Jo-Nazareth Kwedo Yesu Kata Obedo ni Otimo Honni

Yesu osebedo gi odiechieng’ modich ahinya. Bang’ a e alwora mar Dekapoli gi yie, ne ochango dhako ma rembe ne chuer kendo nochiero nyar Jairo. Kata kamano, odiechieng’no pok orumo. Sama Yesu wuok e dala Jairo, ji ariyo ma muofni luwe ka gikok niya: “Kechwa, Wuod Daudi.”​—Mathayo 9:27.

Sama giluongo Yesu ni “Wuod Daudi,” jogo nyiso ni gin gi yie ni Yesu e ruoth ma ne dhi kawo kom-loch mar Daudi kendo bedo Mesia. Yesu timore ka gima ok owinj ywakgi. Nyalo bedo ni otimo kamano mondo one kabe adier gidwaro ni ochanggi. To adier mano e gima gitimo. Sama Yesu donjo e ot, ji ariyogo luwe nyaka iye. Yesu penjogi niya: “Be un gi yie ni anyalo timo mae?” Gidwoko ka gin gadier kama: “Ee, Ruoth.” Gikanyono, Yesu mulo wengegi kowacho niya: “Mana kaka yieu obet, we otimrenu mana kamano.”​—Mathayo 9:28, 29.

Parie ni koro ginyalo neno! Mana kaka Yesu osebedo ka chiko jomamoko e kinde motelo, ochikogi ni kik giland wach gima oa timono. Kata kamano, nikech mor mogundho ma gin-go, bang’e gidhi kendo gilando wachne nyakakuonde maboyo.

Sama ji ariyogo wuok, ji kelo ne Yesu ng’at moro ma ok nyal wuoyo nikech en gi jachien. Yesu golo jachiendno kendo gikanyono ng’atno chako wuoyo. Oganda hum ka giwacho niya: “Gima kama pok ne one ngang’ e piny Israel.” Jo-Farisai bende ni kanyo kotimo honono, omiyo ok ginyal tamore ni ok gineno hono ma Yesu otimono. Koro ginwoyo mana wach ma gisebedoga ka gidonjonego. Giwacho kama: “Jali golo jochiende kotiyo gi teko mar jatelo mar jochiende.”​—Mathayo 9:33, 34.

Mapiyo bang’ mano, Yesu dok Nazareth taon ma dalagi. Sani odok ka en gi jopuonjrene. Ne opuonjo e sunagogi ma kanyo chiegni higa achiel mokalo. E kindeno, ji nohum gi gik ma ne owacho. Kata kamano, bang’e ne gichwanyore nikech puonjne, mi gitemo mondo ginege. Sani Yesu temo kendo mondo okony joma odak e taon ma dalagino.

Yesu duogo chieng’ Sabato mondo opuonj e sunagogi. Thoth ji hum nono gi puonjne, kendo chopo kama gipenjo kata niya: “Ng’atni nogolo riekogi kod tije madongogi kanye?” Giwacho kama: “Donge jali e wuod fundi baocha, koso? Donge min mare iluongo ni Maria kendo owetene gin Jakobo gi Josef gi Simon kod Judas? Kendo nyiminene duto ok gin kodwa, koso? To kare magi duto ne oyudo kanye?”​—Mathayo 13:54-56.

Ji neno Yesu mana ka ng’at ma odongo e gweng’ kanyo. Nyalo bedo ni giparore kama: ‘Ne wanene ka odongo, omiyo ere kaka onyalo bedo Mesia?’ Kuom mano, kata obedo ni giseneno rieko makende ma Yesu nigo kod honni madongo motimo, pod gikwede. Kata mana wede Yesu ma ong’eye maber bende chwanyore. Omiyo, Yesu wacho kama: “Ji miyo janabi duong’, mak mana e gweng’gi kod ode owuon.”​—Mathayo 13:57.

Kuom adier, Yesu wuoro kaka jogo onge gi yie. Omiyo, Yesu ok tim honni madongo kanyo “mak mana keto lwete kuom ji manok ma ne tuo mondo ochanggi.”​—Mariko 6:5, 6.