Ang’o Momiyo Onego Idhi Nyime Puonjori?

1. Ere kaka dhi nyime gi puonjruok Muma biro konyi?

En adier ni gik ma isepuonjori e Muma nyaka chop sani osemiyo ihero Jehova. Kata kamano, nyaka idhi nyime timo kinda mondo imed hero Nyasaye. (1 Petro 2:2) Mondo iyud ngima mochwere nyaka idhi nyime sudo machiegni gi Nyasaye kuom puonjori Wachne.​—Som Johana 17:3; Juda 21.

Kaka imedo ng’eyo Nyasaye e kaka yieni biro medo bedo motegno. Yie biro miyo itim gik ma moro Nyasaye. (Jo-Hibrania 11:1, 6) Yie ma in-go biro miyo ilok chunyi kendo itim lokruok mabeyo e kit ngimani.​—Som Tich Joote 3:19.

2. Inyalo konyo jomoko nade gi weche misepuonjori e wi Nyasaye?

Pile, ka wan-gi wach maber, waheroga nyiso jomoko. Omiyo, ibiro gombo nyiso jomoko gik misepuonjori. Kaka idhi nyime puonjori Muma, ibiro ng’eyo kaka inyalo tiyo kode e lero yie ma in-go kuom Jehova kod wach maber.​—Som Jo-Rumi 10:13-15.

Thoth ji chakoga lendo ne wedegi kod osiepegi. Ti gi rieko. Kar nyisogi ni gin e din mar miriambo, wuo kodgi e wi singo mag Nyasaye. Bende, ng’e ni thothne gima ywayo ji moloyo en timbeni mabeyo, to ok weche miwacho.​—Som 2 Timotheo 2:24, 25.

3. Be wanyalo sudo machiegni gi Nyasaye?

Puonjruok Wach Nyasaye biro konyi sudo machiegni kode. Gikone, ibiro bedo osiep Jehova. Kuom adier, inyalo bedo achiel kuom nyithind Nyasaye.​—Som 2 Jo-Korintho 6:18.

4. Ere kaka inyalo dhi nyime timo dongruok?

Inyalo medo timo dongruok kuom dhi nyime puonjori Wach Nyasaye. (Jo-Hibrania 5:13, 14) Inyalo kwayo achiel kuom Joneno mag Jehova mondo opuonjre kodi Muma kotiyo gi buk miluongo ni . Kaka idhi nyime puonjori Wach Nyasaye, e kaka ngimani biro medo dhi maber.​—Som Zaburi 1:1-3; 73:27, 28.

Wach maber wuok kuom Jehova, ma en Nyasaye ma mor. Inyalo sudo machiegni kode kuom sudo machiegni gi joge. (Jo-Hibrania 10:24, 25) Ka itimo kinda mondo imor Jehova, inyiso ni idwaro ngima madier, ma en ngima mochwere. Kuom adier, sudo machiegni gi Nyasaye e gima ber moloyo ma inyalo timo e ngimani.​—Som 1 Timotheo 1:11; 6:19.