Chir ma Jehoyada Nonyiso

Ne nitie nyar Jezebel ma ne nyinge Athalia, kendo timbene ne richo mana ka min-gi. Ruodh Juda nokende. Ka ne ruodhno otho, wuode nochako locho. To ka wuodeno bende ne otho, Athalia owuon nochako locho e wi Juda. Kae to notemo tieko anyuola ma ruodhi nonego owuogie, konego ng’ato ang’ata ma ne nyalo bedo ruoth. Nonego nyaka nyikwaye. Ji duto noluore marach.

Jehoyada Jadolo Maduong’ gi Jehosheba chiege ne ong’eyo ni gik ma Athalia ne timo ne richo. Ne gikawo okang’ mar pando Jehoash ma ne en achiel kuom nyikwa Athalia, kata obedo ni ne ging’eyo maler ni ka Athalia ne nyalo fwenyogi, ne inyalo neggi. Ne gipidhe e hekalu.

Ka ne Jehoash jahigni abiriyo, Jehoyada ne ochoko jotelo gi Jo-Lawi, ma onyisogi kama: ‘Rituru rangach mar hekalu, kendo kik uyie ne ng’ato ang’ata donjo kae.’ Kae to Jehoyada ne oketo Jehoash obedo ruodh Juda, kendo ne orwakone ogut loch. Bang’ mano, Jo-Juda ne okok matek ka giwacho niya: “Ruoth odag aming’a!”

Ka ne Athalia owinjo koko mar oganda, noringo kochomo hekalu. Ka noneno ruoth manyienno, nokok niya: “Un jo maricho! Ulokoruna!” Jotelo nomako Athalia, ne giywaye, mi ginege. To nade timbe maricho ma nosenyayo e oganda?

Jehoyada ne okonyo oganda rieyo yoregi, mi gisingore ni ne gidhi lamo mana Jehova kende. Jehoyada ne onyisogi ni giketh hekalu mar Baal kod sanamu duto. Ne oyiero jodolo gi Jo-Lawi mondo oti e hekalu, mondo Jo-Israel ochak lamo Jehova e hekaluno. Ne oketo jorit e rangach mondo gine ni onge ng’ama rach ma donjo e hekalu. Kae to Jehoyada gi jotelo notero Jehoash e ot moyiedh ne ruoth, mi gikete e kom-loch. Jo-Juda ne omor matek. Koro ne ginyalo tiyo ne Jehova ka gin thuolo, ma onge Athalia ma ne chandogi gi lamo mar Baal. Donge ineno kaka chir ma ne Jehoyada onyiso ne okonyo ji mang’eny ahinya?