Wuoyo e Yo Manyiso Ni In Gadier

KA NG’ATO wuoyo e yo manyiso ni en gadier, ji neno ni en gi yie motegno kuom gima owacho. Bedo gadier kamano ne nenore ayanga e tij lendo ma Paulo notimo. Nondiko ne jogo ma nobedo Jokristo Thessalonika niya: “Injili marwa ne ok obironu gi wach miwacho gi dhok kende, to nobironu gi . . . yie motegno.” (1 Thes. 1:5, Luo New Testament, 2003) Yie, tiende ni bedo gadier kamano nonenore e yo ma Paulo ne wuoyogo koda e yo ma ne otiyogo gi ngimane. Bedo gadier motegno bende onego onere e yo mwapuonjogo adiera mag Muma.

Wuoyo e yo manyiso ni in gadier ok en bedo ng’at maok lok pache, machuno weche, kata manyiso achaye. Kar mano, ng’at manyiso ni en gadier sama owuoyo kuom weche mayudore e Wach Nyasaye, wuoyo e yo manyiso ni en gi yie motegno.—Hib. 11:1.

Kinde Madwarore ni Iwuo e Yo Manyiso ni In Gadier. Dwarore ni iwuo e yo manyiso ni in gadier sama in e tij lendo. Thothne, mana kaka weche miwacho ywayo pach ji, e kaka yo miwuoyogo bende ywayogi. Gifwenyo kaka iwinjo e chunyi kuom gima iwachonegi. Moloyo kaka weche kende nyalo timo, wuoyo e yo manyiso ni in gadier nyalo konyo e okang’ malach ni wecheni gin manyalo konyo ji.

Dwarore bende ni iwuo e yo manyiso ni in gadier sama iwuoyo e nyim jowinjo ma gin Jokristo weteni. Jaote Petro nondiko barua mare mokwongo ‘mondo ojiw kendo onyis ni mani en ng’wono madier mar Nyasaye.’ Kuom wachni, nojiwo owete niya: “Chung’ieuru matek.” (1 Pet. 5:12) Kane ondiko ne kanyakla ma ne nitie Rumi, jaote Paulo nonyiso ni en gadier, to mano nokonyogi. Nondiko niya: “Ang’eyo chuth ni, tho, kata ngima, kata malaika, kata ruodhi, kata gik ma timore ndalogi, kata gik ma biro timore, kata teko, kata gi ma malo, kata gi ma mwalo, kata gimoro manadi mochue, ok nyal pogowa gi hera mar Nyasaye moherowago e Kristo Yesu Ruodhwa.” (Rumi 8:38, 39) Bende, Paulo nondiko e yo maywayo ji kuom gimomiyo lendo ne jomamoko dwarore, kendo kinda ma noketo e tijni nonyiso maler ni en owuon nokawo wachno mapek. (Tich 20:18-21; Rumi 10:9, 13-15) Bedo gadier kamano bende onego onere kuom Jokristo ma gin jodongo mag kanyakla sama gipuonjo Wach Nyasaye.

Sama jonyuol wuoyo gi nyithindgi e wi gik mamulo winjruokgi gi Nyasaye, bedni en seche mag puonjruok kata kinde mamoko, dwarore ni giwuo e yo manyiso ni gin gadier. Mondo jonyuol otim kamano, dwarore ni gin giwegi ginyag hera ne Nyasaye koda ne yorene ei chunygi. Kae to sama giwuoyo gi nyithindgi, ginyalo timo kamano e yo manyiso ni gin gadier mowuok e chunygi, “nikech gik mogundho e chuny ng’ato ema dhoge wacho.” (Luka 6:45; Rapar 6:5-7) Wuoyo e yo manyiso ni gin gadier kamano bende biro jiwo jonyuol mondo oket ranyisi maber mar “yie madier” maonge wuondruok—2 Tim. 1:5.

