Nyako Moro Matin Nokonyo Jatend Lweny

E piny Siria, ne nitie nyako moro matin ma ne en Nya-Israel. Siria ne ni mabor ahinya gi Israel. Jolweny mag Siria e ma nogolo nyakono thurgi, kendo koro notiyo e od jatend lweny ma ne nyinge Naaman. Nyakono ne lamo Jehova kata obedo ni joma ne odakgo to ne lamo nyiseche manono.

Naaman ne nigi tuo mar dhoho, kendo mano ne miyo owinjo rem ahinya. Nyako matinno ne dwaro konye. Nikech mano, ne onyiso chi Naaman niya: ‘Ang’eyo ng’ato ma nyalo chango jaodi. Thurwa Israel nitie janabi mar Jehova ma nyinge Elisha. Onyalo chango jaodi.’

Chi Naaman nonyiso Naaman gima nyako matinno ne owachone. Nikech Naaman ne oikore timo gimoro amora mondo ochangi, ne odhi nyaka e od Elisha. Naaman ne paro ni Elisha ne dhi rwake kaka jatelo. Kata kamano, Elisha to ne ooro mana ng’ato mondo e ma omi Naaman ote ma ne wacho kama: ‘Dhi inyumri e Aora Jordan nyadibiriyo, kae to ibiro chango.’

Wachno ne ok omoro Naaman. Ne ong’ur kama: ‘An ne aparo ni janabini ne dhi lemona kae to achango achanga. To en onyisa mondo adhi e aora ma nitie Israel. Ma ng’at mochayo ji manadeni! Aoche ma wan-go Siria liw malich. Ka mano e gima odwaro ni atim, to kare ok adhi adhiya e aoche ma thurwa?’ Naaman ne ochwanyore, kendo ne owuok e od Elisha.

Jotij Naaman nosaye mondo otim atima gima Elisha nowachono. Ne giwachone kama: ‘Donge gima duong’ en ni mondo ichangi? Gima janabini dwaro ni itimno ok en gima tek. Tim atima kaka onyisi!’ Naaman ne owinjogi. Omiyo, ne odhi e Aora Jordan mi onyumore e i pi nyadibiriyo. Ka ne otieko mar abiriyo, nochango mi dende obedo mapoth ahinya. Nomor ahinya, kendo ne odhi ir Elisha mondo ogone erokamano. Ne onyiso Elisha niya: ‘Koro to ang’eyo ni Jehova e Nyasaye madier.’ Iparo ni Nya-Israelcha ne owinjo nade e chunye ka ne Naaman ochango?