SULA MAR PUONJRUOK 15
WER 30 Wuora, Nyasacha, Kendo Osiepna
“Sudo Machiegni gi Nyasaye” Kelonwa Ber!
“An to sudo machiegni gi Nyasaye berna moloyo.”—ZAB. 73:28.
GIMA SULANI WUOYE
Sulani biro konyowa neno kaka wanyalo sudo machiegni gi Jehova kod ber ma wayudo ka watimo kamano.
1-2. (a) Ang’o monego watim ka wadwaro mako osiep machiegni gi ng’ato? (b) Ang’o ma wabiro nono e sulani?
BE IN gi osiepni moro migeno ahinya? Ang’o ma nitimo mondo ubed osiepe? Nyalo bedo ni nuhero bedo kanyachiel kode ming’eyo pek ma nokaloe, kendo ning’eyo nyaka gik mohero kod gik ma ok ohero. Ne ifwenyo kido mabeyo ma en-go ma diher bedogo. To mano nomiyo imedo hero osiepnino ahinya.
2 Bedo gi osiep machiegni kamano gi ng’ato dwaro thuolo kod kinda. Mano bende e gima onego watim ka wadwaro mako osiep machiegni gi Jehova Nyasaye. Sulani biro konyowa neno kaka wanyalo sudo machiegni gi Jehova, kod ber ma wayudo ka watimo kamano. Mokwongo, wane ane gimomiyo ber sudo machiegni gi Jehova, ma en Osiepwa maduong’.
3. Ang’o momiyo onego wapar matut kuom ber ma wayudoga sama wasudo machiegni gi Jehova? Chiw ane ranyisi.
3 Onge kiawa ni sudo machiegni gi Nyasaye en gima ber moloyo. Kata kamano, paro matut kuom gimomiyo ber timo kamano nyalo chwalowa mondo wadhi nyime sudo machiegni ahinya kode. (Zab. 63:6-8) Kuom ranyisi, wang’eyo ni wayudoga ber ka wachamo chiemo mowinjore, warieyo dendwa, wayudo yueyo moromo, kendo wamodho pi moromo. Kata kamano, ji mang’eny ok timga gigo, kendo mano miyo gituorega ahinya. Ka waparo matut kuom ber ma wayudo ka watimo gigo, mano biro chwalowa mondo wasik ka watimogi. E yo ma chalo kamano, wanyalo ng’eyo ni sudo machiegni gi Jehova kelonwa ber. Kata kamano, ka waparo matut kuom ber ma wayudo sama watimo kamano, mano biro chwalowa mondo wasud machiegni ahinya gi Jehova ma en Osiepwa maduong’.—Zab. 119:27-30.
4. Ang’o ma jandik-zaburi nowacho e Zaburi 73:28?
4 Som Zaburi 73:28. Jal ma nondiko Zaburi 73 ne en Ja-Lawi ma ne nigi migawo mar wer e hekalu mar Jehova. Nyalo bedo ni nosetiyo ne Jehova kuom higni mang’eny. Kata kamano, ne ong’eyo ni “sudo machiegni gi Nyasaye” en gima ber, kendo ne oparo ne jomamoko bende wachno. Gin ber mage ma wayudoga sama wan bende watimo kamano?
“SUDO MACHIEGNI GI NYASAYE” MIYO WABEDO MAMOR
5. (a) Ang’o momiyo sudo machiegni gi Jehova miyo wabedo mamor? (b) Ere kaka rieko ma Jehova chiwo nyalo konyi kendo riti kaka onyis e Ngeche 2:6-16.
5 Kaka wamedo sudo machiegni gi Jehova, e kaka wabiro medo bedo mamor. (Zab. 65:4) Nitie gik mang’eny momiyo wawacho kamano. Kuom ranyisi, sama watiyo gi puonj mag Muma wabedoga mariek, kendo riekono konyowaga tang’ gi gik ma nyalo hinyowa, kendo okonyowa timo yiero mabeyo. (Som Ngeche 2:6-16.) Mano e momiyo Muma wacho kama: “Ng’at mamor en ng’at ma yudo rieko kendo en ng’at ma ong’eyo pogo weche kare.”—Nge. 3:13.
