Yore Adek Manyalo Miyo Imed Lony e Puonjo
1. Ang’o momiyo onego watem medo lony ma wan-go e puonjo?
1 Jolendo duto ma Jokristo gin jopuonj. Bed ni watimo limbe mokwongo, wadok timo limbe, kata watayo puonjruok mar Muma, gima watimo en puonjo ji. Weche mwapuonjo ji gin weche makende. Wakonyo ji ng’eyo ‘ndiko maler’ manyalo miyogi ‘rieko makelo warruok.’ (2 Tim. 3:15) Mano kaka omiwa thuolo majaber! Yore adek maluwogi nyalo konyowa medo lony ma wan-go e puonjo.
2. Ere kaka wanyalo puonjo e yo mayot?
2 Puonj e Yo Mayot: Kapo ni wang’eyo tiend wach moro, yot paro ni ng’at machielo bende biro winje kaka wawinjeno. Omiyo, sama itayo puonjruok mar Muma, ok onego ium gik mipuonjo gi weche mang’eny maok ochuno. Kar mano, jiw mana weche madongo. Ok ochuno ni iwach weche mang’eny eka ipuonj e yo maber. (Nge. 10:19) Kinde mang’eny nyalo bedo maber ahinya ka wasomo mana ndiko majiwo wi wach miwuoyoe. Bang’ somo ndiko moro, nyis kaka ndikono otudore gi gima iwuoyoe. Twak mar Got mayudore e Mathayo sula mag 5 nyaka 7 oting’o adiera madongo, to kata kamano Yesu nolerogi e yo mayot maok otiyo gi weche mang’eny.
3. Tiyo gi ranyisi konyo e yo mane, to gin ranyisi mage ma kinde mang’eny ber tiyogo?
3 Ti gi Ranyisi: Ranyisi nyalo konyo ng’ato mondo opar matut e chunye kendo nyalo miyo wiye kik wil gi gik mopuonjore. Ok ochuno ni nyaka ibed ng’at molony e goyo sigana eka iti gi ranyisi mabeyo. Kinde mang’eny Yesu notiyo gi ranyisi machuok maok ogajore. (Math. 7:3-5; 18:2-4) Bende kinyalo goro pichni e kalatas, nyalo konyi ahinya. Kitemo paro chon kuom gima udhi puonjoru, ibiro fwenyo ranyisi maber tiyogo.
4. Ere kaka wanyalo tiyo gi penjo e yo mowinjore?
4 Ti gi Penjo: Penjo miyo japuonjre opar matut. Kuom mano, rit dwoko bang’ ka isepenjo penjo. Ka irikni chiwo dwoko in iwuon, ok ibi ng’eyo paro ma japuonjre nigo. Ka ochiwo dwoko maok kare, kar kwere, nyalo bedo maber kitiyo gi penjo momedore mondo ikonye yudo dwoko makare. (Math. 17:24-27) En adier ni onge ng’ato kuomwa molony chuth e puonjo. Emomiyo Muma jiwowa mondo waket pachwa duto kuom gik mwapuonjo. Ka watimo kamano, wabiro yudo gweth mosiko wan wawegi kaachiel gi jogo ma winjowa.—1 Tim. 4:16.