KARE MAR 9
Lamuru Jehova Uduto Kaka Joot
“Lamuru Jalno ma nochueyo polo, gi piny.”—Fweny 14:7
Mana kaka isepuonjori ei bugni, Muma oting’o puonj mang’eny ma nyalo konyi kaachiel gi joodi. Jehova dwaro ni ubed mamor. Osingo ni ka uketo lamo mare motelo, “gik mamokogo duto nomednu.” (Mathayo 6:33) Odwaro ahinya ni ubed osiepene. Tiuru gi thuolo duto ma un-go e gero osiep gi Nyasaye. Mano en thuolo makende ahinya ma ng’ato nyalo bedogo.—Mathayo 22:37, 38.
1. TEGURU WINJRUOKU GI JEHOVA
GIMA MUMA WACHO: ‘Jehova wacho kama: “Kendo anabednu wuoro, to unubed yawuota kod nyiga.”’ (2 Jo-Korintho 6:18) Jehova dwaro ni ibed osiepne machiegni. Lamo en yo achiel mar timo mano. Jehova gweli ni iwuo kode e ‘lamo kinde duto.’ (1 Jo-Thesalonika 5:17) Odwaro winjo weche manie chunyi kod gik ma chandi. (Jo-Filipi 4:6) Sama iwuoyo gi Nyasaye e lamo kanyachiel gi joodi, ibiro nene kaka ng’ato madier.
Dwarore bende ni iwinj dwond Nyasaye to ok mana wuoyo kode kende. Inyalo timo mano kuom puonjruok Wachne kod buge ma lero Muma. (Zaburi 1:1, 2) Par matut kuom weche mipuonjori. (Zaburi 77:11, 12) Dhi e chokruoge mag Jokristo ma ok ibari bende biro nyiso ni iwinjo dwond Nyasaye.—Zaburi 122:1-4.
Wuoyo gi jomamoko e wi Jehova bende en yo machielo ma dwarore e tego winjruokni kode. Kaka imedo timo kamano e kaka ibiro medo sudo machiegni ahinya kode.—Mathayo 28:19, 20.
GIK MUNYALO TIMO:
Ket kinde pile ka pile mar somo Muma kendo lemo
Uduto kaka joot, keturu weche mag lamo motelo, kar weche mag manyo mor kod yueyo
2. BEDURU GI LAMO MAR JOOT
GIMA MUMA WACHO: “Suduru machiegni gi Nyasaye to en bende nosud iru.” (Jakobo 4:8) Onego uket chenro mar bedo gi lamo mar joot* ma ok ubaru. (Chakruok 18:19) Kata kamano, pod nitie gik ma dwarore. Nyaka uket Nyasaye e ngimani mapile. Teg winjruok ma joodi nigo gi Nyasaye kiwuoyo kuome “kibedo e odi, kendo kiwuotho e yo, kidhiyo nindo, kendo kia malo.” (Rapar mar Chik 6:6, 7) Tem ahinya mondo ibed kaka Joshua ma nowacho kama: “An kod jooda, wanati ni Jehova.”—Joshua 24:15.
GIK MUNYALO TIMO:
Ket chenro mar tiegruok ma ok ubaru ka iketo e paro dwaro mar ng’ato ka ng’ato e odi