Tiyo Maber gi Gige Puonjo Manenore

ANG’O momiyo ber tiyo gi gige puonjo manenore sama ipuonjo? Nikech timo kamano nyalo miyo puonj mari okony moloyo. Jehova Nyasaye kaachiel gi Yesu Kristo notiyo gi gige puonjo manenore, wan bende wanyalo puonjore kuomgi. Jiwo gima owach kitiyo gi gige puonjo manenore, miyo wach chopo ne ng’ato e yore ariyo; kuom winjo koda kuom neno. Mano nyalo konyi mako pach jowinjo kendo miyo gimak puonjno moloyo. Ere kaka inyalo tiyo gi gige puonjo manenore sama iwuoyo kuom wach maber? Inyalo timo ang’o mondo ine ni ipuonjo kodgi e yo maber?

Kaka Jopuonj Molony Moloyo Notiyo gi Gige Puonjo Manenore. Jehova nochiwo puonj mabeyo kotiyo gi gige puonjo manenore ma wich ok nyal wilgo. Chieng’ moro gotieno, Jehova noko ne Ibrahim ni owuog oko monyise niya: “Ng’i polo koro, kendo kwan sulwe kinyalo kwanogi. . . . Kamano e kaka kothi nobedi.” (Chak. 15:5) Kata obedo ni kaluwore gi pach dhano gik ma nosingogo ne nenore ni ok nyalre, ne gimulo Ibrahim ahinya ma oketo yie kuom Jehova. E kinde machielo, Jehova nooro Jeremia e od jachwe lowo mondo odonj kuno one kaka ng’atno chweyo lowo. Mano kaka ne en puonj ma wich ok nyal wilgo kuom loch ma Jachwech nigo e wi dhano! (Yer. 18:1-6) Bende, wi Jona ok ne nyal wil gi puonj e wi ng’wono ma Jehova ne opuonje kotiyo gi otangwe. (Jona 4:6-11) Kendo Jehova nonyiso jonabine mondo giti gi gik manenore sama gikoro wach. (1 Ruo. 11:29-32; Yer. 27:1-8; Ezek. 4:1-17) Tabernakel kod hekalu gin ranyisi makonyowa ng’eyo gik matimore e polo. (Hib. 9:9, 23, 24) Nyasaye bende nomiyo ji fweny mang’eny e kowo ote madongo.—Ezek. 1:4-28; 8:2-18; Tich 10:9-16; 16:9, 10; Fwe. 1:1.

Yesu notiyo nade gi gige puonjo manenore? Kane Jo-Farisai kod joma ne luwo Herode temo make gi wach, Yesu nokwayo dinari monyisogi kido mar Kaisar ma ne nie dinarino. Kae to nolero ni gige Kaisar onego omi Kaisar to gige Nyasaye onego omi Nyasaye. (Math. 22:19-21) Mondo opuonj kaka onego wami Nyasaye duong’ gi gigewa duto, Yesu noyango chi liel moro e hekalu ma chiwo mare—hela ariyo—ne en ngimane duto. (Luka 21:1-4) Kinde machielo, notiyo gi nyathi matin mondo opuonjgo bolruok maonge dwaro duong’. (Math. 18:2-6) Bende nonyiso owuon gima bolruok en ka noluoko tiende jopuonjrene.—Joh. 13:14.

Kaka Inyalo Tiyo gi Gige Puonjo Manenore. Mopogore gi Jehova, ok wanyal miyo ji one fweny. Kata kamano, nitie piche mang’eny machiewo paro mayudore e buge mogo gi Joneno mag Jehova. Ti kodgi mondo ikony joma chunygi ohero adiera one picha e pachgi kaka piny Paradis mosingi e Wach Nyasaye biro chalo. Sama ipuonjo ng’ato Muma, inyalo tere e picha moro motudore gi gima upuonjoru kae to ipenje gima oneno. Ber ng’eyo ni kane Jehova miyo janabi Amos fweny moko, nopenje niya: “Amos, ineno ang’o?” (Amos 7:7, 8; 8:1, 2) Inyalo penjo penjo machalo kamano sama inyiso ng’ato piche moket mondo obed gige puonjo manenore.

Bedo gi kuonde ma igoyoe kwan kata chat manyiso kaka gik moko ne otimore kaluwore gi higini, nyalo konyo ji ong’e mapiyo weche ma nokor kaka “higini abiriyo” manie Daniel 4:16 kod “jumbe piero abiriyo” manie Daniel 9:24. Gige puonjo manenore kaka mago yudore e bugewa mathoth mag timo puonjruok.

