SOMO NAMBA 8

Tiyo gi Ranyisi Machiwo Puonj

Mathayo 13:34, 35

GIMA INYALO TIMO: Med lony e yo mipuonjogo kuom tiyo gi ranyisi ma winjore mayot kendo ma konyo jowinjo fwenyo weche madongo.

Ti gi ranyisi mayot winjo. Luw ranyisi mar Yesu kuom tiyo gi ranyisi mayot e lero wach moro ma ok yot winjo. Kik imed gik ma ok ochuno ma nyalo miyo ranyisi mitiyogo kik winjre maler. Tem mondo ranyisi mitiyogo otudre gi gima idwaro puonjo mondo kik iwe jowinjo ka wuoro kaka weche ma iwachogo otudore gi ranyisi mitiyogono.

Non adimba gik ma timore e alworau, som bugewa, kendo chik iti sama jopuonj molony puonjo. Sama itimo mano, inyalo ndiko ranyisi miyudo mondo ibi itigo bang’e nikech ginyalo konyi medo lony e puonjo.
Par gik ma nyalo konyo jowinjo. Ti gi ranyisi motudore gi gik ma gitimoga pile kendo ma nyalo mako pachgi. Tang’ mondo ranyisi mitiyogo kik chwany jowinjo kata kuodo wigi.
Puonj weche madongo. Onego ipuonj kendo iler weche madongo kar lero weche mang’eny matindo tindo. Tem mondo jowinjo magi opar weche madongo, ok mana ranyisi mitiyogo kende.