SOMO MAR 6

Be Jomotho Chieng’ Nobed ma Ngima Kendo?

1. Wach maber ma Muma puonjo e wi jomotho en mane?

Maritha kod Mariam ka rwako owadgi Lazaro mane otho kendo ochier

Noyudo Lazaro osetho kuom odiechienge ang’wen ka ne Yesu ochopo Bethania, ma en taon ma ne ni machiegni gi Jerusalem. Yesu, Maritha, kod Maria ne odhi e liel kama ne oyikie Lazaro. Matin nono, ji mang’eny ne ochokore kanyo. Parie kaka Maritha gi Maria ne mor ka ne ochier Lazaro!—Som Johana 11:21-24, 38-44.

Maritha ne oseng’eyo ni Jehova biro chiero jogo mosetho mondo odag e piny kendo.—Som Ayub 14:14, 15.

2. Muma puonjo ang’o e wi jomotho?

Kichweyo Adam, kod kotho — Nyasaye ne onyiso Adam niya: “In buru kendo inidog e buru.”—CHAKRUOK 3:19.

Nyasaye ne ochueyo dhano kotiyo gi buru. (Chakruok 2:7; 3:19) Ok wan chuech mag polo ma nigi del mar piny. Nikech wan chuech mag ringruok, onge gima dhi nyime dak sama watho. Sama ng’ato otho, obwongone bende tho, kendo paro ma en-go bende lal. Mano e momiyo Lazaro ne ok owacho gik ma ne otimorene ka ne otho, nikech ng’at motho ok ong’eyo gimoro.—Som Zaburi 146:4; Eklesiastes 9:5, 6, 10.

Be Nyasaye sando ji e mach ka gisetho? Nikech Muma nyiso ni jomotho ok ong’eyo gimoro, puonj mar mach misandoe ji en puonj mar miriambo ma ketho nying Nyasaye. Paro mar sando ji e mach osine ahinya.—Som Jeremia 7:31.

Ne vidioni: Gima Muma Puonjo e Wi Jomotho?

3. Be jomotho nyalo wuoyo kodwa?

Jomotho ok nyal wuoyo kata winjo. (Zaburi 115:17) Kata kamano, malaike moko richo, kendo ginyalo wuoyo gi ji ka giwuondore ni gin dhano ma nosetho. (2 Petro 2:4) Jehova odagi tim mar temo wuoyo gi jomotho.—Som Rapar mar Chik 18:10, 11.

4. Gin jomage mibiro chier?

Ng’at mochier e Paradis puonjore e wi Nyasaye. kae to bang’e en be opuonjo joma ochier e wi Nyasaye.

Ji tara gi tara mosetho kendo ma ni e liete biro dak kendo e piny. Nitie jomoko ma ne ok ong’eyo Nyasaye kendo ma ne otimo gik maricho ma bende ibiro chier.—Som Luka 23:43; Tich Joote 24:15.

Jogo mosechier biro puonjore adiera e wi Nyasaye kendo keto yie kuom Yesu ka giluwo chikene. (Fweny 20:11-13) Joma ibiro chier ma biro timo gik makare biro dak e piny nyaka chieng’.—Som Johana 5:28, 29.

5. Chier puonjowa ang’o e wi Jehova?

Ka ne Nyasaye ooro wuode mondo othonwa, ne oyawo yo mondo jomotho obi obed ma ngima kendo. Omiyo, chier nyisowa hera ma Jehova oherowago kod ng’wonone mogundho. En ng’a ma digomb neno kochier e kinde ma ibiro chierie jomotho?—Som Johana 3:16; Jo-Rumi 6:23.

Mondo iyud weche momedore ne sula mag 6, 7, koda 10, e bug Gima Muma Puonjo.