Somo mar 2

Nyasaye En Ng’a?

Nyasaye maradier en ng’a, to nyinge ng’a? (1, 2)

En gi del machalo nade? (3)

Kite madongo ahinya gin mage? (4)

Bende onego walam Nyasaye ka watiyo gi gik mopa kendo gi ranyisi? (5)

Wanyalo puonjore kuom Nyasaye e yore mage ariyo? (6)

1. Ji lamo gik mang’eny. Kata kamano Muma wachonwa ni nitie mana Nyasaye achiel kende MARADIER. Nochueyo gik moko duto manie polo gi piny. Nikech nomiyowa ngima, en kende ema onego walame.—1 Jo Korintho 8:5, 6; Fweny 4:11.

2. Nyasaye nigi nying mang’eny mag duong’, to kata kamano en gi nying achiel kende. Iluonge ni JEHOVA. Ei Muma mang’eny, nying Nyasaye osegol oko ma owil gi nyinge mag duong’ kaka RUOTH kata NYASAYE. Kata kamano ndalo mane Muma nondiki, nying Jehova ne nitie ei Muma madirom ndalo 7,000!—Wuok 3:15; Zaburi 83:18.

3. Jehova nigi del, to dende ok chal gi dendwa. Muma wacho ni “Nyasaye en Roho.” (Johana 4:24) Roho en ngima ma malo maloyo ngimawa. Onge dhano moseneno Nyasaye nyaka nene. Jehova odak e polo to onyalo neno gik moko duto. (Zaburi 11:4, 5; Johana 1:18) To roho maler en ang’o? Ok en ng’ato kaka Nyasaye. En mana teko mar Nyasaye.—Zaburi 104:30.

4. Muma fwenyonwa kit Jehova. Onyisowa ni kite madongo gin hera, adiera, rieko gi teko. (Rapar mar Chik 32:4; Ayub 12:13; Isaiah 40:26; 1 Johana 4:8) Muma bende nyisowa ni en jang’wono, jawe ketho mag ji, jachiwo kendo omos. Kaka nyithindo ma joluor, onego watem luwo kite.—Jo Efeso 5:1, 2.

5. Bende dwarore ni wakulre piny ne gik mopa, picha, kata ranyisi e lamo marwa? Ooyo! (Wuok 20:4, 5) Jehova wacho ni nyaka walame en kende. Ok onyal riwo gi ng’ato moro amora kata gimoro amora duong’ mare. Gik mopa onge gi teko ma ginyalo konyowago.—Zaburi 115:4-8; Isaiah 42:8.

6. Ere kaka wanyalo ng’eyo Nyasaye eyo maber moloyo? Yo achiel en neno gik mosechueyo kendo dwarore ni mondo wapar matut ahinya kuom gik ma gigo nyisowa. Gik ma Nyasaye ochueyo nyisowa ni en gi teko kod rieko moloyo. Waneno herane echwechne duto. (Zaburi 19:1-6; Jo Rumi 1:20) Yo machielo ma wanyalo puonjorego kuom Nyasaye en puonjruok Muma. Ei Muma, Nyasaye onyisowa gik mange’ny moloyo kuome. Bende onyisowa dwarone kendo gima odwaro mondo watim.—Amos 3:7; 2 Timotheo 3:16, 17.

[Picha manie ite mar 5]

Wapuonjore ng’eyo Nyasaye kuom gik mochueyo kod Muma