Sula mar Apar Gauchiel

“Herreuru Chutho Ng’ato gi Ng’ato”

1. Ang’o ma kinde mang’eny moro jogo ma eka okwongo biro e chokruoge mag Joneno mag Jehova?

CHIENG’ ma ng’ato okwongo biro e chokruoge mag Joneno mag Jehova, obedo mamor ahinya nikech hera ma oneno ka ji nyiso e chokruogego. Gineno herano kuom yo ma irwakogi godo kod winjruok maber ma nitie kanyo. Welo ma obiro e chokruogewa madongo bende neno herano. Jandik gaset moro ne owacho kama e wi chokruok moro maduong’: ‘Onge ng’at momer kuom tiyo gi yedhe mamero kata kong’o. Onge ng’at magoyo koko kata nduru. Onge ng’at ma dhiro jomoko. Onge ng’at ma soyore gi thuon e kind jomoko. Onge ng’at ma yenyo. Onge ng’at mawacho weche mochido mag ng’era kata wach moro amora mochido. Onge ng’at ma madho ndawa. Onge ng’at makwelo. Onge ng’at mawito okebe ma ji osetiyo godo e lum. Ne en gima podi ok aseneno ka timore.’ Magi duto gin gik manyiso hera, matiende ni hera ma ‘ok tim gima kuodo wich, ma ok dwar mare kende.’​—1 Jo Korintho 13:​4-8.

2. (a) Bang’ kinde, ang’o monego onere e hera ma wanyiso? (b) Ka waluwo ranyisi mar Kristo, onego wabed gi hera machalo nade?

² Hera mar owete e kido ma ing’eyo godo Jokristo madier. (Johana 13:35) Kaka wamedo dongo e Wach Nyasaye, e kaka wamedo nyiso hera ahinya. Jaote Paulo ne olamo ni hera mar Jokristo wetene mondo “omedre mathoth ahinya.” (Jo Filipi 1:9) Jaote Johana ne onyiso ni herawa onego obed hera ma ng’ato chiwore. Ne ondiko ni: “Ma e mwaseng’eyogo hera, nikech [Wuod Nyasaye] noweyo ngimane nikech wan; to wan bende onego wawe ngimawa nikech owete.” (1 Johana 3:​16; Johana 15:12, 13) Be kuom adier wanyalo chiwo ngimawa nikech owete? Kata obedo ni kinde mang’eny ok wahiny romo gi gik madwaro ni mondo watim kamano, waikore timo kinda e okang’ maromo nade mondo omi wakony owetewa sani, kata kapo ni timo kamano waneno ni tek?

3. (a) Wanyalo medo nyiso herawa e yo mane? (b) Ang’o momiyo en gima dwarore ahinya ni waherre chutho ng’ato gi ng’ato?

³ Seche ma wanyiso chuny mar chiwruok, dwarore bende mondo wabed gi chuny manyiso ni wamor chuth gi owetewa. Wach Nyasaye jiwowa kama: “Herreuru ng’ato gi ng’ato kaka owete.” (Jo Rumi 12:10) Waduto wan gi chuny mawinjo kamano ne jomoko. Kata kamano, be wanyalo temo mondo omi wanyis herano ne joma moko bende? Kaka giko mar piny machonni medo kayo machiegni, en gima dwarore ahinya ni wamed sudo machiegni gi Jokristo wetewa. Muma wacho ni: “Giko mar gik moko duto chiegni. . . . To moloyo duto herreuru chutho ng’ato gi ng’ato, nikech hera umo richo mang’eny.”​—1 Petro 4:​7, 8.

E Kinde ma Chwanyruok Oneno

4. (a) Ang’o momiyo chwanyruok nyalo bedoe e kind ji ei kanyakla? (b) Kata obedo ni wanyalo neno matek timo kaka Muma wacho, en ber mane manyalo bedoe kuom tiyo gi paro ma Muma chiwo?

⁴ Onge kiawa ni, tek ni wan joma nyalo both, nitie kinde ma wabiro timo gik ma ok mor jomoko. Owetewa bende nyalo timonwa richo e yore mopogore opogore. (1 Johana 1:8) Ka gima kamano otimoreni, ang’o minyalo timo? Ndiko chiwo paro mowinjore e wi gima onego otim. Kata kamano, paro ma Ndiko chiwo nyalo bedo mopogore gi gima wan kaka dhano ma joricho wanyalo gombo timo. (Jo Rumi 7:​21-​23) Ka watimo kinda e tiyo gi paro ma Muma chiwo, mano biro nyiso ni kuom adier gombo ma wan-go en mar moro Jehova. Timo kamano bende biro medo jiwo hera ma wan-go kuom jomoko.

