Sudo Machiegni gi Jokristo Wetewa Kelonwa Ber!

1-2. En ang’o ma Jehova ogeno ahinya, to odwaro ni watim ang’o?

JEHOVA dewo ahinya gik ma watimo ne jowetewa. Yesu nopuonjo ni nyaka waher jowetewa kaka waherore wawegi. (Mat. 22:37-39) Mano oriwo nyiso ng’wono kata ne joma ok ti ne Jehova. Sama watimo kamano, waluwo ranyisi mar Jehova Nyasaye ma miyo “chieng’ rieny ne jo maricho kaachiel gi jo mabeyo, kendo omiyo koth chue ne jo makare kaachiel gi jo ma ok kare.”—Mat. 5:45.

² Kata obedo ni Jehova ohero dhano duto, ogeno ahinya joma timo gik makare. (Joh. 14:21) Odwaro ni waluw ranyisine. Ojiwowa ni waher owetewa gi nyiminewa gi “hera matut.” (1 Pet. 4:8; Rumi 12:10) Hera ma kamano inyalo pim gi hera ma wanyiso watwa kata osiepwa ma wageno ahinya.

3. En ang’o monego watim mondo herawa odongi?

³ Mana kaka dwarore ni orit yien maber eka odongi, e kaka bende dwarore ni watim kinda mondo herawa odongi. Jaote Paulo nojiwo Jokristo kama: “Hera ma un-go e kindu kaka owete mondo omed dhi nyime.” (Hib. 13:1) Jehova dwaro ni wadhi nyime hero jowetewa. E sulani, wabiro neno gimomiyo onego wamed sudo machiegni gi Jokristo wetewa, kod kaka wanyalo dhi nyime timo kamano.

GIMOMIYO ONEGO WAMED SUDO MACHIEGNI GI JOKRISTO JOWETEWA

4. Ka luwore gi Zaburi 133:1, ang’o ma nyalo konyowa dhi nyime geno Jokristo wetewa? (Ne pichni bende.)

⁴ Som Zaburi 133:1. Jandik-zaburi nowacho adier ka nondiko ni mako osiep gi joma ohero Jehova en gima “ber” kendo “long’o.” Mana kaka ng’ato nyalo neno yien moro ma jaber kaka gima pile nikech ong’iyo nene, e kaka wan bende wanyalo po ka wachako neno winjruok manie kindwa gi Jokristo wetewa kaka gima pile. Nyalo bedo ni waromoga gi owetewa gi nyiminewa nyading’eny e juma. Ere kaka wanyalo dhi nyime nyiso ni wagenogi? Wabiro medo hero owetewa gi nyiminewa ka waparo kaka gikonyo kanyakla kod kaka gikonyowa.

5. Hera ma wan-go e kindwa nyalo chwalo jomamoko mondo otim ang’o?

⁵ Joma eka ohango biro e chokruogewa bedoga mamor neno hera matut manie kindwa. Mano nyalo miyo gibed gadier ni wan Jokristo madier. Yesu nowacho kama: “Ma e ma nomi ji duto ong’e ni un jopuonjrena ka un gi hera e kindu uwegi.” (Joh. 13:35) Ne ane ranyisi mar Nyaminwa Chaithra ma nochako puonjore Muma gi Joneno mag Jehova ka en e yunivasiti. Nogwele e chokruok maduong’ mar ndalo adek, kendo noyie dhi. E giko odiechieng’ mokwongo mar chokruogno, nonyiso japuonjne mar Muma kama: “Jonyuolna pok nokwakaga, kata kamano, e odiechieng’ achiel kende e chokruoguni, ne okwaka nyadi 52! Aseneno kaka Jehova tiyo gi joge e nyiso ni ohera. An bende daher bedo Janeno mar Jehova.” Chaithra nodhi nyime puonjore kendo timo lokruoge e ngimane ma obatise e higa mar 2024. Adier, sama joma eka ohango biro e chokruogewa oneno hera ma waherorego, mano nyalo chwalogi mondo giti ne Jehova.—Mat. 5:16.

6. Ere kaka sudo machiegni gi owetewa gi nyiminewa ritowa?

⁶ Sudo machiegni gi owetewa gi nyiminewa nyalo ritowa. Paulo nojiwo Jokristo wetene kama: “Pile ka pile sikuru ka ujiworu e kindu . . . mondo kik ng’ato kuomu obed gi chuny matek ta nikech wuond mar richo.” (Hib. 3:13) Ka chunywa onyosore ma tiendwa ochako kier ka wuok e yor tim makare, Jehova nyalo tiyo gi owadwa kata nyaminwa moro mondo omiwa kony ma dwarore. (Zab. 73:2, 17, 23) Kony ma kamano ber.

