Puonjri Kuom Wach Nyasaye

Yesu Kristo En Ng’a?

Sulani nigi penjo manyalo bedo ni isepenjori, kendo onyiso kama inyalo somo e Mumbi mondo iyud dwoko mag penjogo. Joneno mag Jehova diher wuoyo kodi e wi dwokogo.

1. Yesu Kristo en ng’a?

Mopogore gi dhano moro amora, Yesu nodak e polo ka en chwech mar roho kapok onyuole e piny ka. (Johana 8:23) Ne en chwech mokwongo mar Nyasaye, kendo nokonyo e chweyo gik mamoko duto. En kende ema Jehova nochweye achiel kachiel, omiyo iluonge ni “Wuowi ma miderma.” Yesu ne tiyo bende kaka Jal mawuoyo e lo Nyasaye, omiyo iluonge bende ni “Wach.”​—Johana 1:1-3, 14; som Ngeche 8:22, 23, 30; Jo Kolosai 1:15, 16.

2. Ang’o momiyo Yesu nobiro e piny?

Nyasaye nooro Wuode e piny kane odaro ngima wuode wuok e polo mokete ei nyako mangili ma nya Jo-Yahudi miluongo ni Mariam. Omiyo, Yesu ne ok onyuol gi wuoro ma dhano. (Luka 1:30-35) Yesu nobiro e piny mondo (1) opuonj adiera e wi Nyasaye, (2) oket ranyisi maber e timo dwach Nyasaye, kendo (3) ochiw ngimane makare obed “rawar.”​—Som Mathayo 20:28; Johana 18:37.

3. Ang’o momiyo ne dwarore ni ochiwnwa rawar?

Rawar en nengo michulo mondo owar ng’ato owuog e twech. Tho koda bedo moti ok ne nie chenro Nyasaye kane okwongo chweyo dhano. Wang’eyo mano nade? Nyasaye nowacho ne Adam, dhano mokwongo, ni kotimo gima Muma luongo ni richo, to ne odhi tho. Ka dine Adam ok otimo richo, dine ok otho ngang’. Kata obedo ni Adam nodak kuom higini miche bang’e, thone ne ochakore mana e chieng’ono ma nokethoe chik Nyasaye. (Chakruok 2:16, 17; 5:5) Adam norwako kothe duto e richo koda e kum mar richo, ma en tho. Omiyo, tho “nobiro” ne ji duto e piny kokalo kuom Adam. Mano emomiyo dwarore ni ochiwnwa rawar.​—Som Jo Rumi 5:12; 6:23.

4. Ang’o momiyo Yesu nochiwo ngimane?

Ng’ano ma ne nyalo chulo rawar ma ne dwarore mondo ogonywa e kum mar tho? Sama ng’ato tho, thone chulo mana richone kende. Onge ng’ato ang’ata kuom joma orem manyalo chulo rawar magolo jowadgi e richo.​—Som Zaburi 49:7-9.

Nikech Yesu ne onge richo nimar ne ok onyuole gi wuoro ma dhano, ne ok otho nikech richone owuon, to ne otho ne richo mag jomamoko. Nyasaye nooro Wuode mondo othonwa konyiso herane mogundho ne dhano. Yesu bende nonyisowa herane kuom winjo wuon mare kendo chiwo ngimane nikech richowa.​—Som Johana 3:16; Jo Rumi 5:18, 19.

5. Ang’o ma Yesu timo gie sani?

Kuom chango jomatuwo, chiero jomotho, kendo reso joma ngimagi ne ni kama tek, Yesu nonyiso gima gikone nobiro timo ne dhano moyie winjo Nyasaye. (Luka 18:35-42; Johana 5:28, 29) Bang’ ka Yesu nosetho, Nyasaye nochiere ka en gi ringre mar roho. (1 Petro 3:18) Kae to Yesu norito e dir Nyasaye korachwich nyaka chop kinde ma Jehova ne dhi miye teko mar locho kaka Ruoth e wi piny duto. (Jo Hibrania 10:12, 13) Gie sani, Yesu locho kaka Ruoth e polo kendo jolupne manie piny lando wach maberno e piny ngima.​—Som Daniel 7:13, 14; Mathayo 24:14.

E kinde mokayo machiegni, Yesu biro tiyo gi tekone kaka Ruoth mondo otiek chandruoge duto gi jogo makelo chandruogego. Ji tara gi tara moketo yie kuom Yesu kendo mawinje, biro dak gi mor e paradis e piny.​—Som Zaburi 37:9-11.

Mondo iyud weche momedore, ne sula mar 4 mar bugni Ang’o ma Muma Puonjo Kuom Adier? mogo gi Joneno mag Jehova.

[Picha manie ite mar 25]

Ji tara gi tara moketo yie kuom Yesu kendo mawinje, biro dak gi mor e paradis e piny