6. Ang’o momiyo jandik-zaburi nolalo mor ma ne en-go?
6 En adier ni osiepe Jehova bende nyaloga kuyo kinde ka kinde. Jandik-zaburi mar 73 nolalo mor ma ne en-go ka nochako paro gik ma nyoso chuny. Nochako bedo gi kuyo kod nyiego ka noneno kaka joricho ma ok dew Nyasaye kod chikege nodak e ngima mayom. Noparo ni joma wigi tek kod josunga kinde duto ne gin jomwandu, ngimagi ne ber, kendo ne gionge chandruok moro amora. (Zab. 73:3-7, 12) Jandik-zaburino nokuyo ahinya, mochopo kama nochako paro ni tiyo ne Jehova en kayiem nono. Chunye nonyosore mowacho niya: “Adier, aserito chunya kendo aselwoko lwetena kayiem nono.”—Zab. 73:13.
7. Sama wakuyo, ang’o ma wanyalo timo mondo wanyagre gi kuyono? (Ne picha manie nyim gaset.)
7 Jandik-zaburi ne ok oyie mondo kuyo ma ne en-go onyos chunye chuth. Nokawo okang’ mowinjore. ‘Nodonjo kama ler mar Nyasaye,’ kendo Jehova norieyo pache kanyo. (Zab. 73:17-19) Sama wakuyo, Jehova ma en Osiepwa maduong’ ong’eyo wachno. Ka wakwaye e lamo mondo otawa, kendo warwako kony ma wayudo e Wachne kod kanyakla, wabiro bedo gi chuny mokuwe ma biro konyowa nyagore gi kuyo ma wan-go. Kata sama parruok opong’o chunywa, Jehova pod biro hoyowa.—Zab. 94:19.a
Ja-Lawi ma nondiko Zaburi 73, ochung’ “ka maler mar Nyasaye” (Ne paragraf mar 7)
“SUDO MACHIEGNI GI NYASAYE” MIYO WATIYO MABER GI NGIMAWA KENDO WABEDO GI GENO
8. Gin yore mage mamoko ma sudo machiegni gi Nyasaye kelonwago ber?
8 Sudo machiegni gi Nyasaye bende konyowa e yore ariyo moko madongo. Mokwongo, okonyowa tiyo maber gi ngimawa. Mar ariyo, omiyowa geno madier mar kinde mabiro. (Jer. 29:11) Wanonuru ane bergo e yo matut.
9. Ere kaka sudo machiegni gi Jehova konyowa tiyo maber gi ngimawa?
9 Sudo machiegni gi Jehova konyowa tiyo maber gi ngimawa. E kindegi, thoth joma wacho ni Nyasaye onge ok ong’eyo gimomiyo Nyasaye nochueyo dhano, kendo giparoga ni machiegnini ibiro tiek dhano duto. Kata kamano, puonjruok marwa mar Muma osekonyowa bedo gadier ni Nyasaye nitie “kendo ni en jachiw-mich ne jo ma manye gi kinda.” (Hib. 11:6) Kata mana e kindewagi, wabedoga mamor nikech watiyo ne Jehova ma en Wuonwa manie polo, to mano e gimomiyo ne ochueyowa.—Rap. 10:12, 13.
10. En ang’o ma Jehova osingo e Zaburi 37:29 ne joma ogene?
10 E kindegi, ji mang’eny onge gi geno mar kinde mabiro. Gidich mana gi tijegi, kend, bedo gi nyithindo, kaachiel gi kano pesa ma gibiro tiyogo ka giseritaya. Ok gidew weche Nyasaye. Mopogore gi jogo, wan to wageno kuom Jehova. (Zab. 25:3-5; 1 Tim. 6:17) Wageno Nyasachwa ahinya kendo wan gadier ni obiro timo gik mosingonwa. Nitie gik mang’eny mabeyo ma wageno yudo e kinde mabiro, to maduong’ie moloyo en tiyo ne Nyasaye nyaka chieng’ e Paradiso.—Som Zaburi 37:29.