E Lamo maru mar Joot, wuoyo kuom gik moko kaka tabernakel, hekalu ma ne nitie Jerusalem, kod fweny mar hekalu ma Ezekiel noneno, nyalo bedo mayot lero ka itiyo gi picha kata goro moro. Magi nyalo yudore e bug Insight on the Scriptures, apendiks mar Muma mar New World Translation of the Holy Scriptures—With References, kod e gocho mang’eny mag Ohinga mar Jarito.

Sama isomo Muma kanyachiel gi joodi, ti gi map. Luw ane kaka Ibrahim nowuotho a Ur nyaka Haran ma ochwe olor Bethel. Non ane yo ma Jo-Israel noluwo kane giwuok Misri ka gidhi e Piny Manosingi. Ne ane ka dinwang’ pok mar lowo ma ne omi moro ka moro kuom dhoudi mag Israel. Non ane ni piny ma Suleman ne lochoe ne duong’ maromo nade. Kane Elija ringo koa Jezreel nikech noluoro Jezebel, luw ane yo ma nokawo kokadho Beer-sheba mochopo e thim. (1 Ruo. 18:46–19:4) Nwang’ ane mier kod taonde ma Yesu nolendee. Luw ane wuodhe mag Paulo kaka olergi e bug Tich Joote.

Gige puonjo manenore konyo sama ilero ne japuonjre Muma tije ma kanyakla timo. Inyalo miyo japuonjre program mogo kae to ilerne ni wapuonjore weche machalo nade e chokruogewa mag alwora koda mag distrikt. Ji mang’eny oseyudo mor kuom timo limbe e Od Romo kata e ofis mar Joneno mag Jehova mondo onyisgi gik matimore kuno. Mani nyalo bedo yo maber mar tieko weche maok kare ma ji wacho kuom tijwa koda gima wadwaro chopo. Sama iwuotho kode e Od Romo, nyise pogruok mantie e kind Od Romo gi kuonde mamoko ma ji dhiye lamo. Jiw ni ogere e yo mowinjore maber gi timo puonjruok. Nyise kuonde motudore gi tij lendo—kama ikawoe buge, map mag alwora mar lendo, koda sanduge mag golo chiwo (ma en gima opogore gi sande mag choko pesa mitiyogo kuonde mamoko).

Ka nitie vidio ma Bura Maduong’ ochiwo, ti kodgi e jiwo yie mar japuonjre e Muma, e konyogi ng’eyo tije mag Joneno mag Jehova, kendo e jiwogi gidag kaluwore gi puonj mag Muma.

Tiyo gi Gige Puonjo Manenore e Nyim Ji Buora. Ka oikgi kendo oti kodgi e yo maber, gige puonjo manenore nyalo konyo ahinya e puonjo joma buora. Jatichno mogen kendo mariek chiwo gige puonjo manenore e yore mopogore opogore.

Sula mar puonjruok mayudore e Ohinga mar Jarito pile jabedo gi gige puonjo manenore e yor piche ma jal matayo nyalo tiyogo e jiwo weche madwarore. Buge mitiyogo e Puonjruok Muma e Kanyakla bende gin kamano.

Moko kuom weche machuok matayo twege mag ji duto nyalo miyo ng’ato thuolo mar tiyo gi gige puonjo manenore e lero weche moko. Kata kamano, ng’enyne gima konyo ahinya en jiwo weche mayudore e Muma, ma en e gima thoth jowinjo biro bedo ni nigo e lwetgi. Kapo ni ka dichiel tiyo gi picha kata ndiko weche machuok milerogo puonj madongo dwarore, non chon mondo ibed gadier ni joma obet chien mogik nyalo neno (kata somo) gima itiyogo e puonjo. Onego oti gi gik ma kamago ka dichiel.

Gima wadwaro chopo e tiyo gi gige puonjo manenore sama wawuoyo kata wapuonjo ok en moro ji. Ka gige puonjo ma otigo gin mowinjore, gijiwo paro madwarore ni ojiw e yo makende. Gik ma kamago konyo mana ka oti kodgi e miyo gima owachi onere maler, owinjre mayot, kata tiyo kodgi nikech ginyiso gadier ni gimoro en kamano. Ka oti gi gir puonjo mowinjore, ji nyalo paro gino koda puonj mochiwo kuom higini mang’eny.

Nyalo ma ng’ato nigo mar winjo kod neno, konyo ahinya e miyo opuonjre. Par kaka Jehova gi Yesu osetiyo gi yoregi, kae to item luwo ranyisi margi sama iwuoyo gi jomamoko.