Kaka Wanyalo Loyo Kiawa ma Wanyalo Bedogo

1-2. (a) Gin penjo mage ma jotich Jehova nyalo bedogo? (b) En ang’o ma wabiro nono e sulani?

WADUTO wabedoga gi kiawa,a bed ni watindo kata wadongo. Kuom ranyisi, tem ane paro rawera moro ma en jalendo ma pok obatisi. Rawerano nigi kiawa ka be Jehova dewe, to mano miyo ochako penjore ka be ochuno ni obatise. Kata, par ane owadwa moro ma hike nie diere ma noyiero keto weche Pinyruoth obed motelo e ngimane kar mondo omany mwandu mag pinyni. Bang’e, obedo gi pek mar yuto. Onyalo chako bedo gi kiawa ka be notimo yiero maber mar tiyo ne Jehova. Ranyisi machielo en mar nyaminwa moro ma hike oseniang’ ma koro ok nyal timo gik moko kaka notimoga chon. Chunye nyalo nyosore nikech koro ok onyal timo mathoth e tij Jehova. Be isega penjori penjo kaka magi: ‘Be Jehova dewa gadier? Be natimo yiero maber mar weyo manyo mwandu mag pinyni mondo ati ne Jehova? Be Jehova pod mor gi tich ma atimone?’

² Ka ok wamanyo dwoko mag penjogo, mano nyalo miyo yiewa odog chien kata wanyalo weyo lamo Jehova. E sulani, wabiro nono puonj moko ma yudore e Muma ma nyalo konyowa sama wan gi kiawa (1) ka be Jehova dewowa, (2) ka be ne watimo yiero mabeyo e kinde mokalo, kata (3) ka be Jehova pod nyalo tiyo kodwa e chopo dwache.

KAKA INYALO LOYO KIAWA MA IN-GO

3. En ang’o monego watim mondo walo kiawa ma wan-go?

³ Achiel kuom yore ma wanyalo loyogo kiawa ma wan-go en puonjruok Muma mondo wayud dwoko mag penjo ma chandowa. Timo kamano biro miyo yiewa obed motegno. Bende, winjruokwa gi Jehova biro bedo maber, kendo ‘wabiro chung’ matek e yie.’—1 Kor. 16:13.

4. Ere kaka wanyalo ‘bedo gadier kuom weche duto’? (1 Jo-Thesalonika 5:21)

⁴ Som 1 Jo-Thesalonika 5:21. Muma jiwowa ni “[wabed] gadier kuom weche duto.” Ere kaka wanyalo timo mano? Wanyalo timo mano kuom nono ka be gik ma wayiego, gin adier kuom pimogi gi puonj mag Muma. Kuom ranyisi, par ane rawera moro ma nigi kiawa ka be Jehova dewe. Be rawerano onego ong’ad e chunye ni Jehova ok dewe? Ooyo, onego “[obed] gadier kuom weche duto” kuom opuonjore Muma mondo ong’e pach Jehova e wi wachno.

5. Ere kaka Jehova nyalo konyowa yudo dwoko mag penjo ma wan-go?

⁵ Wawinjo dwond Jehova sama wasomo Wachne. Kata kamano, dwarore ni watim kinda mondo wang’e paro ma en-go e wi wach moro ma wan-go gi kiawa. Onego waket pachwa e somo ndiko moko ma biro konyowa yudo dwoko mag penjo ma chandowa. Wanyalo timo nonro e wi wachno ka watiyo gi gige timo nonro ma riwruok mar oganda Jehova chiwo. (Nge. 2:3-6) Wanyalo wuoyo gi Jehova e lamo ka wakwaye mondo okonywa yudo dwoko mag penjo ma chandowa. Kae to wanyalo manyo puonj moko e Muma ma wanyalo tiyogo. Bende, wanyalo yudo ber ka wanono ranyisi ma yudore e Muma mag joma ne nigi penjo kaka magwa.

6. Ere kaka chokruogewa konyowa e loyo kiawa ma wanyalo bedogo?

⁶ Wawinjoga bende dwond Jehova sama wan e chokruogewa. Ka wadhi e chokruogewa ma ok wabare, wanyalo winjo twak kata paro moro mochiw ma mulo wach ma samoro chandowa. (Nge. 27:17) Koro we wanon ane weche moko ma wanyalo bedogo gi kiawa.

SAMA IN GI KIAWA KA BE JEHOVA DEWI

7. En penjo mane ma jomoko nyalo bedogo?

⁷ Be isega penjori ka be Jehova dewi gadier? Ka ineno ni in ng’at ma nono e wang’ Nyasaye, mano nyalo miyo ichak paro ni ok inyal bedo osiep Jachuech mar piny gi polo. Nenore ni Ruoth Daudi bende ne nigi paro ma kamano. Nokawe gi wuoro ahinya ng’eyo ni Jehova dewo nyaka dhano ma onge gi nyalo. Omiyo, nopenjo kama: “Yaye Jehova, dhano en ang’o ma dipare? Adier, dhano adhanani en ang’o ma dimi idewe?” (Zab. 144:3) Ere kama wanyalo yude dwoko mar penjono?

