Yesu Timo Honni gi Teko mar Ng’a?

Mapiyo bang’ wuoyo e wi weyo ne ji richo ka en e dala Ja-Farisai milungo ni Simon, Yesu chako wuodhe mar ariyo mar yalo e alwora mar Galili. Koro en hike mar ariyo koyalo. Ok en kende e wuodheno. En gi jootene 12, kanyachiel gi mon moko ‘ma ne osechango kane ogolonegi jochiende kod tuoche.’ (Luka 8:2) Moko kuom mon-go gin Maria Magdalina, Susana, kod Joana, ma chwore ochung’ ne od Ruoth Herode Antipa.

Kaka ji mang’eny medo ng’eyo Yesu, e kaka ji medo bedo gi paro mopogore opogore e wi tije. Mani nenore ayanga sama okelne ng’at moro ma muofu, ma momo, kendo ma nigi jochiende, kae to ochange. Koro jochiende oweyo ng’atno kendo onyalo neno, bende onyalo wuoyo. Ji hum ahinya kendo gipenjore niya: “Dibed ni ma e Wuod Daudi, koso?”​—Mathayo 12:23.

Oganda molworo ot ma Yesu nitie ng’eny ahinya ma Yesu kod jopuonjrene ok nyal kata mana yudo thuolo mar chiemo. Kata kamano, nitie jomoko ma ok yie ni Yesu en “Wuod Daudi” ma ne osing wachne. Jondiko kod Jo-Farisai moko obiro kowuok Jerusalem man mabor gi kanyo. Kata kamano, ok gibiro ni mondo gipuonjre kuom Yesu kata riwe lwedo. Jogo wacho ne ogandano kama: “En gi Belzebub.” Gitemo nyiso ni Yesu tiyo kanyachiel gi “jatelo mar jochiende.” (Mariko 3:22) Sama wede Yesu winjo wach ywaruok ma dhi nyime, gibiro mondo gimak Yesu. Nikech ang’o?

Nyaka chop sani, owete Yesu owuon pod ok oyie ni Yesu en Wuod Nyasaye. (Johana 7:5) Yesu ma sani miyo ogandano bedo gi koko kamano ok e Yesu ma ne ging’eyo ka dongo kodgi e taon mar Nazareth. Ging’ado ni nyaka bed ni gimoro rach kode. Omiyo, giwacho niya: “Wiye osekethore.”​—Mariko 3:21.

Kata kamano, gik ma Yesu timo nyiso ang’o kuome? Yesu eka oa chango ng’at ma nigi jachien, kendo ng’atno koro nyalo neno kendo wuoyo. Onge ng’at ma nyalo kwedo mano. Omiyo, jondiko gi Jo-Farisai temo jaro gima Yesu otimono ka gitiyo gi miriambo e donjone. Giwacho kama: “Jali golo jochiende kotiyo mana gi teko Belzebub, jatelo mar jochiende.”​—Mathayo 12:24.

Yesu ong’eyo paro ma jondiko kod Jo-Farisai nigo. Omiyo, owacho kama: “Pinyruoth ma nigi ywaruok e kinde owuon, kethore, kendo taon kata dala ma nigi ywaruok e kinde owuon ok bi chung’. Kamano bende, ka Satan golo Satan, osebedo gi ywaruok e kinde owuon; kare ere kaka pinyruodhe biro chung’?”​—Mathayo 12:25, 26.

Donge weche ma Yesu owachogo gin adier ma ok nyal kwed? Jo-Farisai ong’eyo ni nitie Jo-Yahudi moko ma gologa jochiende. (Tich Joote 19:13) Omiyo, Yesu penjogi kama: “Ka agolo jochiende ka atiyo gi teko mar Belzebub, un to jou gologi gi teko mar ng’a?” E yo machielo, gima Yesu wachonegi en ni ka ogolo jochiende e yo ma giwachono, to kare gin bende joggi gologa jochiende e yo achielno. Kae to Yesu medo leronegi niya: “To ka agolo jochiende ka atiyo gi roho mar Nyasaye, adier, Pinyruodh Nyasaye osebironu kukia.”​—Mathayo 12:27, 28.

Yesu chiwo ranyisi moro mondo onyisgo ni sama ogolo jochiende, mano nyiso ni en gi teko moloyo Satan. Owacho kama: “Ere kaka ng’ato nyalo monjo od ng’at ma ratego kendo maye gige, mak mana kokwongo otueyo ng’atno? Mana bang’ mano eka koro onyalo yako ode. Ng’ato ang’ata ma ok ni kora kedo koda, to ng’at ma ok chok ji koda, en ng’at ma keyogi.” (Mathayo 12:29, 30) En adier ni jondiko kod Jo-Farisai kwedo Yesu kendo mano nyiso ayanga ni Satan tiyo kodgi. Gikeyo ji mondo obed mabor gi Wuod Jehova Nyasaye, ma en Jal ma Jehova ooro.

Yesu chiwo siem ne jo akwede ma tiyo e lo Satan-go niya: “Gik moko duto ma nyithind dhano otimo, ibiro wenegi, kata bed ni gin richo mage kata weche manade mag ayany. To ng’at ma chayo roho maler ok nowene nyaka chieng’, to obedo gi ketho mar richo mochwere.” (Mariko 3:28, 29) Par ane gima wechego nyiso ni biro yudo joma wacho ayanga ni tich mitimo kokalo kuom roho mar Nyasaye en tij Satan!