Siro Tije mag Pinyruoth e Alworau Kendo e Piny Ngima

JONENO MAG JEHOVA osebedo ka yalo wach maber “nyaka kuonde maboyo mogik e tung’ piny” mana kaka Yesu nokoro. (Tich 1:8; Mat. 24:14) Mano osemiyo gichiwo thuologi kod tekogi e puonjo ji weche Nyasaye. Nikech gigeno ni Jehova biro siro jo ma tiyo kanyachiel kode, gidhi nyime keto Pinyruodh Nyasaye obed mokwongo e ngimagi. (Mat. 6:25-34; 1 Kor. 3:5-9) Nyak mosebetie nyiso maler ni Jehova oyie gi jotichne kendo oguedhogi.

SIRO TIJE MAG PINYRUOTH E PINY NGIMA

² Sa ma ji neno yore ma wayalogo kendo kaka wapogo Muma gi buge ma lero Muma ma onge chudo, jomoko penjoga niya: “Ere kaka mago duto nyalo timore?” En adier ni goyo Muma kod buge ma lero Muma dwaro pesa. Pesa bende dwarore mondo ogergo ute mag Bethel kendo oritgi mondo jo ma goyo buge, jo ma tayo tij yalo, kod jo ma timo tije mamoko ma siro tije mag yalo wach maber otiye kendo odagie. E wi mago, jorit-alwora, jo misonari, jo painia makende, kod jo mamoko ma tiyo ne Nyasaye kuom thuologi duto imiyoga nya pesa moro matin mondo okonygi gidhi nyime gi tijgi. En adier ni tij yalo wach maber e ndalowagi, bed ni itime e alworawa kata e piny mangima, en gima dwaro pesa mang’eny ahinya. Pesago duto a kanye?

³ Ji mang’eny mohero tich ma Joneno mag Jehova timo mar puonjo ji Muma, gologa chiwo misirogo tijwa e piny mangima. Kata kamano, chiwo ma Joneno wegi gologa e ma siro tijni e okang’ malach. Moko kuomgi oroga chiwogi ne bad ofis man thurgi. Jonenogo nyiso chuny mar chiwo kaka ma jo Nyasaye machon ne nigo ka ne gisiro tij gero od lamo Jehova. (Wuok 35:20-29; 1 We. 29:9) Chiwo moko wuok kuom gik ma ji osingo ni ochiw ne Joneno bang’ thogi, to chiwo moko wuok kuom ji achiel achiel, kanyakla ka kanyakla, kod alwora ma kanyaklago wuokie. Kinde mang’eny, gigologa chiwogo matin tin. Chiwogo duto koriw kanyachiel e ma miyo tij Nyasaye dhi nyime.

⁴ Joneno mag Jehova neno ni tiyo gi pesagi kod mwandugi mamoko e tij yalo en gueth makende. Yesu kod jopuonjrene ne niga gi sandug pesa ma ne gikonyorego. (Joh. 13:29) Muma wuoyo kuom mon moko ma ne tiyo tije ma ne konyo Yesu kod jopuonjrene. (Mar. 15:40, 41; Luka 8:3) Jaote Paulo ne mor gi chiwo ma ne imiyega koa kuom jo ma ne dwaro ni tij yalo wach maber onya kod jo ma ne dwaro ni gin bende gimakie ka moro e tij Nyasaye. (Fil. 4:14-16; 1 The. 2:9) Joneno mag Jehova pod dhi nyime nyiso chuny mar kinda kod mar chiwo ma jo ma chon-go ne nyiso. Kuom mano, gimiyo jo ma chunygi ni kare yudo “pi ngima nono” ka moro amora ma giyudoree.​—Fwe. 22:17.

KONYO E TIJE MAG KANYAKLAU

⁵ Chiwo ma jo kanyakla golo e ma gichulogo gik ma dwarore e kanyaklagi. Onge solro michoko kata kwan mag pesa mondik ne ng’ato mondo ogol. Sanduge mag chiwo iketoga kuondewa mag chokruok mondo ng’ato ka ng’ato ma dwaro, olutie chiwone “mana kaka oseng’ado ei chunye.”​—2 Kor. 9:7.

