SULA MOKWONGO
Ere Kaka Muma Nyalo Konyi?
Waduto wabedoga gi penjo e wi ngima, tho, gimomiyo wachandore, kod gik ma biro timore e kinde ma biro. Bende, waparorega kaka wanyalo yudo pesa ma wanyalo konyorego e ngima kod kaka wanyalo bedo mamor e ngimawa mar joot. Ji mang’eny osefwenyo ni Muma konyogi yudo dwoko mag penjo madongo ma gin-go e ngima kendo miyogi puonj ma ginyalo tiyogo e ngimagi mapile. Be iparo ni Muma nyalo konyo ji duto?
1. Moko kuom penjo ma Muma chiwo dwokogi gin mage?
Muma konyowa dwoko penjogi: Ere kaka ngima nochakore? Ang’o momiyo nochuewa? Ang’o momiyo ji chandore? Ang’o ma timorega ne ng’ato ka otho? Ka ji duto dwaro kuwe, to kare ang’o momiyo lwenje ng’eny? Ang’o ma biro timore ne pinywani e kinde ma biro? Muma jiwowa ni wamany dwoko mag penjo kaka mago. Ji mang’eny osefwenyo ni Muma chiwo dwoko makare mag penjogo.
2. Ere kaka Muma nyalo konyowa mondo wabed mamor e ngimawa?
Muma miyowa puonj mabeyo. Kuom ranyisi, opuonjowa kaka joot nyalo bedo mamor gadier. Onyisowa gik ma wanyalo timo sama wan gi parruok kod kaka wanyalo bedo mamor gi tijewa ma watimo. Sama wanono bugni, ibiro puonjori gik ma Muma wacho e wi wechegi kod weche mamoko. Ibiro fwenyo ni “Ndiko duto [tiende ni gik moko duto manie Muma] . . . konyo.”—2 Timotheo 3:16.
Bugni ok kaw kar Muma. Kar mano, ojiwi mondo in iwuon inon gima Muma wacho. Omiyo, wakwayi ni isom ndiko duto manie bugni kae to item neno kaka gitudore gi gik mipuonjori.
TIM NONRO
Tem nono kaka Muma osekonyo ji, gima inyalo timo mondo somo Muma obedni mamit, kod gimomiyo ber ka ng’ato okonyi winjo tiend weche manie iye.
3. Muma nyalo tayowa
Muma chalo gi toch ma golo ler mang’eny. Muma nyalo konyowa mondo watim yiero mabeyo kendo onyisowa gik ma biro timore e kinde ma biro.
Som Zaburi 119:105, kae to uwuo e wi penjo ma luwogi:
Jandik zaburino ne nigi paro mane e wi Muma?
In iwuon in gi paro mane e wi Muma?
4. Muma nyalo dwoko penjo ma wan-go
Dhako moro nofwenyo ni Muma nigi dwoko mag penjo ma nosebedo ka chande kuom higni mang’eny. Tug VIDIO, kae to uwuo e wi penjo ma luwogi:
Gin penjo mage ma dhakono ne nigo?
Ere kaka puonjruok Muma nokonye?
Muma jiwowa ni wapenj penjo. Som Mathayo 7:7, kae to uwuo e wi penjo ma luwoni:
Gin penjo mage ma in-go ma diher yudo dwokogi e Muma?
5. Somo Muma nyalo bedoni mamit
Ji mang’eny ohero somo Muma kendo giyudo ber mathoth sama gisome. Tug VIDIO, kae to uwuo e wi penjo ma luwogi:
Rowere manie vidiono ne neno nade wach somo?
Kata obedo ni ne ok gihero somo, ang’o momiyo sani to gihero somo Muma?
Muma nigi puonj ma nyalo hoyowa kendo miyowa geno. Som Jo-Rumi 15:4, kae to uwuo e wi penjo ma luwoni:
Be imor gi hoch kod geno ma Muma chiwo?
6. Jomamoko nyalo konyowa winjo tiend weche manie Muma
Kata obedo ni ji mathoth somoga Muma kendgi, gisefwenyo ni puonjruok Muma gi jomamoko konyo ahinya. Som Tich Joote 8:26-31, kae to uwuo e wi penjo ma luwoni:
Ere kaka wanyalo winjo tiend weche manie Muma?—Ne kwan matindo 30 kod 31.
Ne dwarore ni okony Ja-Ethiopia moro mondo owinj tiend weche manie Ndiko. E kindegi, ji mang’eny yudo ber mathoth ka gipuonjore Muma gi jomamoko
PARO MA JOMOKO NIGO: “Puonjruok Muma en ketho seche.”
Ineno nade wachno? To ang’o momiyo iwacho kamano?
PUONJ MADUONG’
Muma chiwonwa puonj ma nyalo konyowa e ngimawa, omiyowa dwoko mag penjo ma wanyalo bedogo, kendo omiyowa hoch kod geno.
Ang’o ma ipuonjori?
Gin puonj mage ma wanyalo yudo e Muma?
Moko kuom penjo ma Muma chiwo dwokogi gin mage?
En ang’o ma diher puonjori e Muma?
MED TIMO NONRO
Ne ane kaka puonj mag Muma konyowa e kindegi.
“Puonj mag Muma Konyo Kinde Duto” (Ohinga mar Jarito Na. 1 2018)
Ne ane kaka puonj mag Muma nokonyo ng’at moro ma nosebedo ka nyagore gi paro ma ok kare chakre tinne.
Ne ane kaka puonj mag Muma konyo e ngima mar joot.
“Weche 12 Manyalo Konyo Joot Odag gi Kuwe” (Nenuru! Na. 2 2018)
Ne ane kaka Muma konyowa ng’eyo adiera e wi miriambo ma ji osebedo ka wacho e wi ng’at ma tayo pinyni.