wechego nyalo kalo nono ka ji ok winj e yo mayot tiend gima iwacho.

Weche ma tiendgi ok winjre mayot ok nyal jiwo ji. Kata ka ng’ato nigi dwol motegno kendo mawinjore, kapo ni owuoyo komwonyo wechene, ok obi jiwo ji mondo okaw okang’. Chalo ka gima owacho dhok mawendo, maok winjre. (Yer. 5:15) Muma paronwa niya: “Ka tung’ mar lweny chacho ywak, ng’ano ma noikre ni lweny? Kamano un bende, ka ok ubidh wach maler gi dhou, ng’ato nong’e nadi gi muwacho? Unuchal jo ma loso ni yamo.”—1 Kor. 14:8, 9.

Ang’o Mamiyo Weche Kik Winjre Maler? Sama ng’ato wuoyo, nyalo bedo ni ok oyaw dhoge moromo. Ka leche mag dhoge ok ogonyore kendo orido dhoge, mano nyalo miyo owuo gi dwol mapiny maok winjre maler.

Wuoyo aruya aruya bende nyalo miyo winjo tiend gik ma ng’ato wacho obed matek. Timo mano chalo gi keto weche manie kaset odhi mapiyo moloyo kaka dwarore. Weche to nitie, kata kamano thothgi kalo gi yamo.

Seche moko, gima nyalo miyo ng’ato kik owuo e yo mawinjre maler en ng’ol moro monyuolego e fuondnige mag wuoyo. Kata mana joma nyagore gi chandruok machalo kamano nyalo timo dongruok mang’eny ka gitiyo gi puonj mayudore e sulani.

Kata kamano, thothne, weche maok winjre maler bedoe nikech mwonyo weche—wacho weche aruya ka gimakore e yo mamiyo winjo tiendgi bedo matek. Chandruogno nyalo bedoe nikech kalo nyukta kata weyo maok otiek luongo wach duto. Sama ng’ato wuoyo aruya ka wechene makore, jowinjo nyalo winjo tiend weche moko, to moko ok gibi winjo. Ka ng’ato ok wach wechene e yo mawinjre maler, mano nyalo miyo kik opuonj e yo makonyo.

Kaka Ng’ato Nyalo Wuoyo e Yo Mawinjre Maler. Achiel kuom gik madongo madwarore mondo iwach weche mawinjre maler, en ng’eyo kaka weche dhou chalo. E dhok mang’eny, weche ichano e silabo. Silabo en nyukta achiel kata nyukta mang’eny miluongo kanyachiel. E dhok ma kamago, silabo ka silabo biro winjre sama iwuoyo, kata obedo ni giduto ok jiwgi machalre. Kidwaro ni imed wuoyo e yo mawinjore maler, dhi mos sama iwuoyo kendo tem matek iluong moro ka moro kuom silabo. Mokwongo mano nyalo nenore ka gima iluongo weche kare e yo mojimbore, to kaka imedo tiegori e kaka ibiro dok mos mos e wuoyo malolore. Mondo iwuo e yo malolore, nitie weche moko mibiro wacho kanyachiel, to kapo ni mano biro miyo tiend weche moko kik winjre, kik iriwgi.

Gima onego ing’e: Mondo iluong weche kaka dwarore, nyalo dwaro ni itiegri wuoyo kendo somo weche kare e yo mojimbore. Kata kamano, kik iwe mano obed wuoyoni mapile. Nyalo nenore ka gima isungori kata ok iwuo e yo mapile.

Kapo ni imwonyo wecheni, puonjri ting’o wiyi malo mondo tiki obed mabor gi kori. Sama isomo Muma, ting’ Mumbi malo moromo mondo ng’iyo jowinjo kendo dwoko wang’i e Muma obedni mayot. Timo kamano biro miyo wecheni owuog mayom maonge gima geng’ogi.

Ng’eyo kaka inyalo dwoko kibaji piny bende nyalo konyi iwuo e yo mawinjre maler. En gima ong’ere ni ka leche mag wang’i kata leche matayo kaka iyweyo oridre nikech kibaji, mano nyalo moni wuoyo e yo mawinjre maler. Luoro ma kamano nyalo miyo tudruok monego otimre mayot e kind paro, fuondni mag wuoyo, koda kaka iyweyo, okethre.

Mondo leche mag dhok oluw mapiyo kaka obwongo chiko, dwarore ni gibed mogonyore. Dhog ng’ato bende ok onego oridre. Nyaka gibed moikore yawore mapiyo eka weche owuog e dhogi koda e dandi kaka dwarore. Kapo ni leche mag dhogi ok ogonyore, dhogi ok bi yawore kaka dwarore, kendo mano biro chuno wecheni owuog e tie lekeni. Mano biro miyo wuoyoni obed ka mar gero, mamwonyore, kendo maok winjre maler. Kata kamano, gonyo leche mag dhogi ok nyis ni koro onego iwuo maok idewo kaka wecheni wuok. Timo mano dwaro ni ing’i gi luongo weche kaka dwarore mondo wecheni owinjre maler.

Bang’ nono chal mari, inyalo neno ni somo gi dwol biro konyi. Non ane mos kaka itiyo kod fuondni magi mabeyo miwuoro mag wuoyo. Be iyawo dhogi moromo mondo wecheni owuog maonge gima geng’ogi? Ng’e bende ni lewi ok e fuoni kende matiyo e wuoyo, kata obedo ni en ema otiyo ahinya kiwuoyo. Ng’uti, leche mag dhogi, pien dhogi, leche mag wang’i, koda leche mag dandi, duto konyo e wuoyo. Sama iwuoyo, be nenore ka gima leche mag wang’i ok sudi? Ka en kamano, to kare nyalo bedo ni adier wecheni ok winjre maler.

Kapo ni in kod tep, mak dwondi e tep sama iwuoyo e yo mapile mana kaka ijawuoyo e tij lendo. Mak wuoyo mitimo e yor mbaka kuom dakike mogwaro. Winjo tepno nyalo konyi fwenyo weche moko sie maok iluong e yo mawinjre maler. Tem fwenyo kuonde ma ichodoe, imwonyoe, kata irungoe weche, kae to item neno gimomiyo mano timore. Thothne inyalo loyo nyawo ma kamano kuom luwo puonj mowach malo kae.

Be in gi ng’ol moro mamoni wuoyo e yo mawinjre maler? Tem yawo dhogi moloyo kaka ijatimo pile, kae to item luongo weche adimba. Gam muya opong’ oboyeni, kae to iwuo mos mos. Timo kamano osemiyo ji mang’eny ma nigi ng’ol e wuoyo omed wuoyo e yo mawinjre maler. Kata obedo ni chandruok ma in godono ok bi rumo chuth, kik chunyi ol. Ng’e ni Jehova noyiero Musa, jal ma nenore ni ne nigi ng’ol e wuoyo, mondo oter ote madongo ne Jo-Israel koda ne Farao mar Misri. (Wuok 4:10-12) Ka chunyi oikore, obiro tiyo kodi in bende kendo obiro gwedho tije mitimone obed gi nyak.