Be Ing’eyo Nyasaye?

1. Ang’o momiyo onego walam Nyasaye?

Nyasaye madier en Jachuech gik moko duto. Ne oonge chakruok kendo ok nobed gi giko. (Zaburi 90:2) En e Soko mar wach maber ma yudore e i Muma. (1 Timotheo 1:11) Nikech Nyasaye omiyowa ngima, en kende e ma onego walame.​—Som Fweny 4:11.

2. Nyasaye chalo nade?

Onge dhano moseneno Nyasaye nikech en Roho, tiende ni en e kit ngima ma malo moloyo chuech modak e pinyka. (Johana 1:18; 4:24) Kata kamano, wanyalo ng’eyo kido mag Nyasaye kokalo kuom gik mochueyo. Kuom ranyisi, kit olembe kod maua mopogore opogore nyisowa hera kod rieko ma en-go. Duong’ mar kor lwasi nyisowa teko ma en-go.​—Som Jo-Rumi 1:20.

Wanyalo puonjore gik mang’eny e wi kido mag Nyasaye ka wasomo Muma. Kuom ranyisi, Muma nyisowa gik ma Nyasaye ohero kod gik ma ok ohero, kaka otimo ne ji, kod kaka otimo gik moko e chal mopogore opogore.​—Som Zaburi 103:7-10.

3. Be Nyasaye nigi nyinge?

Yesu nowacho niya: “Wuonwa manie polo, nyingi mondo obed maler.” (Mathayo 6:9) Kata obedo ni Nyasaye nigi nyinge mang’eny mag telo, en mana gi nying achiel. Dhok duto luongo nyingno e yore mopogore opogore. E dho Ingresa iluongo nyingno ni “Jehovah.” Kata kamano, jomoko to luongo nyingno ni “Yahweh.”​—Som Zaburi 83:18.

Osegol nying Nyasaye e loko mang’eny mag Muma, kendo kar nyingno oket nyinge mag telo kaka Ruoth kata Nyasaye. Kata kamano, ka ne indiko Muma, ne oti gi nying Nyasaye nyadi 7,000. Yesu ne olando nyingno ka ne opuonjo ji e wi Nyasaye.​—Som Johana 17:26.

Ne vidioni: Be Nyasaye Nigi Nyinge?

4. Be Jehova dewowa?

Be bedo ni chandruok ng’eny e piny nyiso ni Nyasaye ok dewwa? Jomoko wacho ni Nyasaye sandowa mondo otemwa, to mano ok en adier.​—Som Jakobo 1:13.

Nyasaye ne ochueyo dhano gi nyalo mar yiero gik ma gidwaro timo giwegi. Donge wamor ni wan gi thuolo mar yiero tiyo ne Nyasaye? (Joshua 24:15) Kata kamano, ji mang’eny yiero mar timo gik maricho ne jowetegi, to mano miyo chandruok ng’eny e piny. Jehova winjo lit koneno gik ma ok karego.​—Som Chakruok 6:5, 6.

Jehova en Nyasaye ma dewowa. Odwaro ni wabed ma mor. Matin nono, obiro tieko chandruok chuth kaachiel gi jogo ma kelo chandruok. Gie sani, nitie gimomiyo oweyo chandruok mondo obedie kuom kinde. Wabiro puonjore mano e Somo mar 8.​—Som 2 Petro 2:9; 3:7, 13.

5. Wanyalo timo ang’o mondo wasud machiegni gi Nyasaye?

Jehova gwelowa wasud machiegni kode kokalo kuom lamo. Ohero ng’ato ka ng’ato kuomwa. (Zaburi 65:2; 145:18) Oikore ng’wononwa. Omor gi kinda ma waketo mondo watine kata obedo ni kinde moko watimo gik ma ok more. Omiyo kata obedo ni wan joma orem, wanyalo bedo gi winjruok machiegni kode gadier.​—Som Zaburi 103:12-14; Jakobo 4:8.

Nikech Jehova omiyowa ngima, onego wahere moloyo kaka wahero ng’ato ang’ata. (Mariko 12:30) Kaka idhi nyime nyiso ni ihero Nyasaye kuom puonjori weche momedore e wiye kendo timo kaka odwaro, e kaka ibiro medo sudo machiegni kode.​—Som 1 Timotheo 2:4; 1 Johana 5:3.