7. En tudruok mane manie kind hera gi winjruok? (Jo-Kolosai 3:13, 14)

⁷ Nikech watemo matek mondo wanyis hera e kindwa, mano miyo wayudo gueth mang’eny. (1 Joh. 4:11) Kuom ranyisi, hera chwalowa mondo ‘wadhi nyime nano gi jowetewa,’ to mano miyo wabedo gi winjruok maber e kindwa. (Som Jo-Kolosai 3:13, 14; Efe. 4:2-6) Nikech mano, hera kod winjruok ma wanenoga e chokruogewa ok nyal pim gi kuonde lamo mamoko.

KAKA WANYALO MIYO JOMAMOKO DUONG’

8. Ere kaka Jehova konyowa mondo wabed gi winjruok e kindwa gi owetewa gi nyiminewa?

⁸ Jehova e ma konyowa bedo gi winjruok e kindwa gi owetewa gi nyiminewa manie piny mangima. En e momiyo mano nyalore kata obedo ni wan joma orem. (1 Kor. 12:25) Muma wacho ni ‘Nyasaye puonjowa ni waherre.’ (1 The. 4:9) E yo machielo, Jehova tiyo gi Ndiko e nyisowa gik monego watim mondo wasud machiegni gi owetewa gi nyiminewa. Nyasaye nyalo puonjowa mana ka wanono Wachne e yo matut kendo tiyo gi gik ma wapuonjore. (Hib. 4:12; Jak. 1:25) To mano e gima Joneno mag Jehova temoga matek mondo gitim.

9. Ndiko mar Jo-Rumi 12:9-13 puonjowa ang’o e wi wach miyo jomamoko duong’?

⁹ Ere kaka Wach Nyasaye puonjowa mondo wasud machiegni gi jowetewa? Ne ane gima Paulo nondiko e wi wachno e Jo-Rumi 12:9-13. (Som.) Nondiko niya: “Kuom wach miyo jomamoko duong’, beduru motelo.” Mano tiende ang’o? Onego wakaw okang’ mokwongo mar nyiso jomamoko hera ka waweyonegi kethogi, warwakogi, kendo konyogi. (Efe. 4:32) Ok onego warit ni Jokristo wetewa e ma osud machiegni kodwa. Kar mano, onego wakaw okang’ mokwongo mar sudo machiegni kodgi. Kitimo kamano, to ibiro neno adiera mag weche ma Yesu nowachogi: “Chiwo kelo mor mang’eny moloyo kawo.”—Tich 20:35.

10. Ere kaka wanyalo bedo jokinda e “miyo jomamoko duong’”? (Ne picha bende.)

¹⁰ Gimiwuoro en ni bang’ ka Paulo nosenyisowa ni wami jomamoko duong’, nojiwowa ni wabed “jokinda, to ok jo samuoyo.” Ng’at ma jakinda en ng’at ma chunye ok jogi kendo mohero tiyo matek. Komiye tich moro, to otime maber. Ngeche 3:27, 28 jiwowa niya: “Kik ituon ji gik mabeyo mowinjore giyudi ka po ni in gi nyalo mar konyogi.” Omiyo, sama waneno ka ng’ato dwaro kony, watemo kar nyalowa mondo wakonye. Ok wadigni kata paro ni ng’at machielo biro konye.—1 Joh. 3:17, 18.

11. Ang’o ma nyalo konyowa mondo wamed sudo machiegni gi jowetewa?

¹¹ Yo machielo ma wanyalo nyisogo ni wamiyo jomamoko duong’ en kawo okang’ mokwongo mar weyonegi kethogi ka gichwanyowa. Jo-Efeso 4:26 wacho niya: “Kik uwe chieng’ opodh ka pod un gi mirima.” Nikech ang’o? Kwan matindo 27 wacho ni timo kamano nyalo miyo ‘wami Jachien thuolo.’ Jehova nyisowa nyadinwoya e Wachne ni wawe ne jowetewa kethogi. Jo-Kolosai 3:13 jiwowa ni ‘wadhi nyime weyore ketho e kindwa gi chuny man thuolo.’ Weyo ne jowetewa kethogi en yo achiel ma konyowa sudo machiegni kodgi. Sama waweyo ne jomamoko kethogi, mano konyowa ‘mondo warit winjruok achiel ma roho miyowa e kuwe ma tueyowa kanyachiel.’ (Efe. 4:3) E yo machuok, sama waweyo ne jomamoko kethogi, mano miyo wabedo gi kuwe kod winjruok e kindwa.

