Chandruok Duto Chiegni Rumo!

Nyalo bedo ni isepenjori e ngimani ni, ‘Ang’o ma omiyo nitie chandruok mang’eny ahinya?’ Kuom higini mang’eny, dhano osechandore ahinya nikech lwenje, dhier, masiche, mahundu, timbe ma ok ratiro, tuoche, koda tho. Kuom higini mia achiel mosekalo, dhano oseneno chandruok mang’eny maloyo kinde moko duto. Be chandruogegi duto norum?

Gibiro rumo machiegni ahinya, kendo ma en wach ma hoyo chuny! Muma ma en Wach Nyasaye, wacho kama: “Ng’a marach obiro onge . . . To jo mamuol ginicham piny, kendo ginimor moloyo kuom kwe mang’eny.” Ginidag kuom kinde maromo nade? “Jo matir ginicham piny, mi ginidagie nyaka chieng’.”—Zaburi 37:10, 11, 29.

Bang’ ka Nyasaye osegolo richo kod chandruok, piny ibiro lok mondo obed paradis. Kendo dhano biro dak gi mor nyaka chieng’ maonge tuo moro amora. Wach Nyasaye koro kama: “Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie.”—Fweny 21:4.

E piny manyien no, ibiro chiero kata jogo mane osetho mondo gin bende giyud gwethgo: “Nobedie chier mar jo makare kod jo ma ok kare.” (Tich Joote 24:15) Mano ema omiyo Yesu Kristo ne nyalo nyiso jaricho mane olokore moyie kuome niya: “Inibed koda e Paradis.”—Luka 23:43.

Ang’o Momiyo Chandruok Nochakore?

Ka Nyasaye ne dwaro ni dhano obed gi ngima maber ahinya e kinde mabiro, ang’o momiyo ne oweyo chandruok mondo ochakre? Kendo ang’o momiyo oseweyo chandruok mondo odhi nyime kuom higini mang’eny?

Nyasaye ne ochweyo Adam gi Hawa ka gin joma tir. Ne oketogi e puodho mar paradis, kendo ne omiyogi tich maber ma kelo mor. Muma wacho ni: ‘Nyasaye noneno gik moko duto ma nosechweyo, kendo ne oneno kaber ahinya.’ (Chakruok 1:31) Ka dine giwinjo chik Nyasaye, ne diginyuolo nyithindo makare, kendo piny mangima ne dobedo paradis, kama dhano dakie nyaka chieng’ gi kwe koda mor.

Nyasaye ne ochweyo Adam gi Hawa gi mich maber ahinya, tiende ni bedo gi thuolo mar tiyo gi pachgi giwegi. Mano e kaka ochue dhano duto. Ne ok ochueyogi mondo gibed kaka masinde ma onge gi paro. Kata kamano, mondo gimed bedo mamor, ne onego giti kod thuolo mane omigino e yo makare—ka giwinjo chike Nyasaye. En mana kaka Nyasaye wacho: “An Jehova Nyasachi, mapuonji mondo iyud konyruok, mateloni e yo madidhie.” (Isaiah 48:17) Tiyo marach gi thuolo mane omigino, ne dhi kelo masira nikech ne ok ochue dhano mondo odagi maber ka ok Nyasaye otelonegi. Muma wacho kama: “Dhano ok nyal chweyo chunye owuon, dhano onge gi teko yiero yore mowuothoe.” —Yeremia 10:23.

Gima rach mane otimore en ni, jonyuolwa mokwongo ne paro ni ne ginyalo bedo gi ngima maber kata ka ok giluwo chike Nyasaye. Ka ne gitamore loch mar Nyasaye, Nyasaye ne ok oweyogi mondo gidhi nyime gi ngima makare mane omiyogi. Omiyo dendgi ne ochako kethore ma gikone, ne giti ma githo. Nikech wan nyithindgi, onyuolwa e kido kaka margi mar richo gi tho.—Jo Rumi 5:12.