8. Ka luwore gi 1 Samuel 16:6, 7, 10-12, en ang’o ma Jehova ng’iyoga kuomwa?

⁸ Muma konyowa ng’eyo kaka Jehova neno joma ji ochayo. Kuom ranyisi, Jehova nooro Samuel e od Jesse mondo odhi owir achiel kuom yawuote ma ne dhi bedo ruoth e piny Israel. Jesse noluongo ne Samuel yawuote abiriyo, to ne ok oluongo Daudi ma ne en wuode ma chogo.b Kata kamano, Daudi e ma Jehova noyiero. (Som 1 Samuel 16:6, 7, 10-12.) Jehova ne ong’eyo ni Daudi nohere gadier kata obedo ni ne en rawera ma pod tin.

9. Ere kaka inyalo bedo gadier ni Jehova dewi? (Ne picha bende.)

⁹ Tem ane paro gik ma Jehova osetimoni ma nyiso ni odewi. Oikore miyi paro mabeyo ma nyalo konyi nyagori gi gik ma chandi. (Zab. 32:8) Be onyalo timo kamano ka ok ong’eyi e yo maber? (Zab. 139:1) Kitiyo gi paro ma Jehova chiwo kendo neno kaka parogo konyi, ibiro bedo gadier ni odewi. (1 We. 28:9; Tich 17:26, 27) Jehova neno kinda mitimo, oneno kido mabeyo ma in-go, kendo odwaro ni ibed osiepne. (Jer. 17:10) Obiro bedo mamor ka in bende idwaro bedo osiepne.—1 Joh. 4:19.

SAMA IN GI KIAWA E WI YIERO MA NITIMO MONDO ITI NE JEHOVA

10. Gin penjo mage ma wanyalo penjore e wi yiero ma ne watimo chon?

¹⁰ Bang’ higni moko, jomoko nyalo chako bedo gi kiawa ka be ne gitimo yiero maber mondo giti ne Jehova. Samoro ne giweyo tich ma nigi osara maber kata ne giweyo ohala ma ne miyogi pesa mang’eny mondo giyud thuolo momedore mar tiyo ne Jehova. Nyalo bedo ni higni mang’eny osekalo kendo koro gineno ka osiepegi moko ma notimo yiero mopogore gi margi, odak e ngima ma nenore ni ber kendo gin gi mwandu mang’eny. Mano nyalo miyo gichak penjore kama: ‘Be natimo yiero maber kuom weyo gik ma ne an-go mondo ayud thuolo momedore mar tiyo ne Jehova? Koso yiero ma natimono osemiyo gik mang’eny obaya?’

11. En ang’o ma ne chando jandik Zaburi mar 73?

¹¹ Ka isega penjori penjo kaka mago, ne ane kaka jandik Zaburi mar 73 nowinjo. Noneno ka joma ok ti ne Jehova odak maber, ka gin gi mwandu mang’eny, kendo ne chal ka gima onge gima ne chandogi. (Zab. 73:3-5, 12) Ka noneno kaka ngima jogo ne dhi maber, nochako paro ni kinda ma notimo mondo oti ne Jehova ne en kayiem nono. Parogo nonyoso chunye kendo ‘nochandore odiechieng’ duto.’ (Zab. 73:13, 14) Ere kaka nonyagore gi paro ma ne chandego?

12. Ka luwore gi Zaburi 73:16-18, ang’o mane okonyo jandik-zaburi bedo gi paro makare?

¹² Som Zaburi 73:16-18. Jandik-zaburino nodhi modonjo kama ler mar Jehova. Ne en kanyachiel gi joma lamo Jehova kuno, to mano nokonye mondo one gik moko e yo maber. Nofwenyo ni kata obedo ni ne nenore ka gima ngima joma ne ok lam Jehova ne dhi maber, ne gionge gi geno moro amora mar kinde ma biro. Ng’eyo mano nokonye bedo gi paro mokuwe kendo nong’ado ni tiyo ne Jehova e yiero maberie moloyo. Mano nomiyo ong’ado mar dhi nyime tiyo ne Jehova kinde duto.—Zab. 73:23-28.

13. En ang’o minyalo timo ka po ni iywago ang’e nikech yiero moko motudore gi tij Nyasaye ma nitimo e kinde mokalo? (Ne picha bende.)

