Kaka Unyalo Dak gi Kuwe kod Wedeu

Sama ukendoru, koro uchako ot manyien. Kata obedo ni pod ibiro hero jonyuolni kendo miyogi luor, jaodi koro e ma bedoni ng’at maduong’ e ngimani e piny ka. Wedeni moko ok bi rwako wachno e yo mayot. Kata kamano, puonj mag Muma biro konyou keto tong’ mowinjore. Mano biro miyo udag gi kuwe gi wedeu sama utimo kinda mar tego winjruoku e odu manyien.

1. BEDURU GI PARO MOWINJORE KUOM WEDEU

GIMA MUMA WACHO: “Mi wuoru gi meru luor.” (Jo-Efeso 6:2) Kata bed mana ni ijahigni adi, kinde duto dwarore ni imi jonyuolni luor kod duong’. Ng’e ni jaodi bende en wuod ng’ato, kata nyar ng’ato, kendo ok onyal jwang’o jonyuolne. Nikech “hera onge gi nyiego,” kik ibed gi parruok ka jaodi nigi tudruok ahinya gi jonyuolne.—1 Jo-Korintho 13:4; Jo-Galatia 5:26.

GIK MUNYALO TIMO:

• Tang’uru gi weche kaka “Jou kinde duto ochayaga,” kata ni, “Meru ok oheroga gik ma atimo”

• Tem neno gik moko kaka jaodi nenogi

2. CHUNG’URU MOTEGNO SECHE MA MANO DWARORE

GIMA MUMA WACHO: “Dichwo nowe wuon gi min, mi nopadre gi chiege: mi ginibedi ringruok achiel.” (Chakruok 2:24) Sama ukendoru, jonyuolu nyalo paro ni pod onego gichik ngimau, kendo ginyalo dwaro donjore e weche mag kend maru e yo mokalo tong’.

Kaka joma okendore, un e ma onego uwuo kanyachiel mondo ung’e tong’ monego uketnegi, kae to unyisgi mano e yo mamuol. Unyalo timo mano ayanga kendo e yo moriere ma onge achaya. (Ngeche 15:1) Kido kaka bolruok, muolo, kod horuok biro konyou bedo gi winjruok maber gi wedeu kendo dhi nyime “ka unano e kindu kuom hera.”—Jo-Efeso 4:2.

GIK MUNYALO TIMO:

• Ka ineno ni wedeu donjore gi weche mag ngimau e yo mokalo tong’, wuo gi jaodi kuom wachno sama weche osekue

• Winjreuru kaka ubiro loso wechego