DWOKO PENJO MAG MUMA

Nyasaye en ng’ama chalo nade?

Nyasaye nigi del mar roho ma wang’ dhano ok nyal neno. Ne ochweyo polo, piny, kod gik moko mangima duto. Onge ng’ama ne ochweyo Nyasaye, tiende ni oonge chakruokne. (Zaburi 90:2) Nyasaye dwaro mondo ji omanye kendo ong’e adiera e wiye.—Som Tich Joote 17:24-27.

Nyasaye en ng’ama nitie kendo wanyalo ng’eye gi nyinge. Wanyalo ng’eyo moko kuom kido ma en-go kuom ng’iyo gik ma nochweyo kendo paro matut kuomgi. (Jo Rumi 1:20) Kata kamano, mondo wang’e Nyasaye e yo maber chuth, nyaka wapuonjre Wachne ma en Muma. Muma leronwa kido mabeyo ma Nyasaye nigo.—Som Zaburi 103:7-10.

Nyasaye winjo nade koneno ka dhano chandore?

Jehova Jachwechwa osin gi timbe maok kare kendo ok omor neno ka dhano chandore. Ne ochweyo dhano gi kite owuon. (Rapar mar Chik 25:16) Mano e gimomiyo thothwa osin gi timbe maok kare. Nyasaye ok ema kel gik maricho ma timore e piny. Nyasaye nomiyo dhano nyalo mar yiero gima gidwaro timo. Gima lit en ni thoth ji tiyo marach gi mich ma Nyasaye nomiyogino kendo gitimo timbe maok kare. Sama gitimo gigo, chuny Jehova chande.—Som Chakruok 6:5, 6; Rapar mar Chik 32:4, 5.

Jehova ohero timbe makare kendo ok nowe timbe maok kare odhi nyime nyaka chieng’. (Zaburi 37:28, 29) Muma singonwa ni kinde mokayo machiegnini, Nyasaye biro tieko timbe maok kare duto.—Som 2 Petro 3:7-9, 13.