Somo mar 3

Yesu Kristo En Ng’a?

Ang’o momiyo Yesu iluongo ni wuod Nyasaye ‘mokuongo’? (1)

Ang’o momiyo iluonge ni “Wach”? (1)

Ang’o momiyo Yesu nobiro e piny kaka dhano? (2-4)

Ang’o momiyo notimo honini? (5)

Ang’o ma Yesu biro timo e kinde mabiro machiegni? (6)

1. Yesu nodak e polo kaka roho kane pok obiro e piny. Ne en chuech mokuongo mar Nyasaye, kuom mano iliuonge ni Wuod Nyasaye ‘mokuongo.’ (Jo Kolosai 1:15; Fweny 3:14) Yesu e Wuowi kende ma Nyasaye owuon nochueyo. Jehova notiyo gi Yesu kane pok obedo dhano kaen ‘jatichne molony’ e chueyo gik moko duto e polo kod piny. (Ngeche 8:22-31; Jo Kolosai 1:16, 17) Nyasaye bende notiyo kode kaka jawuoyo Mare maduong’. Mano emomiyo Yesu iluongo ni “Wach.”—Johana 1:1-3; Fweny 19:13.

2. Nyasaye nooro Wuode e piny kane oloko ngimane ma oketo ei Mariam. Kuom mano Yesu ne onge gi wuoro ma dhano. Mano emomiyo ne oonge gi richo kata bedo ma ok kare. Nyasaye ne ooro Yesu obi e piny nikech weche adek: (1) Mondo opuonjwa adiera kuom Nyasaye (Johana 18:37), (2) mondo oriti tim makare chuth, koketo ranyisi mondo waluw (1 Petro 2:21), kendo (3) mondo ochiw ngimane obed misango mondo ogonywa kuom richo kod tho. Ang’o momiyo misango ne dwarore?—Mathayo 20:28.

3. Kuom ketho chik Nyasaye, dhano mokuongo, Adam, notimo gima Muma luongo ni “richo.” Koro Nyasaye ne ong’adone buch tho. (Chakruok 3:17-19) Koro ne ok onyal timo makare dwaro mag Nyasaye, omiyo koro ne ok en ng’at ma kare. Mosmos nobedo moti, to bang’e notho. Adam noweyo ni nyithinde duto richo. Mano emomiyo wan bende wati, wabedo matuo, kendo watho. Ne inyalo res dhano nade?—Jo Rumi 3:23; 5:12.

4. Yesu ne dhano makare mana kaka Adam. Kata kamano, Yesu ne opogore gi Adam nikech Yesu nomako chik Nyasaye chuth kata ka ne en e tem maduong’ ahinya. Mano emomiyo nonyalo chiwo ngimane makare mondo obed misango mondo ochul richo Adam. Mano e gima Muma luongo ni “rawar.” Kuom mano inyalo gony nyithind Adam e buch tho. Ji duto moyie kuom Yesu inyalo ng’wonnegi richogi kendo ginyalo yudo ngima mochwere.—1 Timotheo 2:5, 6; Johana 3:16; Jo Rumi 5:18, 19.

5. Ka ne en e piny Yesu nochango jomatuo, nopidho joma odenyo, kendo nokweyo yambe madongo. Nochiero jomotho bende. Ang’o momiyo notimo honini? (1) Noneno lit ne joma chandore, kendo nodwaro mondo okonygi. (2) Honini manotimo ne nyiso ni en Wuod Nyasaye. (3) Ne ginyiso gigo ma nobiro timo ni dhano moluore ka olocho kaka Ruoth e wi piny.—Mathayo 14:14; Mariko 2:10-12; Johana 5:28, 29.

6. Yesu notho to Nyasaye nochiere edel mar roho kendo nodok e polo. (1 Petro 3:18) Koro Nyasaye osekete Ruoth. Machiegni Yesu biro golo richo gi chandruok duto e pinyni.—Zaburi 37:9-11; Ngeche 2:21, 22.

[Picha manie ite mar 7]

Tij Yesu noriwo puonjo, timo honini, kaachiel gi chiwo ngimane