Kornelio Oyudo Roho Maler

E taon mar Kaisaria, ne nitie jatend askeche ma Rumi ma ne nyinge Kornelio. Kata obedo ni ne ok en Ja-Yahudi, Jo-Yahudi ne omiye luor ahinya. Ne en jachiwo, kendo ne ohero konyo jochan. Ne oyie kuom Jehova, kendo ne olamega pile ka pile. Chieng’ moro, malaika moro ne odhi ir Kornelio mi onyise kama: ‘Nyasaye osewinjo lamo magi. Koro tim kama: Or chwo moko odhi ir Petro e taon mar Jopa mondo gikwaye obi iri.’ Kornelio notimo kamano. Nooro chwo adek Jopa. Mano ne en wuoth mar kilomita 50 kama, kochomo yo milambo.

Seche ma gigo ne timore ne Kornelio, Petro noneno fweny moro. Ne oneno le moko ma Jo-Yahudi ne ok cham, kendo ne owinjo dwol moro ka nyise ni ochamgi. Petro notamore. Nowacho kama: ‘An pok achamo ring le ma ok lergo nyaka nene.’ Dwolno nonyise kama: ‘We wacho ni legi ok ler. Nyasaye oseketogi gibedo maler.’ Dwolno nonyise bende niya: ‘Chwo moko adek ni e dhoodi. Dhi kodgi kama gidwaro.’ Petro nodhi e dhoot mopenjo chwogo gima nokelogi. Ne gidwoke kama: ‘Kornelio ma jatend askeche ma Rumi e ma oorowa iri. Okwayo ni idhi e ode Kaisaria.’ Petro ne okwayogi mondo gibed wende otienono. Kinyne, ne odhi kodgi Kaisaria ka en gi owete moko ma Jopa.

Ka ne Kornelio oneno Petro, ne ogoyo chonge piny. To Petro ne onyise kama: ‘Chung’ achung’a malo! An be an mana dhano kaka in. Nyasaye e ma onyisa mondo abi e odi, kata obedo ni Jo-Yahudi ok dhiga e ute joma oa e ogendni mamoko. Koro wach ane gimomiyo niluonga.’

Kornelio nonyiso Petro kama: ‘Ka nyocha alemo ndalo ang’wen mokalo, malaika moro nobiro ira mi onyisa ni aluongi ibi e oda. Wakwayo ni ipuonjwae wach Jehova.’ Petro nowacho niya: ‘Asefwenyo ni Nyasaye ok bwon ng’ato ang’ata. Oyie ne ng’ato ang’ata ma diher lame mondo olame alama.’ Petro nopuonjogi weche mang’eny e wi Yesu. Kae to roho maler nobiro kuom Kornelio gi joma ne ni kode te, kendo ne otisgi giduto.