Barua Mowuok Kuom Bura Maduong’

Ne In Mihero Jehova:

Yesu nowacho ni “unung’e adiera, kendo adiera nomiu bedo thuolo.” (Johana 8:32) Mano kaka wechego gin majipo! Ee, wanyalo ng’eyo adiera, kata e kinde mag chandruokgi e “ndalo mag giko” ma puonj mag miriambo ng’eny. (2 Timotheo 3:1) Be inyalo paroe odiechieng’ ma ne ikwongo fwenyo adiera kaka olere e Wach Nyasaye? Mano ne en mor manade!

Kata kamano, kata obedo ni ng’eyo adiera e yo makare kendo wuoyo gi jomoko pile kuom adierano en gima duong’, bende onego wabed gi timbe mowinjore gi adierano. Mondo watim mano, onego waritre e hera mar Nyasaye. Mani oriwo ang’o? Weche ma Yesu ne owacho e otieno ma ne otelo ne odiechieng’ ma ne othoe dwoko penjoni. Ne owacho ni jootene ma ne ochung’ motegno kama: “Kumako chikna, unusik e herana, kaka an bende amako chik Wuora, kendo asiko e herane.”​—Johana 15:10.

Ne ni Yesu ne osiko e hera mar Nyasaye kuom mako chik Wuon mare. Mano bende dwarore kuomwa kindegi. Mondo wasik e hera mar Nyasaye, dwarore ni wati gi adiera e ngimawa mapile. E odhiambono, Yesu bende nowacho kama: “Kung’eyo magi, un jo moguedhi kutimogi.”​—Johana 13:17.

Wageno gadier ni bugni biro konyi dhi nyime tiyo gi adiera e ngimani mondo omi iritri ‘e hera mar Nyasaye . . . nyaka ichopi e ngima ma nyaka chieng’.’​—Juda 21.