Chieng’ Bura—En Ang’o?

ANG’O mabiro e pachi seche ma ji wuoyo e wi Chieng’ Bura? Ji mang’eny paro ni tara gi tara mag ji biro chung’ ng’ato ka ng’ato e nyim kom-duong’ mar Nyasaye. E nyime kanyo, giwacho ni ibiro ng’ad bura ni ng’ato ka ng’ato. Ni jomoko biro yudo ngima mar paradis e polo, to jomoko ibiro miyo kum mar sand ma ok rum. Kata kamano, Muma to miyowa paro mopogore ahinya kuom gima biro timore e kindeno. Wach Nyasaye wuoyo kuom kindeno kaka kinde mar geno gik mabeyo, kod loso gik moko obed manyien, to ok kinde ma opong’ gi gik makelo luoro.

E Fweny 20:11, 12, wasomo gima jaote Johana ne ondiko e wi Chieng’ Bura: “Eka naneno kom duong’ mang’ongo marachar, kod Jal mobetie; piny gi polo noringo oa e wang’e, mi ne ok giyudore kendo. To naneno jo motho, jo madongo gi jo matindo, kochung’ e nyim kom duong’; kendo noel kitepe. Kitabu machielo bende noel, ma en kitap ngima. Jo motho nong’adnigi bura gi gik ma ne gitimo, mondiki e kitepego.” Jang’ad Bura ma iwuoyo kuome kae, en ng’a?

Jehova Nyasaye e Jang’ad Bura maduong’. Kata kamano, oketo tij ng’ado bura e lwet ng’at machielo. Kaluwore gi Tich Joote 17:31, jaote Paulo ne owacho ni, Nyasaye “oseketo chieng’ ma jalo moseyiero nong’adie ni piny bura makare.” Jang’ad Bura ma oseketni en Yesu Kristo ma ne ochier. (Johana 5:22) Kata kamano, Chieng’ Bura chakore karang’o? To okawo kinde maromo nade?

Buk mar Fweny nyiso ni Chieng’ Bura chakore bang’ lweny mar Har-Magedon, kinde ma loch Satan e piny ibiro kethi.a (Fweny 16:14, 16; 19:19–20:3) Bang’ Har-Magedon, Satan kod jochiende mage ibiro tweyo e bur matut kuom higini gana achiel. E kinde mag higini gana achielgo, ji 144,000 ma dhi e polo, biro bedo jong’ad bura, kendo gibiro ‘locho gi Kristo kuom higini gana achiel.’ (Fweny 14:1-3; 20:1-4; Jo-Rumi 8:17) Chieng’ Bura ok en mana gima timore mapiyo piyo e odiechieng’ achiel. En gima kawo higini gana achiel.

E kinde mag higini gana achielgo, Yesu Kristo biro “ng’ado bura ni jo mangima gi jo motho.” (2 Timotheo 4:1) “Jo mangima” nobed “oganda mang’ongo” ma biro tony e lweny mar Har-Magedon. (Fweny 7:9-17) Jaote Johana bende ne oneno ‘jo motho . . . kochung’ e nyim kom-duong’’ mar bura. To mana kaka Yesu ne osingo, “ji duto manie liete nowinj dwonde [dwond Kristo], kendo giniwuog oko” kokalo kuom chier. (Johana 5:28, 29; Tich Joote 24:15) Kata kamano, ibiro ng’ad ni ji duto bura kaluwore kod ang’o?

Kaluwore kod fweny ma ne jaote Johana oyudo, “noel kitepe,” kendo “jo motho nong’adnigi bura gi gik ma ne gitimo, mondiki e kitepego.” Be ei kitepegi ondikie gik ma ji ne otimo chon? Ooyo, bura ok bi ng’adi kaluwore kod gik ma ji ne otimo ka pok githo. Ere kaka wang’eyo mano? Muma wacho ni: “Ng’at mosetho osegonye oa e richo.” (Jo-Rumi 6:7) Kuom mano, jo michiero nochak ngima manyien ka richogi duto machon osewenigi. Kitepego kare nyaka bed ni ochung’ne chike mamoko mag Nyasaye ma ibiro medi. Mondo gidag nyaka chieng’, jo mabiro tony e Har-Magedon, kod joma ibiro chiero, ibiro dwaro mondo giluw chike Nyasaye, kaachiel kod dwaro moro amora ma Jehova biro elo e kinde mag higini gana achielgo. Kuom mano, ibiro ng’ad ni ng’ato ka ng’ato bura kaluwore gi gima gitimo e kinde mag Chieng’ Bura.

Chieng’ Bura biro miyo ji tara gi tara thuolo margi mokwongo mar puonjruok dwach Nyasaye, kendo mar dak kaluwore gi dwarone. Mani nyiso ni, chenro malach mar tij puonjo ji biro betie. Kuom adier, ‘jo modak e piny ginipuonjre tim makare.’ (Isaiah 26:9) Kata kamano, ok ji duto ma biro yie dak kaluwore gi dwach Nyasaye. Isaiah 26:10 wacho ni: “Kata igoso ng’a marach, to ok nopuonjre tim makare; notim marach e piny mobet kare, kendo odagi yie duong’ mar Jehova.” Jo marichogi ibiro negi chuth e kinde mag Chieng’ Bura.—Isaiah 65:20.

Kochopo giko mar Chieng’ Bura, dhano mabiro dong’ ‘nodok mangima’ chuth ma gibed dhano makare maonge richo moro amora. (Fweny 20:5) Kuom mano, Chieng’ Bura biro dwoko ne dhano ngima makare chuth ma ne en-go kar chakruok. (1 Jo Korintho 15:24-28) Bang’e, tem mogik biro timore. Ibiro gony Satan ka ma otweye, kendo ibiro yiene mondo otem wuondo dhano dichiel mogik. (Fweny 20:3, 7-10) Jogo ma okwede biro neno kaka wach ma ne ondiki ei Muma chopo kare chuth niya: “Jo matir ginicham piny, mi ginidagie nyaka chieng’.” (Zaburi 37:29) Ee, Chieng’ Bura nobed gweth ni dhano duto makare!