Puonjri Kuom Yo ma Yesu Nonyagorego gi Tembe

Mapiyo bang’ ka Johana osebatiso Yesu, roho mar Nyasaye tayo Yesu nyaka e thim ma Judea. En gi weche mang’eny e pache. Sama ne ibatise, “polo noyawore.” (Mathayo 3:16) Omiyo, nonyalo paro gik ma ne osepuonjre kod ma notimo kane en e polo. Kuom adier, en gi weche mathoth monego opar matut!

Yesu tieko odiechienge 40 kod otieno 40 e thim. Pok ochamo gimoro kuom kindego duto. Koro sama kech kayo Yesu ahinya kamano, Satan Jachien biro ire mondo oteme kowachone niya: “Ka in wuod Nyasaye, nyis ane kitegi mondo gilokre chiemo.” (Mathayo 4:3) Yesu kwedo temno nikech ong’eyo ni teko momiye mar timo hono ok en mar timo dwache owuon.

Jachien ok we gi kanyo. Otemo yo moro machielo. Okawo Yesu kendo otere malo e wi tat hekalu kae to onyise ni dirri ane piny. Kata kamano, Yesu ok tim kamano nikech ok odwar nyisore. Yesu tiyo gi Ndiko e nyiso ni ok en gima kare temo Nyasaye e yo ma kamano.

Eka e tem mar adek, Jachien tiyo gi yo moro monyisogo Yesu “pinjeruodhi duto mag piny kod ber mar duong’ ma gin-go” kendo owachone kama: “Magi duto abiro miyi kigoyo chongi piny mitimo tim achiel mar lama.” Yesu kendo kwede ka wachone ratiro niya: “Dhi kucha Satan!” (Mathayo 4:8-10) Yesu ok lwar e tem mar timo richo nimar ong’eyo ni Jehova kende e ma onego olam. Ee, oyiero mar nyiso yie motegno kuom Nyasaye.

Wanyalo yudo puonj kokalo kuom tembe ma Yesu noyudo kod kaka noloyogi. Mago ne gin tembe masie, kendo mano nyiso ni Jachien nitie adier, to ok en mana kido moro marach ma ji nigo, kaka jomoko wacho. En ng’at ma nitie adier ma wang’ dhano ok nyal neno. Tem mar adekni bende nyiso ni adier sirkande mag pinyni gin mag Jachien kendo en e ma ochikogi. Omiyo, mano ne en tem madier. Ka ok kamano, to kare ere kaka Jachien ne nyalo wacho ni obiro miyo Kristo sirkandego ka ok en e wuon pinjeruodhigo?

E wi mano, Jachien nonyiso ni oikore mar miyo Yesu mich kapo ni Yesu otimo tim achiel mar lame, kendo ne oikore kata mana miye pinjeruodhi duto mag piny. Jachien nyalo temowa e yo ma chalo kamano. Onyalo keto e nyimwa gik ma lombo wang’ kaka manyo mwandu kata telo ma ji nigo e pinyni. Donge en gima nyiso rieko ka waluwo ranyisi mar Yesu mar nyiso yie motegno kuom Nyasaye kata bed ni waromo gi tem matek ma chalo nade? Kata kamano, ng’e ni Jachien noweyo Yesu korito “nyaka chop kinde machielo mowinjore.” (Luka 4:13) Mano bende e gima nyalo timorenwa, omiyo nyaka wasik ka watang’.