Be Ng’eyo Gima Muma Puonjo e Wi Wach Nindruok Nyalo Konyowa?

“Ne achako bedo gi osiepe ma yawuowi kane an jahigini apar. Ne wachako gi makruok lwedo kod nyodhruok. Kata kamano, matin bang’e, ne wachako mulore ng’ato gi nyawadgi e yo maok owinjore kendo ne watimo gik mopogore opogore motudore gi nindruok. Kane ajahigini 15, ne achako tiyo tije andika, kendo chwo ma ne atiyogo ne dwaro nindo koda. Ne ok adwar bedo ng’at ma dikore, omiyo ne ariwora gi jotich wetena e gimoro amora ma ne gitimo. Ne adwaro ni osiepena orwaka, to mano nomiyo adonjo ahinya e weche mag nindruok ka adwaro ng’eyo mathoth.”—SARAH,a AUSTRALIA.

DONGE nyalo kawi gi wuoro ni Sarah ne opon e ot ma ji omakore ahinya gi puonj mag din? Jonyuolne notemo puonje dak e ngima maluwore gi chike mag Muma. Kata kamano, Sarah noyiero luwo yo mopogore.

Ji mang’eny nyalo yie gi yiero ma Sarah notimo. Gineno ni puonj mag Muma e wi wach nindruok ok nyal tiyo kata matin e kindewagi. Jomoko to ok ne ka nitie tuomruok moro amora ka ng’ato wacho ni omakore ahinya gi puonj mag din, to koni odonjore e timbe mag terruok.

Be ng’eyo kendo luwo puonj mag Muma e wi wach nindruok nyalo konyi? Muma wacho ni wechene owuok “kuom much Nyasaye,” kendo “konyo kuom puonjo ji.” (2 Timotheo 3:16) Kapo ni iyie ni Nyasaye nochweyo dhano kendo ni Muma en Wachne mokudhi, dwarore ni ing’e gima Muma puonjo e wi wach nindruok.

Gima lit en ni ji mang’eny ochochni kuom gima Muma puonjo e wi wach nindruok. Jopuonj mag din mawacho ni gimakore gi puonj mag Muma, chiwo puonj mopogore opogore kendo matuomore e wi wachni. Kuom adier, wachni osepogo ji e dinde mang’eny madongo.

Kar mana luwo gima ji wacho kuom wach nindruok, donge di ber ka ikawo dakika matin mondo inon wachni iwuon? Sula maluwo biro nono penjo apar ma ji hinyo penjo e wi gima Muma puonjo e wi wach nindruok. E sulano, ibiro yudo dwoko ma achiel kachiel mosir gi Muma. Sula mogik biro nono gimomiyo onego wakaw mapek yiero mwatimo kuom wachni.

[Weche moler piny]