11. Sudo machiegni gi Nyasaye miyo iwinjo nade, to en bende owinjo nade?
11 Sudo machiegni gi Jehova kelonwa ber e yore mamoko bende. Kuom ranyisi, Jehova singo ni obiro weyonwa richowa ka waloko chunywa gadier. (Isa. 1:18) Mano miyo ok wasik ka waparore nikech richo ma ne watimo e kinde mokalo. (Zab. 32:1-5) Bende, wabedoga mamor sama watimo gik mamoro Jehova. (Nge. 23:15) Donge inyalo paro gueth mamoko ma wayudoga sama wasudo machiegni gi Jehova? Kata kamano, ere kaka inyalo dhi nyime sudo machiegni gi Nyasaye?
KAKA INYALO DHI NYIME “SUDO MACHIEGNI GI NYASAYE”
12. Ang’o misetimo mondo isud machiegni gi Nyasaye?
12 Ka po ni osebatisi, mano nyiso ni isekawo okang’ maduong’ ahinya mar sudo machiegni gi Jehova. Isepuonjori adiera mang’eny e wi Jehova kod Yesu, iseweyo richoni miloko chunyi gadier, isenyiso ni iyie kuom Nyasaye, kendo iseng’ado ni ibiro timo dwache. Kata kamano, mondo imed sudo machiegni gi Nyasaye, nyaka idhi nyime timo gigo.—Kol. 2:6.
13. Gin gik mage adek ma nyalo konyowa dhi nyime sudo machiegni gi Jehova?
13 Ang’o ma biro konyowa dhi nyime sudo machiegni gi Jehova? (1) Nyaka wadhi nyime somo kendo puonjore Muma. Sama watimo kamano, dwachwa maduong’ ok onego obed mana puonjore weche moko e wi Nyasaye, kar mano, onego watem matek mondo wang’e pach Nyasaye kod dwache, kendo dak ka luwore gi dwache. (Efe. 5:15-17) (2) Onego wadhi nyime tego yiewa kuom paro matut kuom yore mogundho ma Nyasaye nyisowago herane. (3) Nyaka wadhi nyime sin gi gik ma Jehova osin-go, kendo tang’ mondo kik wamak osiep gi joma timo gik ma kamago.—Zab. 1:1; 101:3.
14. Ka luwore gi 1 Jo-Korintho 10:31, moko kuom gik ma wanyalo timo pile mondo wamor Jehova gin mage? (Ne pichni bende.)
14 Som 1 Jo-Korintho 10:31. Dwarore ni watim gik ma moro Jehova. Mano nyiso ni onego watim momedore moloyo mana dhi e tij lendo kod chokruoge. Timbe mabeyo ma moro Jehova oriwo nyaka gik ma watimo e ngimawa mapile. Kuom ranyisi, sama wan jo adiera e weche duto kendo jochiwo, wamoro chuny Jehova. (2 Kor. 8:21; 9:7) Bende, Jehova dwaro ni wachiw luor ne mich mar ngima. Wasudoga machiegni gi Jehova ma en Jachiw ngima sama wan gi paro mowinjore e wi chiemo, metho, kod kaka warito ngimawa. Jehova morga kodwa ahinya sama oneno kaka watimo kinda mondo wamore kata mana e gik matindo.—Luka 16:10.
