Chano Weche Machuok Matayi

SAMA omi ng’ato migawo mar golo twak, thoth ji tiyo tich matek mar ndiko wechegi duto piny, ka gikwongo gi weche michakogo nyaka mitiekogo. Mondo ng’ato otiek iko twak, yudo kosendiko twagno nyading’eny. Mano nyalo kawo seche mang’eny.

Be kamano e kaka in bende iiko twegeni? Be diher puonjori iko twak e yo mayot moloyo? Ka ipuonjori iko twak, ibiro yudo ni onge tiende ndiko piny wecheni duto. Timo kamano biro miyi thuolo momedore mar nwoyo twagno kendi motelo kapok igole. Golo twege ok bi bedoni mana mayot kende, to bende gibiro bedo mamit kendo majiwo jowinjoni.

En adier ni kuom twege mag ji duto migolo e kanyakla, nitie kalatas moting’o weche twak. Thoth twege mamoko to ok tim kamano. Inyalo mana miyi wich kata wach moro maduong’ monego iwuo kuome. Kata inyalo kwayi mondo iwuo kuom weche sie mosego. Seche moko inyalo mana miyi weche matin mondo ochiki. E migepe ma kamago duto, dwarore ni in iwuon ichan weche machuok mabiro tayi.

Ranyisi moketi e ite mar 41 biro nyisi kaka inyalo chan weche machuok matayi. Ne kaka ochan puonj madongo duto kochakore koracham mogik, kendo ondikgi gi nyukta madongo. E bwo moro ka moro kuom puonjgo, nitie paro masirogi. E bwo parogo, nitie weche momedore malerogi mondik ka ochorgi gi iye matin koa koracham. Non ane maber kaka ochan weche e twagni. Ne kaka puonj ariyo madongogo otudore achiel kachiel gi wach maduong’ miwuoyoe. Ne bende kaka weche masirogi ok gin mana weche mamit. Kar mano, moro ka moro siro puonj maduong’ manie wiye.

Sama ichano weche machuok matayi, ok gibi chalore chuth gi ranyisi momiyini. Kata kamano, king’eyo weche monego iluw, mano biro konyi chano wecheni kendo iko twak maber kitiyo gi kinde moromo kaka owinjore. Inyalo timo kamano nade?

Non, Yier, Kae to Ichan

Dwarore ni ibed gi wach maduong’ miwuoyo kuome. Wachno ok en mana wich minyalo ler gi wach moro achiel. En e puonj maduong’ midwaro wuoyoe, kendo onyiso kama wi twak ochomo. Kapo ni omiyi wich mar wach maduong’ miwuoyoe, non maber weche ma wijno otiyogo. Kapo ni osemiyi kama iyudoe weche, puonjri wechego kiketo pachi e wach maduong’no monego iwuo kuome. Kapo ni omiyi wi twak kende, biro dwarore ni in ema iyier wach monego iwuo kuome. Kata kamano, kapok itimo mano, ibiro yudo ni ber timo nonro. Ka ibedo gi paro man thuolo, kinde duto ibiro yudo weche manyien.

Sama ikawo okengegi, sik kipenjori kama: ‘Ang’o momiyo dwarore ni jowinjo ong’e wechegi? En ang’o ma adwaro chopo gi twagni?’ Gimaduong’ onego obed konyo jowinjo magi, to ok mana tieko wacho gik mosendiki, kata golo mana twak mamit. Sama wach maduong’ midwaro chopo nenoreni maler, ndike piny. Ket wachno e pachi sama idhi nyime gi iko twagno.

Bang’ kiseyango gima idwaro chopo kendo iseyiero wach maduong’ monego iwuo kuome (kata isenono kaka wach maduong’ monego iwuo kuomeno otudore gi gima idwaro chopo), inyalo timo nonro mochomore adimba gi twak. Many weche mabiro chiwo kony sie ne jowinjoni. Kik imany weche mawiye wiye to many weche sie manyalo puonjo kendo konyo gadier. Ng’e ni onego itim nonro maromo nade. Thothne ibiro yudo ni in kod weche mang’eny ahinya, omiyo biro dwarore ni iyier weche mibiro tiyogo.