12. Ere kaka Jehova konyowa mondo wabed joma weyo ne jomamoko kethogi?

¹² En adier ni wanyalo yudo ka tek ng’wono ne joma okethonwa. Kata kamano, roho mar Nyasaye nyalo konyowa ng’wononegi. Muma nyisowa ni ‘waherre,’ ‘wabed jokinda,’ kendo ni kindawa “mondo oliel ka mach nikech roho.” Ng’at ma kindane liel ka mach en ng’at ma mor gi gima otimo nikech roho maler taye. (Ne weche ma lero Jo-Rumi 12:11 e Study Bible.) Nikech mano, roho mar Nyasaye nyalo konyowa mondo waher jowetewa kendo wawenegi kethogi kowuok e chunywa. Mano e momiyo wakwayoga Jehova gi kinda mondo omiwa roho maler.—Luka 11:13.

“KIK UBED GI POGRUOK E KINDU”

13. Ang’o ma nyalo kelo pogruok e kindwa?

¹³ Kanyakla nigi ji ma wuok e ogendni mopogore opogore. (1 Tim. 2:3, 4) Nikech mano, ka ok watang’ to wanyalo bedo gi pogruok e weche ma ng’ato onego otimie yiero en owuon kaka rwakruok gi bidhruok, weche mag thieth, kata e yore mag manyo mor. (Rumi 14:4; 1 Kor. 1:10) Nikech Nyasaye puonjowa ni waherre, onego wabed motang’ mondo kik wachun jomamoko gi pachwa.—Fil. 2:3.

14. Onego watem mondo wabed joma chalo nade, to nikech ang’o?

¹⁴ Bende, wanyalo geng’o pogruok e kanyakla ka kinde duto watemo matek mondo waduog chuny jomamoko kendo jiwogi. (1 The. 5:11) Machiegnini, ji mathoth ma nodok chien moweyo lendo kata ma nogol e kanyakla oseduogo. Sama gitimo kamano, warwakogiga gi mor! (2 Kor. 2:8) Ne ane gima notimore ne nyaminwa moro ma nobiro e chokruok bang’ dok chien moweyo lendo kuom higni apar. Nowacho kama: “Ji duto nobuonjo koda kendo mosa gi mor.” (Tich 3:19) Yo ma owete gi nyimine norwakego nomulo chunye nade? Owacho kama: “Mano nomiyo aneno kaka Jehova ne konya mondo abed mamor kendo.” Sama watemo matek mondo wajiw jomamoko, Yesu Kristo nyalo tiyo kodwa mondo waduog chuny joma ‘ojony kendo ma ting’ turo.’—Mat. 11:28, 29.

15. En yo mane machielo ma wanyalo jiwogo winjruok e kindwa? (Ne picha bende.)

¹⁵ Yo machielo ma wanyalo jiwogo winjruok e kindwa en kokalo kuom weche ma wawacho. Ayub 12:11 wacho kama: “Donge it pimo weche mowinjo mana kaka lep pogo ndhath chiemo?” Mana kaka jatedo molony bilo chiemo ka pok okete e nyim ji, wan bende onego wapar matut ka pok wawuoyo. (Zab. 141:3) Onego watem mondo kinde duto weche ma wawacho obed ma jiwo jowinjo, ma duogo chunygi, kendo ma konyogi.—Efe. 4:29.

16. Gin jomage monego otem ahinya mondo giwach weche ma jiwo jomamoko?

¹⁶ Chwo mosekendo kod jonyuol onego one ni kinde duto weche ma giwacho gin ma jiwo jomamoko. (Kol. 3:19, 21; Tito 2:4) Nikech jodong-kanyakla kwayo rombe mag Jehova, onego giduog chuny rombe kendo hoyogi. (Isa. 32:1, 2; Gal. 6:1) Muma wacho kama: “Mano kaka wach mowach e kinde mowinjore ber!”—Nge. 15:23.

HER JOMAMOKO “GI TIM KENDO GI ADIERA”

17. Ang’o ma wanyalo timo mondo wabed gadier ni wahero owetewa gi nyiminewa kowuok e chunywa?

¹⁷ Jaote Johana jiwowa ni “ok onego wanyis hera mana gi wach kata gi lep kende, to bende gi tim kendo gi adiera.” (1 Joh. 3:18) Wadwaro ni waher owetewa gi nyiminewa kowuok e chunywa. Ang’o ma nyalo konyowa timo kamano? Kaka wamedo bedo kanyachiel gi owetewa gi nyiminewa, e kaka wabiro medo sudo machiegni kodgi, kendo hera ma waherorego biro medore. Omiyo, los thuolo mar bedo kanyachiel gi owete gi nyimine. Kuom ranyisi, inyalo timo kamano sama in e chokruogewa kod e tij lendo. Bende, inyalo manyo thuolo mondo ilimgi. Ka watimo kamano, to wanyiso ni wan joma Nyasaye puonjo mondo oherre. (1 The. 4:9) Bende, wabiro dhi nyime neno “kaka ber kendo long’o ka owete odak kanyachiel gi kuwe!”​—Zab. 133:1.