Wach Maduong’ Ne En—Wach Loch

Ang’o momiyo Nyasaye ne ok oketho Adam gi Hawa mondo ochue dhano mamoko ariyo kendo? En nikech ne okwed loch mar Nyasaye e wi gik moko duto, matiende ni ne okwed ni ok onego obed jaloch. Penjo mane wuok ne en mae, En ng’ano monego bed gi loch e wi gik moko duto, kendo loch makare en mar ng’a? To e wi mano, Be dhano ne nyalo bedo gi ngima maber ka Nyasaye ok otelonegi? Nyasaye ne omiyo dhano thuolo moromo mar timo kaka gidwaro, eka mondo onyis dichiel, ka be dhano ne nyalo bedo gi ngima maber e loch margi giwegi, koso e bwo loch mar Nyasaye. Nyasaye ne dhi chiwo thuolo moromo mondo dhano otem yore duto kaka mag siasa, mag riwruok, mag ohala, koda mag din ka Nyasaye ok otelonegi.

Giko mar wachno osebedo ang’o? Higini mang’eny ma dhano osebedogo e piny, nyiso maler ni dhano osebedo gi chandruok mang’eny kendo mamedore ahinya. Higini mia achiel mosekalo ema dhano oseneno chandruok maricho ma podi ne ok otimore nyaka nene. Ji mang’eny ahinya ne onegi e Lweny Mar Ariyo mar piny. Osenegi ji ma okalo milion 100 e lwenje. Timbe mag mahundu koda gero osebedo mang’eny ahinya e piny. Tiyo gi yedhe mamero ji oselandore ahinya. Ji mang’eny medo yudo tuoche mag nyae. Kech koda tuoche medo nego ji tara gi tara. Ngima joot kod timbe mabeyo osekethore kuonde duto. Onge sirkal mar dhano ma nyalo tieko chandruogegi. Onge kata achiel kuom sirkandego ma osetieko tiyo, tuoche, koda tho.

Ngima dhano sani osebedo mana kaka Muma ne okoro ni nobed e kindewa. Wach Nyasaye nyiso maler ni ndalo ma wadakiegi, gin ‘ndalo mag giko’ kendo gin ‘kinde ma chandruok nobedie.’ To mana kaka Muma ne osewacho, ‘jo maricho gi joma wuondore medo bedo maricho moloyo.’—2 Timotheo 3:1-5, 13.

Chandruok Chiegni Rumo

Gik moko duto matimore nyiso maler ni, giko ngima marach ma dhano osetemo dak ka Nyasaye ok otelonegi chiegni. Osenenore maler ni loch mar dhano ka ok otelne gi Nyasaye ok nyal kelo ngima maber. Loch mar Nyasaye kende e manyalo kelo kwe, mor, ngima maonge tuoche, kod ngima ma nyaka chieng’. Omiyo kinde ma Jehova oseweyogo richo kod chandruok mondo odhi nyime, chiegni rumo. Nyasaye chiegni ketho chenro duto mag dhano nikech ok gitim ne dhano kaka dwaro.

Muma koro kama: “E ndalo ma ruodhigo nobedie, [sirkande ma locho sani] Nyasaye manie polo nochung piny ruoth moro [e polo] ma ok norum nyaka chieng’, . . . enong’iny pinje ruodhigi duto, mi notiekgi [sirkande ma locho sani], kendo nobedie nyaka chieng’.” (Daniel 2:44) Puonj maduong’ e Muma en mae: Loch mar Jehova en loch makare, kendo Nyasaye ema ni kod ratiro mar locho, kokalo kuom Pinyruodhe mar polo. Kane okoro achiel kuom ranyisi madongo mag “ndalo mag giko” Yesu ne owacho kama: “Kendo Wach Maberni mar pinyruoth nolandre e pinje duto, mondo obed ranyis ni ogendini duto; eka giko nobi.” —Mathayo 24:14.

Ka giko obiro, jo mage mabiro kwo? Muma chiwo duoko: “Jo matir nodag e piny, kendo jo makare nodong’ie. Kendo nogol jo maricho oko e piny.” (Ngeche 2:21, 22) Jo matir gin jogo ma puonjore dwaro mar Jehova kendo timo kaluwore gi dwarono. Yesu Kristo ne owacho kama: “Mani e ngima mochwere, ni ging’eyi, in Nyasaye makende maradier, kod jal ma nioro, Yesu Kristo.” (Johana 17:3) Ee, “piny kadho . . . , to ng’a ma timo gi ma Nyasaye dwaro osiko nyaka chieng’.”—1 Johana 2:17.

Ndiko mag Muma motigo kae, ogol e The Bible in Luo (1968) mak mana ka onyisi e yo machielo.