Kaka Wanyalo Medo Lony e Tij Lendo—Chako Mbaka e Yo Manyalo Miyo Walend ne Ji Sama Wan e Dijewa

Gimomiyo Mano Dwarore: Sama walendo ot ka ot, samoro wayudoga ka ute mang’eny ji ongee. Kata kamano, wanyalo romo gi jogo sama wan e wuoth, sama warito neno laktar, sama wan e brek mar tich kata mar skul, kata kuonde mamoko. Jehova dwaro ni ji duto oyud thuolo mar winjo wach maber mar Pinyruoth. (1 Tim. 2:3, 4) Ng’enyne, wan ema nyaka wachak mbaka gi ji ka wadwaro ni walendnegi.

Kaka Wanyalo Timo Mano:

Yier joma iwuoyogo. Be ng’atno nenore ni en ng’ama mor manyalo hero wuoyo kodi? Be kama untieno en kama unyalo goyoe mbaka? Jolendo moko ng’iyoga wang’ joma gidwaro lendonegi kae to gibwonjo. Ka ng’atno bende obwonjo, to gichako goyo mbaka kode.
Ka iwinjo ka in gi luoro, lam machuok gi chunyi.—Neh. 2:4; Tich 4:29.
Chak mbaka e yo mayot, samoro inyalo chako mbaka gi mos. Yesu ne ok ochako mbaka gi chi Samaria kuom wuoyo e wi Pinyruoth. (Joh. 4:7) Samoro inyalo chako mbaka gi ng’ato kuom pwoye kama: “Nyithindi nigi luor kod timbe mabeyo!” Kata inyalo chako ka ipenje penjo kaka: “Be nyocha iwinjo wach ma ne oland e redio?”
Ka usechako mbaka, tem manyo yo ma inyalo lendonego, kata kamano kik irikni. We mondo mbaka odonj adonja kende. Samoro inyalo wachone wach moro mamiyo obedo gi siso mar penji penjo moko. Kuom ranyisi, ka uwuoyo e weche mamulo ngima mar joot, inyalo wacho kama: “Aseyudo puonj moko minyalo gen manyalo konyo e puonjo nyithindo e yo maber.” To ka uwuoyo e wi wach moro manyien ma noland e gige fuambo weche, inyalo wacho kama: “Nyocha asomo wach moro maber manyiso ni lokruok biro betie.” Kik iwinj marach kapo ni mbakauno orumo kapok ilendone.
Ting’ trakt kata buge moko minyalo miyo ng’ato ang’ata moyie winji.

Tem Timo Mae e Dweni:

Juma ka juma, tem chako mbaka kata mana gi ng’ato achiel sama in e dijeni mondo ilendne.