Pinyruoth Mabiro Siko Nyaka Chieng’

Chieng’ moro gotieno, Ruoth Nebukadnezar noleko lek moro ma ng’eyo tiende tek. Lekno nochando chunye ahinya, mi nindo notamore tere. Noluongo ajuokene monyisogi kama: ‘Lernauru tiend gima ne aleko.’ Ne gidwoke kama: ‘Ruoth, kwong ipimnwae gima ne ilekono, e ka walerni tiende.’ To Nebukadnezar nodwokogi niya: ‘Ooyo! Un e monego unyisa gima ne aleko kod tiende, nono to anegou te.’ Ne ginwoyone niya: ‘In nyiswa anyisa gima ne ilekono, kae to wabiro leroni tiende.’ To en nowachonegi kama: ‘Weuru pimo wiya. Nyisauru gima ne aleko!’ Ne gidwoke niya: ‘Ruoth, onge ng’ato ang’ata ma nyalo timo gima iwachono. Onge!’

Nebukadnezar iye ne owang’, kendo ne ogolo chik mondo oneg ajuoke kod jong’ad-rieko duto ma ne ni Babulon. Jong’ad-riekogo noriwo nyaka Daniel, Shadrak, Meshak, gi Abednego. Daniel ne okwayo ruoth mondo omedgi kinde matin. Kae to Daniel gi osiepene ne olemo ka gikwayo Jehova mondo okonygi. Jehova ne odwoko lamogi e yo mane?

Jehova ne omiyo Daniel fweny ma lero lekno kod tiende. Kinyne, Daniel ne odhi onyiso jatij ruoth kama: ‘Kik uneg ng’ato ang’ata. Anyalo lero ne ruoth lekne kod tiende.’ Jatijno notero Daniel ir Nebukadnezar. Daniel nonyiso ruoth kama: ‘Nyasaye osenyisi gik ma biro timore kinde mabiro. Mae e gima ne ileko: Ne ineno sanamu moro maduong’ ma chalo dhano, ma wiye olos gi dhahabu, kore kod bedene olos gi fedha, bund iye kod bembene olos gi mula, ogwendene olos gi nyinyo, to tiendene olos gi nyinyo mokikore gi lowo. Kae to kidi moro ne omukore e wi got, mi obiro mogoyo tiend sanamuno. Sanamuno ne ong’injore molokore buru, kendo yamo nokeyo burugo. Kidino ne olokore got maduong’ mokwako piny ngima.’

Daniel nomedo kama: ‘Mae e tiend lekno: Wi sanamu molos gi dhahabuno ochung’ ne pinyruodhi. Kore kod bedene molos gi fedhago ochung’ ne pinyruoth moro ma nobedie bang’ pinyruodhi. Kae to pinyruoth moro nobi ma biro chalo gi mula, kendo obiro locho e wi piny ngima. Pinyruoth mabiro luwe biro bedo motegno ka nyinyo. Kae to pinyruoth mogik biro bedo pinyruoth ma bathe moko otegno ka nyinyo, to bathe moko yomyom ka lowo. Kidi ma nomukore e wi got mi bang’e obedo got maduong’ mokwako piny ngima en Pinyruodh Nyasaye. Pinyruodh Nyasaye biro ng’injo pinjeruodhi mamokogo duto, mi enosik nyaka chieng’.’

Ka ne Daniel otieko lero wechego, Nebukadnezar nopodho auma e nyime ka wacho kama: ‘Nyasachi e mofwenyoni lekni kod tiende. Onge Nyasaye moro amora ma rom kode.’ Nebukadnezar ne ok onego Daniel. Kar mano, ne okete jatelo e wi jorieko duto, kendo nobedo achiel kuom jotelo mag Babulon. Be ineno kaka Jehova nodwoko lamo mar Daniel?