DWOKO PENJO MAG MUMA
Chieng’ Bura en ang’o?
Ang’o momiyo chieng’ bura nobed kinde maber?
E ndalo ma ne indikoe Muma, Nyasaye ne tiyo gi jong’ad-bura mondo ores joge e lwet joma ne timonegi gik ma ok kare. (Jobura 2:18) Muma lero ni Chieng’ Bura ma biro nobed kinde maber ma Jehova, Jang’ad-Bura e piny duto nores dhano kuom timbe ma ok kare manie piny.—Som Zaburi 96:12, 13; Isaiah 26:9.
Nyasaye oseketo Yesu mondo obed jang’ad-bura mar joma ngima kod jomotho. (Tich Joote10:42; 17:31) Nitie ji mang’eny mosetho ka pok ging’eyo Nyasaye. E Chieng’ Bura, Yesu biro chiero joma kamago mondo gibi giyud thuolo mar ng’eyo Nyasaye madier kendo here.—Som Tich Joote 24:15.
Ang’o momiyo Chieng’ Bura biro kawo higni aluf achiel?
Ibiro chier jomotho e kinde mag higni aluf achielgo. (Fweny 20:4, 12) Biro dwarore ni omigi thuolo mar puonjore yore mag Nyasaye kendo luwogi. Ji mang’eny paroga ni ibiro ng’adne jogo bura kaluwore gi gik ma ne gitimo chon. Kata kamano, Muma to nyiso ni ibiro ng’adnegi bura kaluwore gi gik ma ne gitimo bang’ kosechiergi.—Som Jo-Rumi 6:7.
Muma wuoyo bende kuom chieng’ bura moro ma biro timore mapiyo, kapok higni aluf achiel ochakore. Chieng’no bende iluongo ni giko, ma ae wasenono e wach maduong’ ma gasedni wuoyoe. E chieng’no, Nyasaye biro tieko ji duto ma timbegi richo kendo ma ok oluore. (2 Petro 3:7) Omiyo, onego watim kinda mondo wanyis ni wahero Nyasaye.—Som 2 Petro 3:9, 13.