Puonj e Yo Mawinjore Mayot
1. Achiel kuom yore madwarore ahinya mondo omi wapuonj e yo molony en mane?
1 Puonjo e yo mawinjore mayot en gima dwarore ahinya seche ma ipuonjo. Nono yo ma Japuonj Maduong’ Yesu ne tiyogo, nyalo konyowa medo lony e ‘puonjo.’—2 Tim. 4:2; Joh. 13:13.
2. Puonjo e yo mawinjore mayot oriwo timo ang’o, kendo gin ber mage mayudore kuom timo kamano?
2 Wuo e Yo Mawinjore Mayot: Twak mar Got oting’o moko kuom adiera matut ahinya ma osepuonj e pinyka, to giduto owachgi e yo mawinjore mayot. (Math., sula 5-7) Oganda ma ne chiko itgi ne Yesu, “nowuoro ngang’ kuom puonjne.” Weche Yesu ne omulo askeche ma ne oor mondo omake, mi ne giwacho kama: “Pok ng’ato owuoyo ngang’ kaka ng’atni.” (Math. 7:28, 29; Joh. 7:46) Ok ochuno ni nyaka wati gi weche ma tiendgi tek, kata ngero ma ok winjre mayot ni eka adiera odonjne jomoko. Adiera inyalo ler kitiyo gi weche mawinjore mayot.
3. Ang’o momiyo jolendo moko nyalo dwaro nyiso jowinjogi weche mang’eny, to ma inyalo geng’ nade?
3 Non Weche ma Jopuonjre Nyalo Mako Dichiel: Yesu ne oketo e paro nyalo mar jowinjone kuom puonjogi weche ma ne ginyalo mako dichiel. (Joh. 16:12) Onego wang’e chal mar jowinjowa kendo watim lokruok mowinjore kodgi, to moloyo e kinde mwalendo ni wedewa, joma eka orwako wach, kata nyithindo. Onego watang’ kik wanyisgi weche mang’eny kata obedo ni nenore ni gichiko itgi maber. Jogo ma nigi chuny makare biro dhi nyime puonjore ng’eyo mar Nyasaye madier ma en Jehova.—Joh. 17:3; 1 Kor. 3:6.
4. Ang’o momiyo en gima ber jiwo puonj madongo kar wacho weche mang’eny e wi puonjno?
4 Jiw Thuond Weche: Yesu ne ok mi gigo ma ne opuonjo obed matek winjo kuom gajo puonjne gi weche mang’eny. Kane owacho niya: “Ji duto manie liete . . . giniwuog oko,” mano ne ok en kinde mar chiwo weche mang’eny e wi kidienje ariyo mag ji ma ibiro chiero. (Joh. 5:28, 29) Seche ma wapuonjore gi ji Muma, onego wajiw thuond weche kendo watem matek loyo tim mar wuoyo e wi gigo ma onge e buk mwapuonjore.
5. En gweth mane mwanyalo yudo ka wapuonjo e yo mawinjore mayot?
5 Mano kaka wan gi mor nimar Jehova osepuonjowa e yo mayot winjo gigo duto madwarore wang’e! (Math. 11:25) Weuru wapuonj e yo mawinjore mayot mondo wayud mor mar bedo gi nyak e tijwa mar lendo.