Ochang Jodhoho Apar to Achiel e ma Duogo Goyo Erokamano

Yesu dhi nyaka e taon mar Efraim man yo nyandwat mar Jerusalem. Otimo kamano mondo chenro ma Sanhedrin nigo mar nege kik timre. Obet gi jopuonjrene kuro ma en kuma bor gi jowasike. (Johana 11:54) Kata kamano, sawo mar Pasaka mar higa 33 chiegni, omiyo Yesu wuok kanyo kendo. Owuok kochomo malo Galili kokadho e i Samaria kendo mano e limbene mogik e alworano ka pok onege.

E chak wuodheno, koa e gweng’ moro kodhi e machielo, Yesu romo gi ji apar ma nigi tuo mar dhoho. Seche moko tuo mar dhoho chopoga e okang’ ma oketho dend ng’ato marach. Onyalo chodo mosmos lith lwet ng’ato, kokene, kata ite. (Kwan 12:10-12) Chik Nyasaye dwaro ni jadhoho odag kar kende, kae to ka ng’ato dhi romo kode to okog gi dwol maduong’ ni, “Ok aler, ok aler.”​—Tim Jo-Lawi 13:45, 46.

Kuom mano, jodhoho apargo bet mabor gi kuma Yesu nitie. To e ma pod gikok gi dwol maduong’ niya: “Yesu, Japuonj, kechwa!” Bang’ neno jodhohogo, Yesu chikogi kama: “Dhiuru mondo unyisru e nyim jodolo.” (Luka 17:13, 14) Wechego nyiso ni Yesu miyo chik Nyasaye luor. Chik dwaro ni jodolo e ma opwodh kendo oland ni jadhoho osechango adier. Bang’e, koro ginyalo dak gi jomamoko kendo.​—Tim Jo-Lawi 13:9-17.

Jodhoho apargo keto yie kuom teko ma Yesu nigo mar timo honni. Omiyo, kata obedo ni pok gichango, giwuok leplep mondo gidhi ir jodolo. Sama pod gin e yo ka gidhi, yie ma gin-go kuom Yesu konyogi. Gichako fwenyo kendo winjo ka koro gisechango maber!

Jodhoho ochiko dhi nyime gi wuoth. Achiel to lokore. Jalno en Ja-Samaria ma bende osechango kuom dhohone. Odok mondo omany Yesu. Nikech ang’o? Nikech omor ahinya gi gima Yesu osetimone. Ng’at ma yande en jadhohono ‘pako Nyasaye gi dwol maduong’’ nikech ong’eyo ni Nyasaye e ma ochange. (Luka 17:15) Bang’ yudo Yesu, opodho e nyime kendo ogoyone erokamano.

Yesu penjo joma olwore koni gi koni kama: “Donge ji apar duto nodoko maler, koso? To kare jomamoko ochikoka ni kanye? Onge kata ng’ato achiel kuomgi moseduogo mondo omi Nyasaye duong’, mak mana jal moa e oganda machieloni?” Kae to Yesu wacho ne Ja-Samariano niya: “A malo mondo idhi; yieni osemiyo ichango.”​—Luka 17:17-19.

Kuom chango jodhoho apargo, Yesu nyiso ni Jehova Nyasaye ni kode. Inyalo wach ni achiel kuom ji apar ma Yesu ochangogo koro ni e yor ngima. Kindegi, Nyasaye ok ti gi Yesu e timo honni ma kamago. Kata kamano, ka wan gi yie kuom Yesu, wanyalo bedo e yo ma dhi e ngima, to ok ngima angima, to ngima mochwere. Be wan gi chuny mar goyo erokamano kaka ma Ja-Samariano ne nigo?