Anyalo Timo Nang’o ka Jomoko Temo Rwaka e Timbe Nindruok?

INYALO TIMO NANG’O?

Par ane wachni: Heather oseng’eyo Mike mana kuom dweche ariyo kende, to chalne mana ka gima nong’eye chon ahinya. Ng’ato ka ng’ato oro ne nyawadgi sms sa te sa te, giwuoyo aming’a e simo, kendo ng’ato nyalo pong’o gima nyawadgi dwa wacho! Kata kamano, Mike koro dwaro gimoro machielo mopogore gi mbaka.

Kuom dweche ariyogo, Mike gi Heather osemana bedo ka mako lwetgi kendo gore kis mana matin. Heather ok dwar timo mang’eny mokalo kanyo. To bende ok odwar ni osiep manie kinde gi Mike orum. Mike e ma miyo owinjo ni kare en nyako ma jaber. Owacho e chunye niya, ‘Wan gi Mike waherore . . . ’

Kapo ni isechopo e higni mag donjo e kend kae to chal moyudo Heather oyudi, ditim nang’o?

PAR ANE MONDI!

Kapo ni ichikori kiwuok e yien nikech idwa fuyo ka winyo, onge kiawa ni ibiro hinyori marach. Mano e gima nyalo timoreni ka ok iluwo chike ma dwaro ni ji obed gi timbe maler kaka ma wacho ni: “Uweru gi terruok.”—1 Jo-Thesalonika 4:3.

En rach mane ma ng’ato nyalo yudo kapo ni ok oluwo chikno? Muma wacho niya: “Ng’ato ang’ata ma nigi tim mar terruok, otimo richo ne ringrene owuon.” (1 Jo-Korintho 6:18) Be mano en adier?

Joma timo nonro oseyudo ni rowere ma donjo e timbe mag nindruok ka pok gidonjo e kend yudoga rach maluwogi.

• PARRUOK MANG’ENY. Rowere mathoth ma donjo e timbe mag nindruok ywagoga ang’e bang’e.

• BEDO NG’AT MA OK NYAL GEN. Bang’ donjo e tim nindruok, rawera motimo timno dong’ga ka penjore e wi nyawadgi niya, ‘En ng’a kendo mosetimogo timni?’

• WINJO MALIT E CHUNYI. Nyiri mang’eny gomboga mako osiep gi jowuoyi ma biro ritogi to ok ma dwaro mana ni onind kodgi. Jowuoyi mang’eny bende yudoga ka teknegi hero nyiri ma ne gisenindogo.

• Wach maduong’ e ma: Kapo ni idonjo e timbe mag nindruok ka pok idonjo e kend, idwokori chien nikech ok irito mich ma jaber ma in-go. (Jo-Rumi 1:24) Dendi ok en gima onego ji otuggo atuga kaka gidwaro.

Nyis ni in ng’at ma ok nyal donjo e timbe mag terruok. (1 Jo-Thesalonika 4:3) Kae to chieng’ moro ka ikendo kata okendi, ibiro nindo gi jaodi. Kendo ibiro winjo mit mar timo kamano ma ok ibedo gi parruok, kibaji, kata ywago ang’e ma ng’ato bedogago nikech donjo e timbe mag nindruok ka pok okendo kata okende. —Ngeche 7:22, 23; 1 Jo-Korintho 7:3.

IPARO NADE?

• Be ng’at moheri adier nyalo timo gima hinyi kata ma biro chando chunyi bang’e?

• Be ng’at ma dewi gadier nyalo temo wuondi mondo itim gima nyalo ketho winjruokni gi Nyasaye?—Jo-Hibrania 13:4.