Jehova “Ok Odewo Wang’ Ji”

Be kinde moro osegabuoni nikech ipogori gi jomoko? Be osegatamie gimoro, kata otuoni ratiro mari, kata onyisi achaye nikech oganda miwuokie? Koso dibed ni osebuoni nikech yuto mari? Kapo ni mano osetimoreni, ng’e ni mano osetimore ne jomoko bende. Gima ber en ni: Kata obedo ni achaye ma kamago opong’o piny, Nyasaye manie polo to ok obuono ng’ato. Jaote Petro nowacho kama ka en gadier chuth: Jehova “ok odewo wang’ ji,” tiende ni Jehova ok buon ng’ato.—Som Tich Joote 10:34, 35.

Gimiwuoro en ni Petro nowacho wechego e od ng’at moro ma ne ok en Ja-Yahudi miluongo ni Kornelio. Petro ne en Ja-Yahudi kendo ne odak e kinde ma Jo-Yahudi ne neno ni joma ok Jo-Yahudi ok ler kendo ne ok onego Jo-Yahudi oriwre kodgi e yo moro amora. To kare ang’o momiyo Petro ne ni e od Kornelio? E yo machuok, mano en nikech Jehova Nyasaye nochano mano. Ma e kaka weche notimore. Petro noneno fweny moro ma ne onyisee niya: ‘Gima Nyasaye osepwodho, in kik iluong ni ok ler.’ To komachielo, odiechieng’ motelo ne mano, Kornelio bende noneno fweny ma ne malaika onyisee ni oluong Petro e ode to Petro ne kia wachno. (Tich Joote 10:1-15) Kane Petro ofwenyo ni Jehova ema ne tayo gik ma ne otimorego, ne ok onyal ling’.

Petro nowacho niya, “Adier, aneno ka Nyasaye ok odewo wang’ ji.” (Tich Joote 10:34) Jasomo moro nolero wach ma ne otigo e dho-Grik ni ‘dewo wang’ ji’ niya: “Jang’ad-bura madewo wang’ ji ng’ado ne ji bura ok kaluwore gi weche mag kesno, to kaluwore gi kaka ohero kata ok ohero ng’atno.” Gima miyo Nyasaye oher ng’ato ok en oganda mowuokie, piny moae, kata gik mamoko ma nenore gioko.

Kar mano, Jehova neno gima nie chunywa. (1 Samuel 16:7; Ngeche 21:2) Petro nomedo wacho kama: “To kuom ogendini duto ng’at moluore, kendo ma timo tim makare, e moyiego.” (Tich Joote 10:35) Ng’at moluoro Nyasaye ogeno Nyasaye kendo oluoro timo gimoro amora ma Nyasaye ok dwar. Timo gima kare en timo gima ber e wang’ Nyasaye kowuok e chunywa. Jehova mor gi ng’ama timo gima kare nikech luor matut momiyo Nyasaye.—Rapar mar Chik 10:12, 13.

Kapo ni osebuonwa e yo moro amora, weche ma Petro nowacho e wi Nyasaye nyalo jiwowa. Jehova ywayo ji mowuok e kit ogendni duto e lamo madier. (Johana 6:44; Tich Joote 17:26, 27) Owinjo kendo odwoko lamo mag joma tiyone bed ni giwuok e oganda kata piny mane, bed ni gin johuma kata ooyo. (1 Ruodhi 8:41-43) Wan gadier ni ka Jehova ng’iyo dhano ka en e polo, oneno mana kit oganda achiel—oganda dhano. Donge diher puonjori weche momedore e wi Nyasaye maok odewo wang’ ji-ni?