5. Ka ng’ato ochwanyowa, ang’o momiyo ok onego wachul kuor?

⁵ Seche ma ji neno ni ochwanygi, kinde moko gitemo manyo yore ma ginyalo chulogo kuor ne ng’at ma ochwanyogino. Kata kamano, timo kamano medo mana ketho winjruok. Ka chulo kuor dwarore, onego wawe mano ne Nyasaye. (Ngeche 24:29; Jo Rumi 12:17-​21) Jomoko nyalo temo mondo kik gibed machiegni gi ng’at ma ochwanyogino. Kata kamano, ok onego watim kamano ne Jokristo wetewa, nikech achiel kuom gik madwarore mondo omi Nyasaye oyie gi lamo marwa en hero owetewa. (1 Johana 4:​20) Kuom mano, Paulo ne ondiko kama: “Ng’wonreuru, kendo weyoreuru richo ng’ato gi ng’ato, ka ng’ato ni gi wach kod wadgi. Kaka Ruoth noweyonu richou, un bende onego utim kamano.” (Jo Kolosai 3:​13) Be inyalo timo kamano?

6. (a) Onego wawe ne owadwa ma okethonwa, nyadidi? (b) Ang’o ma onego wang’e kuomwa wawegi mabiro konyowa timo kaka dwarore kapo ni otimnwa richo?

⁶ To nade ka ng’ato otimonwa richo nyadinwoya to ok otim ketho moro maduong’ moromo miyo ogole ei kanyakla? Kuom ketho matindo kaka mago, jaote Petro ne ochiwo paro ni onego wawe ne ng’ato “nyaka ndalo abiriyo.” Kata kamano, Yesu to nowacho ni: “Ok mana nyaka ndalo abiriyo, to nyaka piero abiriyo ndalo abiriyo.” Ne onyiso kaka gowi ma wan-go kuom Nyasaye duong’ moloyo ka opim gi gopwa ma dhano moro amora nyalo bedogo. (Mathayo 18:21-​35) Waketho ne Nyasaye e yore mang’eny pile​—seche moko watimo kamano gi tim moro mar guondo, gi gik ma wawacho kata paro, kata kuom weyo ma ok watimo gima onego watim​—to kindego ok wafweny kata ni waketho. (Jo Rumi 3:​23) To ema podi Nyasaye medo nyisowa ng’wono. (Zaburi 103:10-​14; 130:​3, 4) Odwaro ni wan bende wanyisre ng’wono ng’ato gi ng’ato. (Mathayo 6:​14, 15; Jo Efeso 4:​1-3) Ka watimo kamano to wabiro bedo joma nyiso hera ma “ok dew gi marach motimne.”​—1 Jo Korintho 13:​4, 5; 1 Petro 3:​8, 9.

7. Ang’o ma onego watim ka owadwa moro nigi wach moro ma chwanye kodwa?

⁷ Nitie seche moko ma wanyalo fwenyo ni, kata obedo ni ok wamako sadha ne owadwa moro, en owuon en kod wach ma chwanye kodwa. Wanyalo yiero mondo ‘waum wachno gi hera,’ mana kaka 1 Petro 4:8 wacho. Kata wanyalo kawo okang’ mokwongo mar wuoyo kode mondo omi wadwok winjruok maber e kindwa kode.​—Mathayo 5:​23, 24.

8. Ka Jakristo wadwa timo gimoro ma chwanyowa, ang’o ma wanyalo timo?

⁸ Nyalo bedo ni Jakristo wadwa moro timo gimoro ma ok chwany mana wan kende, to kata joma moko bende. Donge nyalo bedo gima ber kiwuoyo kode? Ee, nyalo bedo. Ka in iwuon ihulone wachno e yo mang’won, mani nyalo kelo ber moro. Kata kamano, mokwongo onego ipenjri kama: ‘Be otimo gimoro ma ok owinjore gi Ndiko? Koso chwanyruok bedoe mana nikech kama ne aponie kod puonj ma ne ayudo opogore gi mare?’ Bed motang’ mondo kik iket chikeni iwuon, kendo ni chikego ema ing’adonego jomoko bura. (Jakobo 4:​11, 12) Jehova rwako joma wuok e ngima mopogore opogore, kendo onano kodgi kaka gimedo dongo e Wachne.

9. (a) Gin jo mage ma kawo okang’ ka ng’ato otimo richo moro maduong’ ei kanyakla? (b) Ng’at ma otimne richo bedo gi ting mar kawo okang’ en owuon e kinde mage, to onego otim kamano gi paro mane?

⁹ Ka ng’ato ei kanyakla otimo ketho moro maduong’ kaka mar chode, kawo okang’ mapiyo en gima dwarore. Gin jo mage monego okaw okang’no? Gin jodong kanyakla. (Jakobo 5:​14, 15) Kata kamano, ka en richo ma otimre e kind ji ariyo, nyalo bedo ni en wach ma korka ohala kata wach tiyo gi lep e yo marach, ng’at ma otimne richono onego otem mokwongo mondo odhi ir jal ma okethoneno mondo owuo kode ka gin kendgi ji ariyo. (Mathayo 18:15) Ka timo kamano podi ok tiek wachno, nitie okang’ mamoko ma dwarore ni mondo okaw mana kaka onyisi e Mathayo 18:16, 17. Hera ma wahero godo owadwa ma chako bayo yo kod gombo ma wan-go mar ‘yude’ biro konyowa mondo watim mano e yo ma mulo chunye.​—Ngeche 16:23.