¹³ Puonjruok Muma biro konyowa bedo gi paro mokuwe. E yo mane? Tem ane pimo gueth mibiro yudo nikech itiyo ne Jehova kod gik ma joma ok lame moketo pachgi kuom manyo mwandu biro yudo. Ginyalo keto pachgi kuom mwandu ma gin-go kod ngima mayom nikech gionge geno moro amora mar kinde mabiro. To nade in, donge Jehova osebedo ka guedhi kendo osingoni gik mabeyo e kinde mabiro nikech itiyone? (Zab. 145:16) Penjri ane kama: Be wanyalo ng’eyo kaka ngimawa di koro chal ka dine ok wayiero tiyo ne Jehova? Bende, par wachni: Ka wayiero tiyo ne Jehova nikech wahere kendo nikech wahero dhano wetewa, mano biro miyo wabed gi gik mang’eny ma kelonwa mor.

SAMA IN GI KIAWA KA BE JEHOVA POD NYALO TIYO KODI

14. Moko kuom jotich Jehova nie chal mane, to en penjo mane ma samoro ginyalo penjore?

¹⁴ Moko kuom jotich Jehova ok nyal timo mathoth kaka ne gitimo chon e tije nikech koro giseti, gituore, kata nikech gin gi ng’ol moko. Mano nyalo miyo gichak neno ni gin joma nono e wang’ Jehova. Ginyalo penjore ni, ‘Be Jehova pod nyalo tiyo koda?’

15. Jandik Zaburi mar 71 ne ni gadier gi wach mane?

¹⁵ Jandik Zaburi mar 71 bende chunye ne chandore nikech ne oonge gi teko kaka chon. Nokwayo kama e lamo: “Kik ijwang’a ka tekona orumo.” (Zab. 71:9, 18) Kata kamano, jandik-zaburino nobedo gadier ni kotiyo ne Nyasaye kendo omakore kode, nodhi guedhe kendo taye. Bende, nopuonjore ni Jehova mor gi ji duto ma temo matek mondo gitine kata ka gin gi pek moko.—Zab. 37:23-25.

16. Gin yore mage ma Jehova pod nyisogo ni odewo joma hikgi oniang’? (Zab. 92:12-15)

¹⁶ Ka po ni hiki oseniang’, par matut kaka Jehova neni. Onyalo konyi mondo idhi nyime tiyone kata ka nitie pek moko mikale. (Som Zaburi 92:12-15.) Ket pachi kuom gik minyalo timo sani, kar keto pachi kuom gik ma ok inyal timo. Kuom ranyisi, sama imakori motegno gi Jehova, ibiro jiwo jomamoko kendo yo midewogigo biro tego chunygi. Inyalo nyiso jomamoko kaka Jehova osebedo ka siri kuom higni mang’eny kendo inyalo nyisogi singo mabeyo ma yudore e Muma ma irito neno ka chopo e kinde ma biro. Bende, par ni kinda mitimo mondo ilem ne jomamoko biro konyogi ahinya. (1 Pet. 3:12) Bed ni wan e chal mane, pod nitie gik ma wanyalo timo e tij Jehova, kata ma wanyalo timo mondo wakony jomamoko.

17. Ang’o momiyo ok onego wapimre gi jomamoko?

¹⁷ Kiwinjo marach nikech ok inyal timo mathoth e tij Jehova, bed gadier ni Jehova ogeno ahinya gik mitimone gie sani. Samoro inyalo chako pimo gik ma jomamoko timo gi gik mitimo e tij Jehova. Tem matek mondo ikwed paro ma kamano. Nikech ang’o? En nikech Jehova ok pimwa gi jomamoko. (Gal. 6:4) Kuom ranyisi, Maria nomiyo Yesu mo moro ma nengone tek kaka mich. (Joh. 12:3-5) Mopogore gi mano, chi liel moro to noluto pesa ma mingli ariyo ma ne nigi nengo matin ahinya. (Luka 21:1-4) Yesu ne ok opimo mon ariyogo, nong’eyo ni ne gitimo kamano nikech yiegi. Yesu noluwo ranyisi mar wuon-gi e yo makare chuth. Omiyo, bed gadier ni Jehova neno gik mitimo kendo omor kodi nikech ihere kata bed ni ineno ni ok itim mathoth kaka diher.

18. En ang’o ma nyalo konyowa loyo kiawa ma wanyalo bedogo? (Ne sanduk ma wiye wacho ni “Wach Jehova Nyalo Konyowa Loyo Kiawa ma Wan-go.”)

¹⁸ Samoro wabedoga gi kiawa e wi weche moko. Mana kaka waseneno, Muma nyalo konyowa loyo kiawa moro amora ma wanyalo bedogo. Omiyo, tem matek mondo imany dwoko mag penjo ma chandi. Timo kamano biro miyo ibed gadier kuom gik miyiego, kar bedo gi kiawa kuomgi. Jehova ong’eyi e yo maber kendo omor gi yiero ma nitimo mondo iket dwache obed mokwongo e ngimani. Bende, osingo ni obiro guedhi. Bed gadier ni Jehova ohero jotichne duto momakore kode kendo odewogi.