Keto Puonj Madongo Onere Ayanga

PUONJ madongo mag twak gin mage? Magi ok gin mana weche mamit miwuoyo kuomgi wiyewiye. Gin paro madongo milero matut. Gin e puonj madwarore ahinya mondo eka ichop gima idwaro.

Achiel kuom gik mamiyo puonj madongo onere ayanga en tiyo gi rieko e yiero kendo chano weche. Ding’eny, nonro ma ng’ato timo ne twak miyo oyudo weche mogundho maok onyal tiyogo duto. Inyalo yiero nade weche mibiro tiyogo?

Mokwongo, ng’e chal mar jowinjo. Be thothgi ong’eyo wich miwuoyoe, koso ok ging’eye ahinya? Be thothgi oyie gi gima Muma wacho kuom wachno, koso jomoko to riwo gi kiawa? Gin pek machalo nade ma giyudo e ngimagi mapile sama gitemo tiyo gi puonj ma Muma chiwo kuom wachno? Mar ariyo, ne ni ing’eyo maler gimomiyo idwaro wuoyo gi jowinjogo kuom wich michano wuoyoe. Kitiyo gi weche ariyogi, piedh weche kendo kan mana mowinjore chuth gi twak.

Kapo ni omiyi kalatas moting’o weche matayo twak, monyiso wach maduong’ miwuoyoe koda puonj madongo, dwarore ni iluw wechego. Kata kamano, wecheni biro konyo e okang’ momedore kiketo e paro weche man malogi sama ilero moro ka moro kuom puonj madongo. Kapo ni ok omiyi weche matayo twak, in gi ting’ mar yiero puonj madongo.

Sama ing’eyo maber puonj madongo kendo isechano weche matindo malero moro ka moro kuomgi, golo twagno biro bedoni mayot. Nyalore ni twagno biro konyo jowinjo e yo momedore.

Yore Mopogore Opogore mag Chano Wecheni. Nitie yore mopogore opogore mag chano weche twak. Kaka imedo ng’eyo yorego, ibiro yudo ni thothgi nyalo kelo nyak maber kaluwore gi gimidwaro chopo.

Chenro minyalo timie lokruok mayot en mitimo kaluwore gi wiye matindo. (Puonj ka puonj maduong’ dwarore nikech okonyo jowinjo ng’eyo tiend wich miwuoyoe kata okonyi chopo gimidwaro e twak.) Chenro machielo en keto weche kaka ne giluwore. (Kuom ranyisi, gik ma ne otimore e kinde Ataro, inyalo luw gi gik ma ne otimore kapok oketh Jerusalem e higa mar 70 E.N., kae to inyalo tiek gi gik matimore kindewagi.) Chenro mar adek en mar lero tim koda gima timno kelo. (Inyalo chako gi lero tim kata chako gi lero gima tim moro kelo. Kuom ranyisi, inyalo chako kuom lero chal moro mantie, kae to inyis gima okelo chalno.) Chenro mar ang’wen en mar nyiso wach moro kod atache. (Inyalo nyiso pogruok mantie e kind gimaber kod gimarach kata gima jiwo chuny kata gima nyoso chuny.) Seche moko inyalo ti gi chenro mokalo achiel e twak.

Kane odonj ne Stefano e yor miriambo e Sanhedrin mar Jo-Yahudi, nogolo twak motegno kochano weche kaluwore gi kaka ne gitimore. Sama isomo wechego e bug Tich Joote 7:2-53, ne kaka noyiero puonj madongo e yo mowinjore. Stefano nokwongo keto maler ni nowuoyo kuom histori ma jowinjo ne nigo gadier chuth. Kae to nonyiso ni kata obedo ni owete Josef ne okwede, Nyasaye notiyo gi Josef e kelo resruok. Bang’ mano, nonyiso ni Jo-Yahudi ne ok winj Musa, jal ma Nyasaye ne tiyogo. Notieko kuom jiwo ni chuny ma Jo-Yahudi ma nodak tienge mokalo nonyiso, ema bende ne onyis gi Jo-Yahudi ma ne onego Yesu Kristo.

Kik Ibed gi Puonj Madongo Modhuro. Gero wach moro amora maduong’ monego owuoye dwaro mana puonj manok. Thothne ok gikal abich. Mano en adier bed ni ibiro wuoyo kuom dakika 5, dakika 10, dakika 30 kata mokalo kanyo. Kik item keto puonj mang’eny ahinya onere ayanga. Jowinjo nyalo mana mako puonj mopogore opogore manok e twak achiel. Kendo kaka twak bedo mabor e kaka dwarore ni puonj madongo ojiw motegno kendo oket e yo maler chuth.

Kata bed ni in gi puonj madongo adi, ne ni ilero moro ka moro kuomgi moromo. Mi jowinjo kinde moromo mar nono moro ka moro kuom puonj madongo mondo puonjgo ogurre e pachgi.

Twagi onego owinjre ni yot. Mano ok otenore kinde duto kuom kar romb weche miwuoyoe. Ka paro michiwo ochan mana e bwo wiye manok kendo ilerogi achiel bang’ machielo, twagi biro bedo mayot luwo kendo mayot mako.

Ket Puonj Madongo Onere Ayanga. Ka ichano wecheni maber, ok bi bedoni matek jiwo kony ma puonj madongo me twagi chiwo.

Gimaduong’ makonyo ng’ato keto puonj maduong’ onere ayanga en chiwo weche masiro puonjno, chiwo ndiko, kendo chiwo weche mamoko e yo majiwo puonjno kendo mamiyo owuog motegno. Puonj duto matindo onego obed malero, masiro, kata mamiyo puonj maduong’no wuok motegno. Kik imed weche maok otudore gi gima iwuoyoe mana nikech gin weche mamit. Sama ilero puonj matindo, nyis maler kaka gitudore gi puonj maduong’ ma gisiro. Kik iwe ne jowinjo ting’ mar fwenyo kendgi tudruok mantie. Tudruok mantie inyalo nyis kuom nwoyo weche sie malero puonj maduong’ kata kuom nwoyo puonj maduong’ e yo machuok kinde ka kinde.

Jogol-twak moko keto puonj madongo onere ayanga kuom kwanogi achiel achiel. Kata obedo ni mano en yo achiel mar keto puonj madongo onere ayanga, mano ok onego okaw kar yiero weche adimba kendo chano weche owinjre malong’o.

Inyalo yiero nyiso puonj maduong’ achiel kachiel kapok ichiwo weche masiro puonjno. Mano biro konyo jowinjo ong’e gimomiyo weche mabiro luwo dwarore, kendo biro jiwo puonj maduong’no. Inyalo jiwo puonjno kuom kete e yo machuok bang’ kiselere maber chuth.

E Tij Lendo. Puonj mochiw malo kaegi ok ti mana ne golo twak, to bende gitiyo e mbaka mwagoyo gi weg udi ka wan e tij lendo. Sama itimo ikruok, ket e paro wach moro amora momako ji ahinya e alworano. Yier wach maduong’ miwuoyoe mabiro miyi thuolo mar nyisogi kaka geno ma Muma chiwo nyalo loyo wachno. Inyalo yiero puonj ariyo mibiro tiyogo e lero wijno. Yier ndiko mibiro tiyogo e siro puonjgo. Kae to chan kaka ibiro chako mbakano. Ikruok ma kamano miyo ng’ato thuolo mar timo lokruok manyalo dwarore ne mbaka. Bende timo mano konyi wacho gimoro ma wuon ot biro mako e pache.