⁶ Pesa mochiw ikwongoga chulgo gik ma dwarore e rito Od Romo. Bura mar jodongo nyalo yango ni pesa moko gior ne bad ofis mar Joneno mag Jehova mondo ochwalgo tijwa mar piny mangima. Ka pok gitimo kamano, onego gipenj kanyakla mondo opwodh chiwono e yor singo. Mano e kaka kanyakla mang’eny oroga chiwogi mapile ne siro tij piny mangima. Ka jo kanyakla duto ong’eyo gik monego otim ma dwaro pesa kinde ka kinde, ok bi chuno ni lendo mag pesa obedie nya dinwoya.

KAKA ONEGO ORIT PESA MA JI CHIWO

⁷ Bang’ chokruok ka chokruok, owete ariyo biroga golo pesa ma ji oseluto e sanduk kae to gikwanogi kendo gindikogi e risit. (2 Ru. 12:9, 10; 2 Kor. 8:20) Bura mar jodongo biro loso chenro mondo gine ni okan pesago maber nyaka chop orgi ne bad ofis kata loyogo dwaro mag kanyakla. Owadwa ma rito migawo mar pesa e kanyakla biroga loso ripot mar pesa dwe ka dwe mondo onyisgo kanyakla kaka weche pesa chalo, kae to bang’ dweche adek ka dweche adek, jachan bura mar jodongo biro timo chenro mondo onon rekod mag pesa mondo one ka be orit migawono e yo maber.

GARAMA MAR CHOKRUOG ALWORA

⁸ Joneno manie kanyakla ma loso alwora achiel e ma gologa chiwo ma itiyogo e chokruoge mag alwora. Iketoga sanduge mag chiwo ka mitimoe chokruogego mondo jo ma nigi chiwo olutie. E wi mano, mondo ochul garama mamoko mag alworano, kanyakla mopogore opogore oroga chiwo maggi e kinde mamoko.

⁹ Ka ber, chiwo moyud e chokruok mar alwora e ma onego ochulgo weche duto motudore gi chokruogno, kae to pesa modong’ inyalo chiw mondo osir tij piny ngima. Ka po ni onge pesa moromo e akaunt mar alwora ma nyalo chulo gik ma dwarore e chako chokruok ma luwo, kaka chulo deposit mar ka ma ibiro timie chokruok, jarit-alwora nyalo kwayo mondo onyis kanyakla manie alworane ting’ ma gin-go mar golo chiwo. Bura ka bura mar jodongo biro yango kwan mar pesa ma kanyaklagi nyalo oro e akaunt mar alwora. Kae to bang’ mano, gibiro penjo kanyakla mondo opwodh mano e yor singo.

¹⁰ Ka po ni onge pesa moromo e akaunt mar alwora to idwaro ni jodong-kanyakla mag alworano ong’e wachno, ibiro tim romo mar jodong’ alworano e odiechieng chokruok mar alwora. Mopogore gi garama mong’ere pile, weche mamoko duto motudore gi pes alwora onego opwodh gi jodongo e yor singo. Singogo onego onyis kwan sie mag pesa ma dwarore kae to kinde ka kinde midwaro ti gi pesago onego opwodhgi mondi.

¹¹ Itimoga chenro mondo onon rekod mag pes alwora.

KONYO JO MODHIER

¹² Achiel kuom gik momiyo Yesu kod jopuonjrene ne bedoga gi sandug pesa ne en konyo jo modhier. (Mar. 14:3-5; Joh. 13:29) Ting’ ma Jokristo nigono pod dhi nyime nimar Yesu nowacho niya: “Kinde duto un-ga gi jo ma odhier.” (Mar. 14:7) Ere kaka Joneno mag Jehova chopo ting’ni e ndalowagi?

¹³ Kinde moko, nitie Jokristo moko mochung’ motegno e kanyakla ma nyalo dwarore ni okony nikech hikgi oniang’, gin gi midekre, kata masira moro ma ok ginyal geng’o oyudogi. Joot, wede, kod jo mamoko mong’eyo ni jo ma kamago dwaro kony, nyalo konyogi. Timo kamano luwore gi weche ma jaote Johana nondiko kama: “Ng’at ma nigi gige pinyni kendo oneno ka owadgi ochando gimoro, to otamore keche, ere kaka onyalo wacho ni ohero Nyasaye? Un nyithindo matindo, ok onego wanyis hera mana gi wach kata gi lep kende, to bende gi tim kendo gi adiera.” (1 Joh. 3:17, 18; 2 The. 3:6-12) Lamo madier oriwo nyaka rito jogo momakore gi yie to ochando gige ringruok.​—Jak. 1:27; 2:14-17.

