Pinyruoth ma Chalo gi Yien Maduong’

Chieng’ moro gotieno, Ruoth Nebukadnezar noleko lek moro ma nobwoge ahinya. Noluongo jong’ad-rieko mondo gilerne tiende, to onge ng’ama ne nyalo timo mano. Gikone, ruodhno nowuoyo gi Daniel.

Nebukadnezar ne onyiso Daniel kama: ‘Ne aneno yien moro e lek. Yienno nodongo mi ochopo nyaka e polo. Ne onyalo nenore gi kamoro amora e piny. Ite ne beyo ahinya, kendo ne opong’ gi olembe. Le manie thim ne yueyo e tipone, to winy bende ne loso utegi e bedene. Kae to malaika moro ne olor koa e polo malo, mi okok kama: “Tong’ yienno, kendo ing’ad bedene duto. Kata kamano, kik imuk osikine kod tiendene, to itueye gi nyinyo kod mula. Chuny yienno biro weyo bedo ka chuny dhano, mi olokre obed ka chuny le. Higni abiriyo biro kalo ka en aena kamano. Ji duto biro ng’eyo ni Nyasaye e Jaloch e wi gik moko duto, kendo ni onyalo chiwo pinyruoth ne ng’ato ang’ata mohero.”’

Jehova ne ofwenyo ne Daniel tiend lekno. Ka ne Daniel owinjo tiend lekno, luoro nomake. Nonyiso ruoth kama: ‘Yaye ruoth, mad abedie ni lekni wuoyo kuom jowasiki, to parie ni owuoyo mana kuomi. Yien maduong’ ma ne ong’adno en in. Mano nyiso ni pinyruodhi biro rumo, kendo ibiro chamo lum mana ka le. To nikech malaikano nowacho ni kik muk osiki mar yienno kod tiendene, mano nyiso ni bang’e ibiro bedo ruoth kendo.’

Higa achiel bang’e, ka ne Nebukadnezar wuotho mos e wi tat ode komor gi kaka Babulon ne chalo, nowacho kama: ‘Aseloso taondni obedo maber manadeni! Kare an be ok an ng’ama yot!’ Ka ne pod owuoyo, dwol moro nowinjore koa e polo ka wacho niya: “Nebukadnezar, osemayi pinyruoth.”

Gikanyono, Nebukadnezar ne olokore janeko mi ochako timore mana ka le mag thim. Koro ne nyaka owe dak e ode maber, kendo nodhi modak gi le e thim. Yie wiye ne odongo mobedo maboyo mana ka yie otenga, kendo kokene ne chalo kok winyo.

Bang’ higni abiriyo, pach Nebukadnezar noduogo, mi Jehova noyiene obedo ruodh Babulon kendo. Nebukadnezar nowacho kama: ‘Apako Jehova, Ruodh polo. Koro to ang’eyo ni Jehova e Jaloch e wi gik moko duto. Joma sungore kendo ma ting’ore malo, odwoko piny. Kendo onyalo chiwo pinyruoth ne ng’ato ang’ata mohero.’