LONY 34
Wuoyo Magero
OTE momiwa mondo waland en wach maber. Yesu nowacho niya: ‘Nyaka kwong yal wach maber ne ogendini duto.’ (Mari. 13:10) Yesu owuon noketo ranyisi maber kuom jiwo ‘wach maber mar pinyruodh Nyasaye.’ (Luka 4:43) Gima joote ne lando bende iluongo ni ‘wach maber mar Nyasaye’ kata ‘wach maber mar Kristo.’ (1 Thes. 2:2; 2 Kor. 2:12) Wach maber kamano en magero ji.
Kaluwore gi ‘wach maber mochwere’ ma ‘malaika moro ma huyo e kor polo’ nowacho, wan bende wajiwo ji ni: “Luoruru Nyasaye, kendo miyeuru duong’.” (Fwe. 14:6, 7) Wanyiso ji kuonde duto e wi Nyasaye madier, nyinge, kido mage mabeyo, tijene mabeyo miwuoro, dwaro mare manyiso ni oherowa, ni en ema onego ochikwa, kendo wanyisogi gima Nyasaye dwaro ni watim. Wach maberno oriwo nyiso ji adiera ni Jehova Nyasaye biro ketho jomaricho maok miye luor kendo mamiyo ngima bedo matek ne jomoko. Kata kamano, ok en tijwa ng’ado ne joma walendonegi bura. Gombowa maduong’ en ni ji mang’eny kaka nyalore orwak wach mar Muma mondo gin be gine e ngimagi ni en wach maber.—Nge. 2:20-22; Joh. 5:22.
Kik Iwuo Ahinya Kuom Weche Manyoso Chuny. En adier ni e ngima, nitie weche moko manyoso chuny. Ok wawuondre ni ok wane mago. Mondo ichak mbaka gi ng’ato, inyalo nyise wach moro machando ji e alworau kae to iwuo kuom wachno matin. Kata kamano, wuoyo ahinya kuom wechego ok kony. Pile ji siko winjo weche malit, omiyo wuoyo kuom gik ma kamago nyalo miyo kik girwakwa kata gitamre chiko itgi. Sama eka ichako mbaka, tem tero pachgi e weche mamoro chuny manie Wach Nyasaye. (Fwe. 22:17) Bang’e, kata ka ng’atno ok bi dwaro dhi nyime winjo, biro yudo ka isenyise gima gere mobiro dong’ koparo. Mani nyalo miyo chieng’ moro odwar winjo.
E yo machalo kamano bende, kogweli mondo igol twak, kik ithung’ jowinjo gi weche manyoso chuny mana nikech wechego yudore mang’eny. Ka jagol-twak wuoyo alanda kuom kaka joloch mag dhano ok nyal gimoro, kochiwo ripot kuom kaka mahundu, gero, koda timbe terruok onya, gikone mano nyalo nyoso chuny ji. Ti gi weche ma kamago mana ka nitie gimomiyo. Tiyo mana matin gi weche manyoso chuny nyalo jiwo gimomiyo twagino en mowinjore gie kindeno. Bende mano nyalo nyiso gimomiyo chal ma kamago nitie, ma mi ji one ni puonj ma Muma chiwo e loyo wachno ema nyalo tiyo. Kanyalore, wach wechego achiel kachiel maok idhi matut ahinya kuom chandruogego.
Pile, sama ng’ato golo twak, ok yot weyo oko weche duto mamulo gik maok beyo matimore, kendo weyogi chuth maok iwuoyo kuomgi ok ber. Gima tek en ng’eyo kaka ikiko weche mabeyo koda manyoso chuny e yo mamiyo gikone twak bedo magero ji. Mondo itim kamano, nyaka ing’e weche mibiro tiyogo, mibiro weyo oko, koda kuonde mibiro jiwo. E Twak mar Got, Yesu nojiwo jowinjone mondo owe tim mar dwaro mana makorgi kende kaka jondiko gi Jo-Farisai ne timo, kendo nochiwo ranyisi moko mondo olergo wachno. (Math. 6:1, 2, 5, 16) Kata kamano, kar wuoyo alanda kuom ranyisi maok beyo mag jotend din-go, Yesu nojiwogi ni ging’e yore madier mag Nyasaye kendo gidag kaluwore kod yorego. (Math. 6:3, 4, 6-15, 17-34) Wechego nogerogi sidang’.
Ket Weche e Yo Magero. Kapo ni omiyi twak e kanyaklau mawuoyo kuom gima Jokristo onego otim, tem gero ji kar siemo mana kethogi. Ne ni gima ijiwo ji mondo otim, ema in bende itimo. (Rumi 2:21, 22; Hib. 13:7) We hera ema ochwali sama iwuoyo to ok ich wang’. (2 Kor. 2:4) Ka in gadier ni joneno weteni dwaro moro Jehova, gimiwacho biro nyiso adiera ma in-go kodgi, kendo mano biro konyogi moloyo. Ne kaka jaote Paulo nonyiso ni ne en gadier ma kamano kaluwore gi weche mondiki e 1 Jo Thessalonika 4:1-12; 2 Thessalonika 3:4, 5; kod Filemon 4, 8-14, 21.