To ahinya, dwarore ni iwuo e yo manyiso ni in gadier sama jomoko temo yie mari. Jaskul wadu, japuonj, kata jal moro mutiyogo, nyalo wuoro gimomiyo ok iriwri kodgi e timo nyasi moro. Dwoko motegno milero maber nyalo konye miyo puonj miluwo mar Muma luor. To nade ka ng’ato temi mondo idonj e tim moro marach—wacho miriambo, tiyo gi yedhe mamero, kata donjo e timbe mag terruok? Dwarore ni iket maler ni ok ibi donjo e timbego ngang’, kendo ni kata hombi maromo nade ok ibi loko pachi. Mano dwaro ni iwuo e yo manyiso ni in gadier sama itamori temno. Sama Josef ne tamore tembe mag terruok ma chi Potifar ne temego, Josef nowacho motegno niya: “Danyal nade timo richo maduong’ni, kendo ketho kuom Nyasaye?” Kane dhakono odhi nyime teme, noringo owuok e odno.—Chak. 39:9, 12.

Kaka Ng’ato Nyiso ni En Gadier. Weche mitiyogo nyalo konyo kama duong’ e nyiso ni in gadier gi gima iwacho. Kinde mogwaro kane Yesu pok owacho puonj moro maduong’, nokwongo wacho niya: “Adier, adier, awachoni.” (Joh. 3:3, 5, 11; 5:19, 24, 25) Bedo gadier ma Paulo ne nigo nenore ayanga kuom tiyo gi weche kaka “Ang’eyo chuth,” “Ang’eyo, kendo e Ruoth Yesu ayie chuth,” koda “Awacho adier; ok ariambi.” (Rumi 8:38; 14:14; 1 Tim. 2:7) Kuom kaka wachne ne dhi chopo, kinde moko Jehova ne chiko jonabine kuom roho mondo giwach weche motegno, kaka, “Nobi adieri.” (Hab. 2:3) Sama iwuoyo kuom weche mokor kaka magi, inyalo tiyo gi weche kaka mago. Ka in gadier kuom Jehova to ok kuomi iwuon kendo kiwuoyo gi ji e yo manyiso luor, weche manyiso ni in gadier kamano biro nyiso ni in gi yie motegno.

Bedoni gadier nyalo nenore bende kuom kinda koda mijing’o ma chalni maoko nyiso. Chal mar wang’i, ranyisi mag dendi, koda kaka itimo sama iwuoyo, duto konyo e nyiso ni in gadier gi gima iwacho, kata obedo ni magi nyalo pogore kuom ng’ato gi ng’ato. Kata obedo ni in ng’at moluoro wang’ ji kata mawuoyo mos, ka ing’eyo chuth ni gima iwacho en adier kendo ni dwarore ni jomoko owinj wachno, bedoni gadier biro nenore maler.

Onge kiawa ni gimoro amora mwawacho mondo wanyis ni wan gadier nyaka wuog e chunywa. Ka ji neno ni wawuondore kar wuoyo kowuok e chunywa, ginyalo kawo ni weche mwawacho ok nyal tiyo. Omiyo, moloyo duto, wuo kaka ijawuoyo pile. Kaluwore gi kwan mar jowinjo, nyalo dwarore ni iting’ dwondi kata iwuo gi mijing’o momedore. Kata kamano, gima duong’ monego idwar timo en wuoyo kowuok e chunyi kendo e yo mapile.

Gik Makonyi Wuoyo e Yo Manyiso ni In Gadier. Nikech wuoyo e yo manyiso ni in gadier luwore gi kaka iwinjo e chunyi kuom weche miwuoyoe, dwarore ni itim ikruok maber. Kopo mana weche mag buk moro kendo wacho wechego kaka gin, ok oromo. Dwarore ni iwinj tiend wechego maber kendo ilergi kitiyo gi wecheni iwuon. Nyaka ibed gadier chuth ni wechego gin madier kendo ni ginyalo konyo jowinjo. Mano nyiso ni sama iiko twak dwarore ni iket e paro chal mar jowinjo, gima nyalo bedo ni ging’eyo kuom wachno koda kaka ginyalo kawo wechego.

Bedo mayot moloyo mondo ji one ni wan gadier gi gima wawacho ka wuoyowa lolore. Omiyo, e wi iko weche mabeyo, ket kinda e yo migologo twak. Non adimba kuonde madwarore ni ojiw moloyo e twagi, mondo sama ilero kuondego, itim kamano maok ing’i ahinya weche mondiki. Bende, kwa Jehova e lemo mondo ogwedh kinda miketo. Kitimo kamano, ‘ibiro timo chir kuom Nyasachwa’ mondo iwuo e yo manyiso ni in gadier ni weche miwacho gin madier kendo ni gin weche madwarore mondo jowinjo ong’e.—1 Thes. 2:2.