Oketh Jerusalem

Jo-Juda nosiko ka weyo Jehova, kendo lamo nyiseche manono. Jehova notemo konyogi nyading’eny kuom higni mang’eny. Ne ooronegi jonabi mondo omigi siem, to ne gitamore winjo wach. Gin ne gijaro ajara jonabigo. Jehova nokawonegi okang’ mane?

Nebukadnezar ruodh Babulon ne kawo pinje mopogore opogore kendo ketogi e bwo lochne. E kinde ma nokwongo monjo Jerusalem, ne omako Ruoth Jehoyakin, jotelo, jolweny, gi jotich duto, mi oterogi Babulon. Ne okawo bende mwandu duto ma ne nitie e hekalu mar Jehova. Kae to ne oketo Zedekia obed ruodh Juda.

E kinde ma Zedekia ne ochako bedo ruoth, ne owinjo chik Nebukadnezar. Kata kamano, ogendni ma ne odak machiegni kaachiel gi jonabi mag miriambo ne osiko ka nyiso Zedekia mondo ong’any ne Babulon. Jeremia nosiemo Zedekia kama: ‘King’anyo ne Babulon, to ibiro neg Jo-Juda, kech biro betie, kendo tuoche biro hinyo ji.’

Bang’ ka Zedekia nosebedo ruoth kuom higni aboro, nong’anyo ne loch mar Babulon. Ne okwayo jolweny mag Misri mondo okonye. Nebukadnezar ne ooro jolwenyge mondo omonj Jerusalem, kendo ne gidhi mi gilworo Jerusalem. Jeremia nonyiso Zedekia kama: ‘Jehova owacho ni ka iyie mondo Jo-Babulon omaki, to ibiro kwo, kendo Jerusalem bende ok bi kethi. To kitamori, Jo-Babulon biro wang’o Jerusalem gi mach, kendo gibiro maki mi giteri e tuech thurgi.’ Zedekia noramo kama: ‘Atamora!’

Higa achiel gi nus bang’e, Jo-Babulon ne omwomo ohinga mag Jerusalem ma giwang’o taondno te. Ne giwang’o hekalu, ne ginego ji mang’eny, kendo ne gitero ji modhuro e tuech.

Zedekia ne oringo oa Jerusalem, kata kamano, Jo-Babulon nolawe mi gimake machiegni gi Jeriko, kendo ne gitere ir Nebukadnezar. Nebukadnezar nonego yawuot Zedekia ka Zedekia neno gi wang’e. Kae to notucho wenge Zedekia, kendo nosoyo Zedekia e jela. Bang’e ne otho ka en e jela kanyo. Jehova nosingo ne Jo-Juda kama: ‘Bang’ higni 70, abiro duokou Jerusalem.’

Kata kamano, ang’o ma ne dhi timore ne yawuoyi matindo ma ne oter Babulon? Be ne gidhi siko ka gimakore gi Jehova?