LOKO JI OBED JOPUONJRE
SULA MAR 10
Bed gi Chuny mar Chiwruok
Puonj: “Ne wang’ado ni mondo wayalnu, ok mana wach maber mar Nyasaye kende, to bende ne wamiyou nyaka ngimawa wawegi nikech ne waherou ahinya.”—1 The. 2:8.
Gima Yesu Notimo
1. Ne VIDIO, kata isom Johana 3:1, 2. Bang’ mano, non penjo ma luwogi:
Ang’o momiyo Nikodemo ne odhi ir Yesu gotieno?—Ne Johana 12:42, 43.
Yesu nonyiso nade ni nochiwore loko ji obed jopuonjre ka ne oromo gi Nikodemo gotieno?
Ang’o ma Wapuonjore Kuom Yesu?
2. Wanyiso ni wahero ji ka wachiwore konyogi mondo gibed jopuonjre.
Luw Ranyisi mar Yesu
3. Puonjri gi japuonjreni e sa mowinjore kode kod kama oyiero. Samoro onyalo dwaro ni upuonjre e odiechieng’ moro e juma kata e sa moro sie. Be onyalo hero puonjore kama otiye, e ode, kata kamoro machielo? Ka nyalore, ikri loko chenroni mondo ipuonjri kode e sa kod kama owinjore kode.
4. Puonjreuru ma ok ubaru. Ka po ni ibiro bedo ma onge, kik ing’ad oko chenro mar puonjruok. Kar mano, penjri niya:
Be anyalo tayo puonjruogno e odiechieng’ machielo e jumano?
Be anyalo puonjora kode e simu kata e yor vidio?
Be anyalo kwayo jalendo machielo mondo opuonjre kode?
5. Lem mondo ibed gi paro mowinjore. Kwa Jehova mondo okonyi kik ijog gi japuonjreni kata ka seche moko obare ne puonjruok, kata okawo kinde malach mondo oti gi gik ma opuonjore. (Fil. 2:13) Onge kiawa ni japuonjreni nigi kido mang’eny mabeyo; lem mondo Jehova okonyi keto pachi kuom kidogo.