Beduru Jo Adiera e Kindu

Jehova dwaro ni wabed joma ‘wuotho tir.’ (Zaburi 15:2) Mano en kido ma dwarore ahinya e kend maru, nikech ka ok un jo adiera e kindu, ok unyal genoru. Kendo genruok dwarore ahinya mondo herau omed gundho.

Ndalogi, ok yot mondo joma okendore obed jo adiera e kindgi. Mondo urit kend maru, onego utim gik moko ariyo.

1. KEND MARU OBEDNU GIMA DUONG’

GIMA MUMA WACHO: ‘Yanguru gadier gik ma dwarore moloyo.’ (Jo-Filipi 1:10) Kuom gik madongo ahinya e ngimau, kend maru en achiel kuomgi. Onego ukete motelo.

Jehova dwaro ni iket chunyi kuom jaodi kendo ‘idag mamor’ kode. (Eklesiastes 9:9) Onyiso maler ni ok onego ijwang’ jaodi. Kar mano, uduto onego umany yore mag miyo nyawadu mor. (1 Jo-Korintho 10:24) Tem matek mondo imi jaodi one ni ihere kendo igene.

GIK MUNYALO TIMO:

• Temuru matek mondo umany thuolo mang’eny mag bedo kanyachiel, kendo iket pachi duto kuom jaodi

• Parou kod gik mutimo onego onyis ni un ji ariyo, to ok ni pod in kendi

2. RITURU CHUNYU

GIMA MUMA WACHO: “Ng’ato ang’ata ma siko ka ng’iyo dhako mondo ogombe, osechodo kode ei chunye.” (Mathayo 5:28) Ka pach ng’ato osiko mana kuom gik mochido, mano nyiso ni ok en ja adier gi jaode.

Jehova wachonu ni onego ‘urit chunyu.’ (Ngeche 4:23; Yeremia 17:9) Mondo utim mano, nyaka urit wang’u. (Mathayo 5:29, 30) Luwuru ranyisi mar jaduong’ Ayub ma ne otimo singruok gi wengene ni ok obi ng’iyo dhako machielo kogombe. (Ayub 31:1) Ng’ad e chunyi ni ok ibi ng’iyo ponografi, tiende ni pichni, vidio, kata weche modwanyore mag terruok. Tang’ kik ichak kisera gi ng’at machielo ma ok jaodi.

GIK MUNYALO TIMO:

• Jomamoko onego one ayanga ni imakri chuth gi jaodi

• Ng’e kaka jaodi winjo e chunye, kendo kapo ni nitie tudruok moro amora e kindi gi dhako kata dichwo ma nyalo miyo jaodi ochwanyre, ing’ad mano mapiyo