Wanyalo moro Jehova kuom luwo chike mag ndara sama wariembo mtoka, rito ngimawa kuom rieyo dendwa, kendo chamo chiemo mowinjore, kaachiel gi nyiso jomamoko ng’wono (Ne paragraf mar 14)
15. Jehova dwaro ni wane jomamoko nade?
15 Jehova nyisoga ng’wono ne joma kare kaachiel gi joma ok kare. (Mat. 5:45) Odwaro ni wan bende wanyis jomamoko ng’wono. Kuom ranyisi, ok onego ‘wawach weche ma nyalo ketho nying ng’ato kata bedo jo mohero ywaruok, to onego wanyis muolo chuth ne ji duto.’ (Tito 3:2) Mano miyo ok wacha jomamoko mana nikech ok gilam Jehova. (2 Tim. 2:23-25) Wasudoga machiegni gi Jehova sama wanyiso ji duto ng’wono kendo wadewogi gadier.
WANYALO “SUDO MACHIEGNI GI NYASAYE” KATA SAMA WATIMO RICHO
16. En paro mane ma jal ma nondiko Zaburi 73 nobedogo kuom kinde moro?
16 To nade ka bang’ kinde moko ichako nenori ka ng’at ma nono mana nikech richo moro ma nitimo? Mana kaka ne waseneno, gima kamano notimore ne jal ma nondiko Zaburi 73. Nowacho niya: “An to tiendena ne both obaro tenge; ne achiegni kier.” (Zab. 73:2) Nowacho ni ‘iye nowang’,’ kendo ne oonge rieko mana ka “le ma onge rieko” e nyim Jehova. (Zab. 73:21, 22) Dibed ni noparo ni Jehova ne ok dhi weyone kendo nyise hera nikech richone?
17. (a) En ang’o ma jandik-zaburi notimo e kinde ma chunye nonyosore ahinya? (b) Gima notimorene puonjowa ang’o? (Ne pichni bende.)
17 Ka po ni jandik-zaburi ne paro ni Jehova ojwang’e, samoro nobedo gi parono kuom kinde machuok. Nenore ni e kinde ma chunye nonyosore ahinyano, nofwenyo gimomiyo ne dwarore ni osud machiegni gi Jehova. Nondiko kama: “Kata kamano, sani an kodi pile [Jehova]; isemako lweta ma korachwich. Itaya gi rieko ming’adona, kae to bang’e ibiro miya duong’.” (Zab. 73:23, 24) Wan bende dwarore ni wane Jehova kaka Lwanda sama chunywa onyosore. (Zab. 73:26; 94:18) Kata ka po ni wakier, wanyalo duogo ir Jehova ka wan gadier ni ‘oikore weyo ne ji richogi.’ (Zab. 86:5) To moloyo sama chunywa onyosore, dwarore ni wasud machiegni ahinya gi Nyasachwa.—Zab. 103:13, 14.
Sama wawinjo ka chunywa onyosore, onego wasud machiegni ahinya gi Jehova kuom bedo modich e tije motudore gi lamo mare (Ne paragraf mar 17)
“SUDO MACHIEGNI GI NYASAYE” NYAKA CHIENG’
18. Ang’o momiyo sudo machiegni gi Jehova onge giko?
18 Wanyalo dhi nyime sudo machiegni gi Jehova nyaka chieng’ kendo medo ng’eye. Muma wacho ni yore mag Jehova, riekone, kod ng’eyone “tek nono chuth.”—Rumi 11:33.
19. Ang’o ma Zaburi nyisowa e wi kinde mabiro?
19 Zaburi 79:13 wacho kama: “Wan jogi kendo rombe mag legeni, wabiro paki nyaka chieng’. Wabiro hulo pakni koa e tieng’ moro nyaka machielo.” Kaka idhi nyime sudo machiegni gi Jehova, in bende inyalo bedo gadier ni ibiro yudo gueth ma nyaka chieng’, kendo wacho mana kaka jandik-zaburi nowacho niya: “Nyasaye e lwanda ma miyo chunya teko, en e pokna nyaka chieng’.”—Zab. 73:26.
WER 32 Bi Ichung’ Kor Jehova!
a Moko kuom joma nigi parruok ahinya, luoro, kata kuyo mokalo tong’ nyalo manyo kony kuom laktar. Mondo iyud weche momedore, ne Ohinga mar Jarito, Na. 1 2023.