Kony Joma Muofni Mondo Ong’e Jehova

1. Yesu nokecho joma muofni e yo mane?

¹ Ne odong’ mana ndalo matin to Yesu tho. Chieng’ moro ka nowuok e dala mar Jeriko, muofni moko ariyo nokok matek ka kwaye niya: ‘Ruoth, kechwa!’ Kata obedo ni Yesu ne paro ahinya kuom tembe ma ne odhi romogo bang’ ndalo matin, pod ne ochung’ moluongo muofnigo, mi ochangogi. (Mat. 20:29-34) Ere kaka wanyalo kecho joma muofni kaka Yesu notimo?

2. Ka waromo gi ng’at ma muofu, ere kaka wanyalo lendone?

² Chiwri Konyogi: Kapo ni iromo gi ng’ama muofu kamoro, nyise nyingi, kendo ipenje ka nitie yo moro amora ma inyalo konyego. Nikech kinde mang’eny ji ohero tiyo kodgi marach, onyalo chich kodi. Kata kamano, kapo ni idewe gadier to onyalo bedo thuolo kodi. Ng’e ni nitie muofni ma wengegi nyalo neno matin to nitie moko ma ok nen chuth, kendo mano nyalo konyi ng’eyo kony ma inyalo chiwo. Bang’ ka isechiwo kony mowinjore, inyalo nyise ni ipuonjoga ji weche manie Muma. Inyalo somone ndiko kaka Zaburi 146:8, kata Isaiah 35:5, 6. Kapo ni ong’eyo somo Braille, inyalo penje kabe inyalo miye buk moro molos ne joma muofni mondo okonygi ng’eyo weche Muma e yo matut. Bende, inyalo konye yudo buge momak miwinjo ma yudore e jw.org. Kapo ni en gi program moro e kompyuta ma somo gi dwol weche mondik e skrin mar kompyutane, nyise ni onyalo somo sula mopogore opogore e jw.org kaachiel gi buge mamoko minyalo gol e fomat mar RTF (Rich Text Format).—Som sanduk ma wiye wacho ni “Kaka Wanyalo Konyo Ng’at ma Muofu.”

3. Ere kaka wanyalo manyo muofni manie alworawa mar lendo?

³ Many Joma Muofni: Ok wajoromo ahinya gi joma muofni sama walendo ot ka ot nikech ng’enygi ok ni thuolo wuoyo gi joma gikiya. Omiyo, dwarore ni watim kinda mar ‘manyo’ joma kamago mondo walandnegi wach maber. (Mat. 10:11) Be ing’eyo jaskundu moro kata jatich wadu ma en muofu? Tem ahinya chako mbaka kode. Kapo ni nitie skul moro mar muofni e alworau mar lendo, unyalo miyogi bugewa moko mag Braille mondo giket e laibrari mar skundgi. Be ing’eyo ng’at moro ma watne en muofu? Be nitie riwruoge e alworau mar lendo ma chiwo kony ne muofni kata momiyo muofni kuonde dak? Inyalo lero ne ng’at ma watne muofu, kata ne ng’at ma tiyo e riwruogego, kata jatendgi ni Joneno mag Jehova diher ahinya konyo muofni, kendo inyalo nyise ni diher kelone buge mag Braille kata momak miwinjo. Somne singo ma Muma chiwo ni Nyasaye chiegni yawo wenge muofni, kendo onge ng’at ma biro bedo muofu kendo. Bende, inyalo nyise vidio manie jw.org ma wiye wacho ni “Without It, I Would Feel Lost,” ma wuoyo kuom dichwo moro ma muofu ma nigi Muma mar Braille mosekonye ahinya. Ka ileronegi maler gimomiyo ilimogi, mano nyalo miyo giyieni wuoyo gi muofni man kuondego.

4. Ang’o mwanyalo puonjore kuom gima Janet ne otimo?

⁴ Nyaminwa moro ma muofu miluongo ni Janet ne odhi lendo kuonde ma muofni odakie. Ne ochako mbaka gi dhako moro. Janet nonyise ni, “Yesu ne oyawo wenge joma muofu konyiso gima ne odhi timo ne muofni duto kinde ma biro.” Ne osomone Fweny 21:3, 4, kae to olerone kaka Pinyruodh Nyasaye biro chopo singo monyis e ndikono. Dhakono ne oling’ matin kae to owacho kama: “Pok ne awinjoga ka ng’at ma muofu wacho wechego. Thoth ji ma ok muofni paroga ni ji bedoga muofni nikech ketho moro ma ne gitimo, kata ma kweregi notimo.” Janet nooro ne dhakono bug Muma Puonjo e Intanet, kendo sani gipuonjore diriyo e juma.

5. Kata obedo ni ok wanyal yawo wenge muofni kaka Yesu notimo, wanyalo yudo ber mage sama wakechogi?

⁵ En adier ni, ok wanyal yawo wenge muofni kaka Yesu notimo, kata kamano wanyalo yawo pach joma nyasach ndaloni osedino, moriwo nyaka muofni mondo ging’e adiera mar Wach Nyasaye. (2 Kor. 4:4) Ka Yesu ne a Jeriko ne ochango chwo ariyo ma muofnika nikech “nokechogi.” (Mat. 20:34) Ka wakecho joma muofni kaka Yesu notimo, wan bende wabiro yudo thuolo mar konyo moko kuomgi mondo ging’e Jehova, ma e Nyasaye ma biro yawo wenge muofni duto.