¹⁴ Ka ne jaote Paulo ondiko barua mokwongo ne Timotheo, nonyiso yo ma nonego okonygo jo mowinjore omi kony. Inyalo somo wechego e 1 Timotheo 5:3-21. Jakristo ka Jakristo e ma nigi ting’ mokwongo mar rito joode kuom gik ma gichando. Jo ma hikgi oniang’ kod jo midekre onego oyud kony koa kuom nyithindgi, nyikwagi, kata koa kuom wedegi mamoko. Nitie pinje ma sirkande olosoe chenro ma gikonyogo jo ma kamago. Omiyo, wede kata jo mamoko nyalo konyo jo mochandogo kuom pong’onegi fom mag kwayo konygo. Nitie chal moko ma nyalo betie ma dwaro ni kanyakla mangima opar wach konyo owete gi nyimine mochando, to gisebedo ka gitiyo ne Nyasaye ka gichung’ motegno. Ka po ni onge wede ma nyalo konyo jo ma kamago to sirkal bende onge gi kony moromo, bura mar jodongo nyalo ng’ado paro e wi yo minyalo konygigo. Jokristo neno ni en gueth makende e nyim Nyasaye tiyo gi mwandugi mag ringruok e konyo jo mochando.

¹⁵ Owete gi nyimine mathoth nyalo chando gik ma dwarore nikech sand, lwenje, yiengni mag piny, masira mar koth maduong’, kech, kata masiche mamoko ma nyalo yudo ji e kindewagi. (Mat. 24:7-9) Kanyakla nyalo koso gik ma ginyalo konyogo jowetegi. Kuom mano, Bura Matayo nyalo tiyo gi chiwo mag owete man kuonde mamoko mondo gichiwgo kony. Mano chalo mana gi kaka Jokristo ma ne odak e alwora mar Asia Minor nochiwo chiemo mondo gikonygo owete ma ne ni Judea e kinde kech. (1 Kor. 16:1-4; 2 Kor. 9:1-5) Kuom luwo ranyisi margi, wanyiso ni wahero owetewa kendo wanyiso ni adier wan jopuonjre Yesu Kristo.​—Joh. 13:35.

KAKA IPOGO BUGEWA NE JI

¹⁶ Muma kaachiel gi buge ma lero Muma itiyogo e okang’ malach e lando wach Pinyruoth. Kinde mang’eny, bura mar jodongo ketoga jakony-tich mondo orit migawo mar buge e kanyakla. Owete moket e migepego onego okawgi mapek kaka dwarore. Girito migepego e yo mong’ith mondo gine ni kwan mar buge gi gasede nitie moromo e kanyakla.

¹⁷ Nikech wan Jokristo mosechiwo ngimagi ne Nyasaye, wang’eyo ni thuolowa, nyalowa, tekowa, gi mwanduwa duto moriwo nyaka ngimawa gi muya ma wayueyo, gin mich moa kuom Nyasaye monego watinego. (Luka 17:10; 1 Kor. 4:7) Sa ma watiyo maber gi gige ringruok duto ma nyalo bedo ni wan-go, wanyiso okang’ ma waherogo Jehova. Dwaher ni wami Jehova duong’ kuom tiyone gi mwanduwa mabecho becho ka wang’eyo ni omor gi mich moro amora ma wachiwone ka wanyisogo ni wachiworene gi chunywa duto. (Nge. 3:9; Mar. 14:3-9; Luka 21:1-4; Kol. 3:23, 24) Yesu nowacho kama: “Nuyudo nono, omiyo chiwuru nono.” (Mat. 10:8) Sa ma wachiwore wawegi kendo tiyo gi mwanduwa e tij Jehova, wan bende wabedo gi mor mogundho.​—Tich 20:35.