10. Ka chandruok moro oneno, ang’o mabiro konyowa mondo wabed gi paro mowinjore e wi wachno?

¹⁰ Ka chandruok moro oneno, obed maduong’ kata matin, gima biro konyowa en temo paro ni Jehova to neno wachno nade. Ok oyie gi richo ma ji timo e yo moro amora, kuom mano, e kinde ma en owuon oyiero, jogo ma siko ka timo richo madongo igolo e riwruok mar oganda mare. Kata kamano, kik wiwa wil ni waduto watimo richo e yore mang’eny matindo tindo, kendo ni dwarore mondo onyiswa horruok kod ng’wono mar Nyasaye. Kuom mano, Jehova ketonwa ranyisi monego waluw sama ng’ato otimonwa richo. Sama wanyiso ng’wono, mano wanyiso kit hera mare.​—Jo Efeso 5:​1, 2.

Wamany Yore mag ‘Yawo’ Hera Marwa

11. Ang’o momiyo Paulo ne ojiwo Jo-Korintho mondo ‘giyawre’ e nyiso hera?

¹¹ Paulo ne okawo dweche mang’eny ka ogero kanyakla mar Korintho e piny Grik. Ne otiyo matek mondo okony owete ma ne ni kuno, kendo ne oherogi. Kata kamano, jomoko kuomgi ne ok nyise hera. Ne giwuoyo kuome marach ahinya. Ne ojiwogi ni ‘giyawre’ e nyiso hera margi. (2 Jo Korintho 6:​11-​13; 12:15) Waduto dwarore wanon ane ni to wanyiso hera ne jomoko e okang’ maromo nade, kendo wamany yore mag yawo hera marwa.​—1 Johana 3:​14.

12. Ere kaka wanyalo medo hera marwa kuom ji duto ei kanyakla?

¹² Be nitie jomoko ei kanyakla ma waneno ni tek sudogo machiegni? Ka watimo kinda mar umo chwanyruok moro amora manyalo bedoe e kindwa gi jomoko​—mana kaka dwaher ni mondo gitimnwa​—mani nyalo konyo e kelo winjruok maber e kindwa kodgi. Yo ma wanenogi godo bende nyalo medo bedo maber ka waketo e pachwa kido mabeyo ma ginyiso. Kuom adier, timo kamano biro miyo herawa kuomgi omedre.​—Luka 6:​32, 33, 36.

13. Ere kaka wanyalo yawo herawa ne jogo manie kanyakla marwa?

¹³ En adier ni nitie tong’ ma ok wanyal kalo kuom gik ma wanyalo timo ne jomoko. Nyalo bedo ni ok yot mondo wamos ji duto e chokruok ka chokruok. Sama wagwelo osiepe mondo obi e gago moro, nyalo bedo matek luongo ji duto. Kata kamano, donge wanyalo kawo dakika manok mondo omi wang’ere gi ng’ato e yo maber ei kanyakla marwa? Be kuom kinde ka kinde, wanyalo kawo thuolo mondo wagwel ng’ato ma ok wang’erego maber mondo obed kodwa e tij lendo?

14. Seche ma wan e kind Jokristo ma pok ne waromogo, ere kaka wanyalo nyiso hera matut e kindwa ng’ato gi ng’ato?

¹⁴ Chokruoge madongo mag Jokristo chiwonwa thuolo mabeyo mag yawruok e nyiso hera marwa. Ji gana mang’eny nyalo bedoe. Ok wanyal romo kod ji duto, kata kamano, wanyalo timo gik moko e yo manyiso ni waketo gik manyalo konyogi motelo ne magwa. Seche mag yueyo ka pok wadok e program, wanyalo nyiso ni waparo jomoko ka wakawo okang’ mokwongo mar wuoyo gi jogo man machiegni kodwa. Ndalo biro, ma jogo duto modak e piny nobed owete kod nyimine, ka giriwore e lamo achiel mar Nyasaye madier ma en Wuon ji duto. Mano kaka yudo thuolo mar ng’eruok ng’ato gi ng’ato nobed gima kelo mor! Bedo gi hera matut ema biro jiwowa mondo watim kamano. Donge ber mondo ichak timo kamano sani?

Be Inyalo Paro?

• Ka chwanyruok oneno e kind Jokristo, ere kaka onego gilos wachno, to nikech ang’o?

• Kaka wamedo dongo e Wach Nyasaye, hera marwa bende onego omed dongo e yore mage?

• Ere kaka wanyalo nyiso hera matut ne ji duto ma ok mana osiepe man machiegni kodwa ahinya kende?

[Picha manie ite mar 148]

Hera mar Jokristo inyiso e yore mang’eny, kaka e chokruoge mag kanyakla