“Gouru Erokamano”
1 Kane Yesu ochango jodhoho apar, ng’at achiel kende kuomgi ema ne oduogo goyone erokamano. Yesu ne openjo kama: “Ne ok gin ji apar mopwodhore koso? To ji ongachiel [“ochiko,” Luo, 1976] eke?” (Luka 17:11-19) Mano kaka en gima duong’ ka wagoyo erokamano kuom mich mabeyo duto kod chiwo malong’o momiwa gi Jehova Nyasaye, Wuonwa manie polo moherowa kendo ma jachiwo!—Kolo. 3:15; Jak. 1:17.
2 Moko kuom gik monego wagoye erokamano gin mage? Wagoyo erokamano nikech rawar ma en mich maduong’ ahinya ma Nyasaye omiyo dhano. (Joha. 3:16) Bende wagoyo erokamano ni Jehova kuom ywayowa ire. (Joha. 6:44) Winjruok ma wan-go kaka Jokristo en wach machielo mamiyo wagoyo erokamano. (Zab. 133:1-3) Onge kiawa ni inyalo paro mich mamoko mathoth ma a kuom Jehova. Ok wadwar bedo kaka Jo-Israel ma ne onge erokamano, ma wigi ne owil gi tije ma Jehova ne otimo mondo okonygi!—Zab. 106:12, 13.
3 Nyis Erokamano: Kata obedo ni jodhoho apargo duto nyalo bedo ni ne omor gi gima Yesu ne otimonegi, achiel kuomgi kende ema ne ogoyo erokamano. (Luka 17:15) Kamano bende, wanyiso erokamano kuom lendo gi kinda. Ka kuom adier wan gi erokamano nikech gigo duto ma Wuonwa manie polo moherowa osetimo, chunywa biro dwaro nyiso hera kaka mare kod chuny mar chiwo ka wawuoyo gi jomoko kuome. (Luka 6:45) E wi mano, sama wanyiso jomoko ‘honini mang’eny, gi paro’ mag Jehova kuomwa, herawa kod erokamano ma wagoyo ne Jehova biro medore.—Zab. 40:5.
4 Jiw Jomoko Obed Joma Goyo Erokamano: Onego wamany yore mag konyogo nyithindwa kod jopuonjrewa mag Muma mondo obed joma goyo erokamano. Jonyuol nigi thuolo mang’eny mag timo kamano, kaka seche ma giwuoyo gi nyithindgi kuom chwech mag Jehova. (Rumi 1:20) Seche ma wapuonjore Muma gi japuonjrewa, wanyalo penje kama, “Wachni nyisowa ang’o kuom kit Jehova?” Kaka japuonjre medo bedo ng’ama goyo erokamano, e kaka obiro medo hero Nyasaye kendo ng’ado ni obiro miye mor.
5 E ndalo mag gikogi, ji mang’eny ok go erokamano. (2 Timo. 3:1, 2) Mano kaka en gima moro Jehova neno jotichne mochiwore ka nyiso erokamano kuom lendo gi kinda!—Jak. 1:22-25.