Nomoro Wuon-gi kod Jehova Bende

Be ing’eyo nyako manie pichani?— En nyar ng’at moro miluongo ni Jeftha. Muma ok nyiswa nyinge. Kata kamano, wang’eyo ni nomoro wuon-gi kod Jehova bende. We wanon ane weche moko e wi nyakoni kaachiel gi wuon mare Jeftha.

Jeftha ne en ng’at makare, kendo ne otiyo gi thuolo mang’eny kopuonjo nyare e wi Jehova. Bende, ne en ng’at ma ratego kendo ne en jatelo maber. Omiyo, Jo-Israel ne okwaye mondo otelnegi e lweny ma ne gidhi goyo gi wasikgi.

Jeftha nokwayo Nyasaye e lamo mondo okonye loyo lwenyno. Ne osingore ni ka oloyo lwenyno ne odhi chiwo ne Jehova ng’at ma ne dhi kwongo romone ka oduogo pacho. Ng’atno ne dhi tiyo ne Nyasaye kuom ngimane duto e tabanakel, ma ne en kama ji lamoe Nyasaye gie kindeno. Gima ne otimore en ni Jeftha ne oloyo lwenyno! Be ing’eyo ng’at ma ne okwongo romone kane oduogo dala?—

Ne en mana nyar Jeftha owuon! Nyakono ne en mana nyathi achiel kende, to koro ne nyaka Jeftha chiwe mondo odhi oti ne Nyasaye kuom ngimane duto! Wachno ne lit ne Jeftha ahinya. Kata kamano, ne osesingore ne Nyasaye. Kanyo gi kanyo nyare ne owacho niya: ‘Wuora, isesingori ne Jehova, omiyo tim mana kaka isesingori.’

Kata obedo ni nyar Jeftha ne oriwo wuon-gi lwedo, wachno ne litne. Tiyo e tabanakel ne dhi miyo kik kende kendo kik onyuol nyithindo. Kata kamano, gima nyar Jeftha ne dwaro ahinya ne en chopo singo mar wuon-gi kendo moro chuny Jehova. Mano ne duong’ne moloyo donjo e kend kata nyuolo nyithindo. Omiyo, nowuok dalagi modhi dak e tabanakel kuom ngimane duto.

Be iparo ni gima ne otimono ne omoro wuon mare kod Jehova?— Ee, nomorogi! Ka in be iwinjo jonyuolni kendo ihero Jehova ibiro bedo kaka nyar Jeftha. Ibiro miyo jonyuolni kaachiel gi Jehova obed mamor ahinya.