Puonj Nyithindi
Bedo Jawuoro Noketho Gehazi
BE ISEGAGOMBO gimoro ahinya?—a Ka en kamano, ng’e ni ok in kendi. To be onego iriamb mondo iyud gima idwaro?—Ooyo, ok onego itim kamano. Ng’at matimo kamano en jawuoro. We wane ane kaka wuoro noketho jal moro miluongo ni Gehazi. Ne en jatich Elisha, janabi mar Jehova, Nyasaye madier.
Elisha gi Gehazi ne odak higini mang’eny mokalo, higini madirom 1000 kane pok onyuol Wuod Nyasaye, Yesu, e piny. Jehova notiyo gi Elisha e timo gik mabeyo— timo honni! Kuom ranyisi, Muma wuoyo kuom ng’at moro maduong’ ma ne en jatend lweny e piny Suria, ma ne nigi tuwo marach mar dhoho. Onge ng’at ma ne nyalo change, to Elisha nochange.
Elisha ne ok kaw chudo moro amora kane Nyasaye tiyo kode e chango ji. Be ing’eyo gimomiyo?—En nikech Elisha nong’eyo ni honnigo ne wuok kuom Jehova—to ok kuome owuon. Kane ochang Naaman, ne omor ahinya kendo ne odwaro miyo Elisha mich mag dhahabu, fedha, kod lewni mabeyo beyo. Elisha ne otamore chuth, to koni Gehazi ne gombo michgo ahinya.
Kane Naaman osedhi, Gehazi nolawe maok onyiso Elisha. Kane ojuko Naaman, be ing’eyo gima Gehazi ne onyise?—‘Elisha oora iri ni anyisi ni welo ariyo obiro lime. Okwayo ni imiye nengini moromo aloka diriyo mondo omi welogo.’
To mano ne en miriambo! Gehazi ema ne ochwogo wach welo ariyogo. Owacho miriambono nikech odwaro ni oyud lewni ma ne Naaman otemo miyo Elisha. Naaman ok ong’eyo mano. Omiyo omor miyo Gehazi michgo. Kendo Naaman miyo Gehazi gik mang’eny moloyo kata ma ne okwayo. Be ing’eyo gima notimore bang’ mano?—
Kane Gehazi odok e ot, Elisha nopenje niya: ‘Ia kanye? ’
Gehazi dwoko niya: ‘Ok nadhi kamoro.’ Kata kamano, Jehova osefwenyo ne Elisha gima Gehazi otimo. Kae to Elisha wacho: ‘Ma ok en kinde mar kawo pesa kata mar kawo lewni!’
Gehazi okawo pesa koda lewni maok meke. Omiyo Nyasaye miyo Gehazi dhoho mar Naaman. Ang’o mwanyalo puonjore kuom wachni?—Gimoro achiel mwapuonjore en ni ok onego wachuog weche maok adier kata wacho miriambo.
Ang’o momiyo Gehazi ne ochuogo weche ma nong’eyo ni gin miriambo?—En nikech Gehazi ne en jawuoro. Ne odwaro yudo gik maok meke kendo notemo yudo gigo kuom wacho miriambo. Mano nomiyo ogoye gi tuwo marach ahinya kuom ngimane duto.
Kata kamano, nitie gimarach ma noyudo Gehazi moloyo tuwo mar dhoho. Be ing’eyo ni ne en ang’o?—Ne oketho winjruokne gi Nyasaye, Nyasaye koro ne ok ohere. Kik watim gimoro amora manyalo miyo waketh winjruokwa gi Nyasaye! Kar mano, wabed joma ng’won kendo moikore pogo giwa ne jomamoko.
Som e Muma mari
2 Ruodhi 5:5, 20-27; Juda 21
[Weche moler piny]
a Kapo ni isomo gi nyithindo, dash moket en ni mondo oparni ichung somo matin kendo ipenj nyithindogo penjono.