Ng’e puonj madongo madwarore ni iler tiendgi mondo iger wach monego iwuo kuome kendo ichop gimidwaro e twagno. Puonj madongogo biro ketoni mise mar chano weche machuok matayi. Puonj madongo onego obed adi e twak? Ariyo nyalo romo ka en twak machuok, to ka twak kawo sa achiel, puonj abich nyalo romo. Kaka puonj madongo bedo manok e kaka bedo mayot ne jowinjo mondo opargi.

Bang’ kiseyango e pachi wach maduong’ monego iwuo kuome koda puonj madongo, chan weche miyudo e nonro mitimo. Yier wechego mochomore tir gi puonj madongo. Yier weche moko matindo mabiro miyo twagi obed manyien. Sama iyiero Ndiko masiro puonj madongogo, ng’e weche manie ndikogo mabiro konyi lero tiend ndikogo e yo maber. Ket moro ka moro kuom weche miseyiero e bwo puonj maduong’ mowinjore kode. Kapo ni weche moko ok donj gi puonj madongo miyiero, wegi oko—kata kapo ni gin weche mamit ahinya—kata kan-gi e fail mondo iti kodgi chieng’ machielo. Ti mana gi weche madonjo ahinya gi gima iwacho. Kapo ni itemo lero weche mang’eny ahinya, mano biro chuni rudho wach kendo moni lero weche adimba. Kar mano, ber puonjo weche matin makonyo jowinjo gadier, to itim kamano e yo maber. Kik ikal sa.

Koro, chan wechegi kaka onego giluwre kapo ni pok ne itimo kamano. Luka jandik Injili, notimo kamano. Bang’ choko weche mogundho kuom wich ma ne onono, ne ‘ochanogi kare.’ (Luka 1:3) Kaluwore gi gima idwaro chopo, inyalo chano wecheni kaka ne giluwore, kaka wiye mag puonj luwore, kaka tim moro nyuolo ber kata rach, kata nyiso chandruok moro gi kaka inyalo loye. Ok onego idum apoya wuok e paro moro kidhi e machielo. Onego ita jowinjoni e yo maber kitudo weche adimba mondo giluwre kodi. Weche mitiyogo onego okony jowinjo ofweny adiera gin giwegi. Sama ichano puonj madongogo, par ane kaka twagno biro winjore ne jowinjoni. Be biro bedonegi mayot winjo tiend paro michiwo? Be mano biro miyo giti gi weche ma giwinjogo, kaluwore gi gima idwaro chopo e twak?

Bang’ mano, ik weche michakogo twak gibed weche mamiyo jowinjo siso mar winjo wich miwuoyoe, kendo manyisogi kaka twagno biro konyogi gadier. Ndiko weche moko machuok mibiro chakogo, nyalo konyo. Gikone, chan weche mitiekogo mondo gibed majiwo gima idwaro chopo e twak.

Ka iiko chon weche machuok matayi, ibiro bedo gi kinde moromo mag medo pwodhe kapok ichiwe. Inyalo yudo ni ber siro weche moko kitiyo gi kwan, ranyisi, kata wach moro mosene. Kitiyo gi gima nyocha otimore kata gima jowinjo ong’eyo, mano nyalo miyo gine mapiyo kaka weche twagno nyalo konyogi. Kaka imedo kalo e twagi, e kaka inyalo medo fwenyo yore monyalo donjogo gi chal mar jowinjo. Nono kendo medo pwodho weche twak dwarore ahinya mondo twak obed makonyo.

Moko kuom jogol-twak nyalo dwaro ndiko weche mathoth. Kata kamano, kichano wecheni e bwo puonj manok madongo, kendo kiweyo oko weche maok bi siro puonjgo ahinya, ma ichano wechenigo e yo mawinjore maber, bang’ ndalo, ibiro yudo ni onge tiende ndiko weche duto mag twak. Mano kaka timo kamano biro resoni kinde! E wi mano, twegeni biro medo bedo mabeyo. Biro nenore maler ni tiegruok miyudo e Skul mar Tij Nyasaye konyi gadier.