Nitie kinde moko madwarore ni jodong-kanyakla ochiw siem kuom tim moro maok kare. Kata kamano, bolruok biro konyogi timo ne owetegi e yor muolo. (Gal. 6:1) Yo ma iwachogo gik moko onego onyis ni imiyo joma nie kanyakla luor. (1 Pet. 5:2, 3) To moloyo, Muma jiwo chwo mapod hikgi nok mondo ong’e wachni. (1 Tim. 4:12; 5:1, 2; 1 Pet. 5:5) Sama dwarore ni okwer gik maricho, ochiw kum, kata orie ji, onego otim mano kaluwore gi gima Muma wacho. (2 Tim. 3:16) Ok onego ng’ato ochun kata odhog Ndiko ngang’ mondo osirgo wach moro mowinjo ka chunye ohero ahinya. Kata ka rieyo pach jomoko dwarore, pod inyalo ket wechego e yo magero ji kuom jiwo ahinya kaka wanyalo tamore donjo e tim marach, kaka wanyalo loyo chandruoge, kaka wanyalo loyo pek moko, kendo kaka rito chike Jehova konyowa.—Zab. 119:1, 9-16.
Sama iiko twak, ng’e kaka ibiro tieko moro ka moro kuom puonj madongo kaachiel gi twak duto. Gimiwacho mogik ema ji paro aming’a. Be ibiro kete obed magero ji?
Sama Iwuoyo gi Jokristo Weteni. Jotich Jehova ogeno ahinya thuolo ma gin-go mag riwore e chokruoge mag Jokristo. Magi gin kinde mag yudo jip kuom wach Nyasaye. Muma jiwowa ni mondo wapar ‘jiwore ng’ato gi ng’ato’ sama wachokore kuondewa mag lamo. (Hib. 10:25) Ok watim mano mana kuom golo twege kod chiwo paro e chokruogewa kende, to bende kuom mbaka mwabedogo kapok chokruoge ochakore kata bang’e.
Kata obedo ni wuoyo kuom weche mamulo kit ngimawa mapile ok rach, jip maduong’ yudore kuom wacho weche mamulo tije kata yore mag Nyasaye. Magi oriwo weche mwaseneno e tijewa ne Nyasaye. Nyiso ni idewo ng’at machielo bende en gima gero.
Nikech gik matimore e piny nyalo ywayowa, dwarore ni watang’. Kane Paulo ndiko ne Jokristo man Efeso, nowacho niya: “Weuru miriambo, kendo ng’ato ka ng’ato owach ni wadgi adiera.” (Efe. 4:25) Wacho adiera kar wacho miriambo oriwo tamruok lamo ji koda gik ma piny omiyo duong’. E yo ma kamano bende, Yesu nochiwo siem kuom “wuond mar mwandu.” (Math. 13:22) Omiyo, sama wawuoyo gi jowadwa, onego watang’ kik wajiw wuondno kuom pako mwandu kaka gima duong’.—1 Tim. 6:9, 10.
Kane Paulo puonjo kuom kaka wanyalo gero jomoko, nojiwowa ni kik wang’ad ne owadwa bura kata kawe ka ng’at manono mana nikech chunye okwedo gimoro nimar “yiene yomyom,” tiende ni pok puonj maketo Jokristo thuolo oyangorene maler. Kuom adier, mondo mbakawa oger ji, nyaka waket e paro pon margi koda dongruok ma gisetimo e adiera. Mano kaka dibed gimarach ‘keto e nyim owadu [kata nyaminu] gima dichwanye, kata gima digeng’e’!—Rumi 14:1-4, 13, 19.
Joma nyagore gi chandruoge mapek—kaka tuoche maok changi—rwako mbaka magero. Nyalo bedo ni ng’at ma kamano timo kinda ahinya mondo ochop e chokruoge. Joma ong’eyo chalne nyalo penje niya: “Iwinjo nade?” Onge kiawa ni obiro mor ni gidewe. Kata kamano, nyalo bedo ni ok one ka mbaka modok korka tuwone ema jiwe ahinya. Weche manyiso ni ogene koda mapuoye nyalo moro chunye moloyo. Be nitie gima nyisi ni odhi nyime hero Jehova kendo onano e bwo chal matek? Be iwinjo ka paro mochiwo jiwi? Donge inyalo gere moloyo kiwuoyo kuom kido mage mabeyo koda kaka okonyo kanyakla kar wuoyo kuom chandruogene?—1 Thes. 5:11.
Mondo mbakawa obed magero, dwarore ahinya ni wang’e kaka Jehova kawo gik mwawacho. E Israel machon, joma ne wuoyo marach kuom joma Jehova ne tiyogo kendo ma ne ng’ur nikech manna, noyudo kum malit mar Nyasaye. (Kwan 12:1-16; 21:5, 6) Wanyiso ni waneno kaka ranyisigo konyowa kuom miyo jodong-kanyakla luor kendo nyiso ni wamor gi chiemb chuny ma jatichno mogen kendo mariek miyowa.—1 Tim. 5:17.
Yudo weche makonyo mwanyalo wuoyoe sama wan gi owetewa ma Jokristo ok tek. Kata kamano, ka ng’ato siemo mana ketho mag jomoko, kaw okang’ mar loko mbakano obed magero.
Bed ni walendo ne jomamoko, wagolo twak e ndiri, kata wagoyo mbaka gi owetewa, mad wanyis rieko mondo gima wuok e chunywa obed “mana mano maber kendo ma gedo, kaka owinjore, mondo okony jo ma winjo.”—Efe. 4:29.