Jo-Farisai Yware gi Ng’at ma Chon ne En Muofu

Jo-Farisai otamore yie ni Yesu nochango jal ma ne onyuol ka en muofu. Omiyo, giluongo jonyuolne. Jonyuol ng’atno oluor ni wachno nyalo miyo ‘oriembgi gia e sunagogi.’ (Johana 9:22) Ka oriembgi mondo kik giriwre gi Jo-Yahudi mamoko, mano nyalo miyo ngima obednegi matek korka weche mag yuto kata dak e kind jowetegi.

Jo-Farisaigo penjo jonyuolgo penjo ariyo kama: “Be jali en wuodu, ma uwacho ni ne unyuolo ka en muofu? Kare obet nade ni koro sani oneno?” Jonyuolgo dwokogi niya: “Wang’eyo ni jali en wuodwa kendo ni nonyuole ka en muofu. To gimomiyo sani koro oneno ok wang’eyo; kata ng’at ma noyawo wengene ok wang’eyo.” Kata kapo ni wuodgi ne osenyisogi gima ne otimore, jonyuolgo otang’ e yo ma gichiwogo dwoko. Giwachonegi niya: “Penjeuru. En ng’at maduong’. Nyaka owuo mana e loye owuon.”​—Johana 9:19-21.

Kuom mano, Jo-Farisai luongo jalno kendo, kae to gitemo bwoge ka giwacho ni gin gi weche ma ginyalo donjogo ne Yesu. Gichuno ng’atno kama: “Mi Nyasaye duong’; wang’eyo ni ng’atno en jaricho.” Ng’at ma ne en muofuno nyiso ni ok oyie gi wach ma gidonjonego Yesu. Owachonegi niya: “Kata ka en jaricho ok ang’eyo. Kata kamano, onyisogi ni: “Gimoro achiel ma ang’eyo en ni, ne an muofu sani to koro aneno.”​—Johana 9:24, 25.

Nikech pok gichopo e gima gidwaro, Jo-Farisai medo penje niya: “Ang’o ma a otimoni? Ne oyawo nade wengeni?” Ng’atno choko chir kae to oparonegi kama: “Donge asewachonu, to e ma pod ok uwinj? Ang’o momiyo udwaro winjo wachni kendo? Koso un bende udwaro bedo jolupne?” Mirima mako Jo-Farisaigo kendo gikwedo ng’atno kama: “In japuonjre ng’atno, to wan, wan jopuonjre Musa. Wang’eyo ni Nyasaye osewuoyo gi Musa; to ng’atno, ok wang’eyo kama oaye.”​—Johana 9:26-29.

Jakuechono hum kendo owachonegi kama: “Kuom adier, en gima iwuoro ahinya ni ok ung’eyo kama oaye, to en e ma noyawo wengena.” Kae to jalno chiwo paro ma ok nyal kwed konyisogo joma Nyasaye winjo lamogi kendo moyiego. Owachonegi niya: “Wang’eyo ni Nyasaye ok winj joricho, kata kamano ng’ato ang’ata moluoro Nyasaye kendo ma timo dwache, owinjo ng’atno. Chakre nene, pok nowinjie ngang’ ni ng’ato oyawo wenge ng’at ma nonyuol ka en muofu.” Mano miyo jakuechono tieko ka wacho kama: “Ka dine bed ni ng’atno ok oa kuom Nyasaye, onge gima dotimo kata matin.”​—Johana 9:30-33.

Nikech Jo-Farisaigo ok nyal kwedo paro ma jakuechono ochiwo, gijare kama: “Ne onyuoli e richo kama, ere kaka diketri ni ipuonjowa?” Giriembe oa e sunagogi.​—Johana 9:34.

Yesu winjo wach gima osetimoreno. Bang’e, oyudo jalno kae to openje kama: “Be iketo yie kuom Wuod dhano?” Jal ma ne osechangno dwoko niya: “To ruoth, jalo en ng’a mondo aket yie kuome?” Yesu nyise moriere kama: “In isenene kendo kuom adier jal ma wuoyo kodini e ng’atno.”​—Johana 9:35-37.

Jalno dwoke niya: ‘Ruoth, aketo yie kuom ng’atno.’ Jalno kulore e nyim Yesu kendo nenore maler ni en gi yie. Yesu nyise wach moro makende niya: “Ne abiro mondo Nyasaye ong’ad ne piny bura, mondo joma ok nen onen, to joma neno obed muofni.”​—Johana 9:38, 39.

Jo-Farisai man kanyo ong’eyo ni ok gin muofni. To nade migawo ma giparo ni gin-go mar puonjo ji wach Nyasaye? Gipenjo Yesu ka gitwo dhogi kama: “Iparo ni wan bende wan muofni, koso?” Yesu dwokogi niya: “Ka da bed ni un muofni, dikoro uonge richo. To koro un uwacho ni, ‘Waneno.’ Richou siko.” (Johana 9:40, 41) Ka dine bed ni ok gin jopuonj e Israel, ne inyalo wach ni gikwedo Yesu kaka Mesia nikech gikia. To nikech gilony gi weche manie Chik, timgi mar kwedo Yesu en richo maduong’ miwuoro.